آزمانک: رستر، آزمانکار:رفیق زاہد
آزمانک: رستر، آزمانکار:رفیق زاہد
آیک جناورے اَت۔ لھتے گشیت آ سکیں کارزوالے ات کہ اگاں آزاتی دیگ بہ بیت، بازارءَ، لوگے ءَ، جاگاہ یے ءَ،دپتر ء ُ کارگس یے ءَ یا ھر ھما جاگاہ ءَ کہ شُت کنت مزنیں کارزوالی کنت۔گوں ھر کس ءَ جنگ ء ُ مڑ بیت۔گدء ُ پچاں چنڈ چنڈ ء ُ راڑ راڑ کنت،کاگد ء ُ وانگیاں وارت ء ُ آدراہ کنت۔ورگی چیزاں اگاں وارت نکنت آھاں گٹ پاچیت ھراب کنت۔ایندگہ جناور چہ بندات ء َ ایشی ءِ کازوالیاں چہ وتا دیر دارگ ءِ کوشست کن اَنت۔ چیا کہ آ بازیں دگہ ھرابی ء ُ کارزوالی ھم کنت،پمیشکا کسانیں جناور بالی مُرگ،کوہ پاچن،آسک ء ُ ایندگہ کسان کسانیں جناورچر آئی ءِ کارزوالیانی سوب ءَ آئی ءَ چہ سک باز شزار اَنت ۔
آدگہ گپے کہ آوت چہ چیزے کسان ء ُ چیزے مز نیں جناوراں تُرس اِیت۔ اسل ءَ آ جناور وت چہ آئی ءَ تُرس اَنت۔
بلے نئیکہ آ آئی ءِ ھمبرائی ءَ یل دینت ء ُ نئیکہ آوتی کار زوالی ء ُ ھرابیاں یل دنت۔
اشانی تھا لھتے وتی مناں سکیں شریں جناور ھم است کہ وتا نیکراہی راھانی سرا رہو ک گش اَنت۔وتی مناں سکیں نیک ء ُشرّاَنت۔کسے ءِ کاراں کار نداراَنت۔بلکیں ھرابیں راھاں رہوکاں ھم شریں راہ یے سکین ءَ دینت۔
,,توسرپد اِت من کئی باروا گپ جنگ ءَ یاں۔
,,مشک ءِ!!
,,اناں۔
,,پشی ءِ!!
,,اناں
,,گڈا شیرمزارءِ!!۔۔۔
,, اناں اڑے۔بلکیں بیھال اِت۔ شما وت ھم ھمے جناور ءِ جدماجد ءَ گوں سیادی داراِت۔!!!
,,اے چو نیں گپے!!۔ما وچہ بنی آدم ءَ سیادی داراں۔گڈا بزاں!!!اے ما۔۔۔
,, دگہ نزاناں۔بلے اے گشاں کہ آجناورے۔بلکیں رسترے۔
,,ھو۔ھو۔نی سرپداں شما گُرگ ءَ گشگ ءَ اِت۔
,,اناں۔
,,گڈا ھپتار انت۔ روباہ اِنت یا گڈا تولگ انت۔
,,اناں۔
,, گڑا من نزاناں تو وت بگش۔
,,شما آئی ءِ رستری ءَ شری ءَ سرپد اِت۔
,, گڈا آ پُلنگ اِنت۔ اگاں نا ں گڈا گُرگ اِنت۔ من گشاں ہپتار اِنت۔ اگاں ناں الم تولگ اِنت۔ اناں اناں مُلّا روبو اِنت ۔۔
,, اناں اڑے۔۔اے و انچو بنام انت۔اے وتی کُٹم ءِ کستریں بلکیں کسان ء ُ گونڈیں جناوراں گوں کدی ھم,, رستری،، نہ کن اَنت۔
,,ادءَ چہ رستری ءَ شمے مول ء ُ مراد چے انت!!
,, منی ھیال ءَ جناورانی گالوارءَ رستری ءَ و رستری گش اَنت۔
,,گڈا اے وڑ ءَ و شیر ء ُ پُلنگ اَنت کہ آ آسک ءِ کسانیں چکءَ دائم ور اَنت۔ھمیش اِنت گڈا رستری۔
,,شما ایشی ءَ رستری گش اِت۔بلے اسل ءَ اے رستری نہ اِنت۔رستری دگہ چیزے۔
,,من سر پد نبیتاں۔شما کجام رستری ءَ گشگ ءَ اِت۔
,,ھما کہ گوں کسانیں تپلاں بیت۔
,,گڈا من آسک ءِ چُک ءِ درور چیا دات۔
,,آ و ورگ بیت۔
,,گڈا دگہ زاناں آئی ءَ چے کُت کن اَنت۔
,,نی شما تچکیں راہ ءَ اتک اِت۔کہ آ آئی ءَ ور اَنت۔بلے شما گوں آکسان سالاں چے کن اِت!!!
,,ما زاناں رستر اں۔کہ آھاں بہ ور اں۔
,,گڈا شما گوں آھاں چے کنے۔
,,ما۔۔۔چے کنیں۔
,,ھمے منی جست اِنت ء ُ من ءَ ھمیشی ءِ پسو لوٹیت۔
,,ما آھاں نہ وریں۔بلے مئے تھا لھتے گوں آھاں۔۔۔۔۔
,,بگوش باریں چے کن اَنت۔
,,رر۔رس۔رستری۔۔
(3)
,, نی تو راہ ءَ اتکے۔نی بگوش کہ تو گوں آگونڈیں زھگ ءَ کہ آتئی مدرسہ ءَ وانگ ءَ اَت۔تو گوں آئی ءَ چے کُت۔
,,من ھچ نہ کتگ۔اے ھشکیں بھتام اَنت۔
,, ویڈیو و دروگ نہ بند اَنت۔
,, اے بلائیں پندلے کہ مئے وڑیں ملاھانی سرا سازگ بیتگ۔
,, اے اولی رند نہ اِنت۔شما ء ُ شمے وڑیناں چشیں بازیں کارے کتگ۔بلے آریکارڑ کنگ نبیتگ اَنت۔ء ُ شما رکھ اِتگ یے۔بلے نی موبائل ء ُ چیریں ((Spy کیمرہ ھاں شمے رستری پدر کتگ۔
,, من انگت گشاں اے ایڈٹ کتگیں ویڈیو اَنت۔
,, ھو راست اِ نت۔دُز کہ دذی کنت آچون من اِیت۔ شما ھرچ ھما گپءَ ء ُ ھر ھما چیز ءَ دروگ گشے کہ چرآئی ءَ شمے کِرد پدر بیت۔انچوش کہ دوسال اِنت شما کرونا وائرس ءَ ھم امریکہ ء ُ یورپ ءِ پندلے سر پد اِت۔
,, من انگت گشاں کہ اے پندلے۔
,, گڈا شما چیا کرونا ویکسین جنگ ءَ اِت کہ تئی کرونا ویکسین ءِ سرٹیفیکٹ ھم ایش اِنت منی دیما اِنت۔
,, اے سرکار و زوراک اِنت۔
,, شما و گیشتر زوراک اِت کہ شما ھر چ وھد ء ُ دھر ءَ وتی زوراکی پیشداشتگ ء ُ انگت ھم پیشدارگ ءَ اِت۔بلے یکیں ھمے کرونا اِنت کہ
شمارا سک بیوار کتگ یے۔
,,اد ءَ تو راست گشے۔الم ما ادءَ بیواراِنت۔
,,گڈا پہ رستری ءِ ہلاس کنگ ءَ شما کدی بے وار بئیت۔
,,ایوکا زاناں ما اے رستری ءَ۔۔۔بزاں اے کارءَ کن اِنت۔دگہ بازینے چہ مارا ھم گیشتر اے کارءَ کنت۔شمارا آ موٹر وے ءِ سرءِ رستری ءِ گپ یات نکنت۔ما و انچو بنام اِنت۔
,,نی تو راہ ءَ اتکے۔پیسرا و تو گشت کہ اے رستری یے نہ اِنت ء ُ ما اے رستری ءَ نکناں۔ نی کہ دگرانی باریگ اتک شما وتی ھم من اِت۔ من دگہ چے بگشاں۔ھمے دعا ءَ کُت کناں کہ ھاوند شمارا تچکیں راھاں بیارات۔بلے منی ھیال ءَ کرونا وائرس وت شمارا اے رستری ءِ بیر ءَ گیپت!!!! ا
÷÷÷÷ ھلاس بیت÷÷÷÷