طاہر بن جیلون ءِ گدار ‘اے بصارت کن اندھیرے’ ءِ سر ءَ راہ رواجی دوگپ
طاہر بن جیلون ءِ گدار ‘اے بصارت کن اندھیرے’ ءِ سر ءَ راہ رواجی دوگپ
ابرار سمین
عمر ریوابیلا ءِ گدار ‘ماتم ایک عورت کا’ ءِ وانگ ءَ پد دومی گدار طاہر بن جیلون ءِ ‘اے بصارت کُش اندھیرے’ اِنت کہ زندان ءِ کسہ یے،
مردم آجو اِنت پمشکہ زندانی ءِ ھال ءَ سرپد نہ اِنت۔ ما زندان، زندانی ءِ زندگی بس گپانی تہ ءَ اشکتگ ءُ کتابانی تہ ءَ ونتگ۔ مروچی ءُ آ روچ ءَ کہ من عمر ریوابیلا ءِ گدار ءَ وانگ ءَ اَت اوں۔ گڑا دل ءَ گْوشت وترا یک دمانے۔۔۔ یک کترہ یے ھمے گدار ءِ کارست ءِ جاہ ءَ زندانی کن۔۔۔ انچو سما بکن کہ اے طاہر بن جیلون ءِ گدار ءِ تہ ءِ زندانی نہ اِنت بلکیں تو ئے۔۔۔
تھاریں کوٹی یے کہ پنچ فٹ دراجی ءُ شہ دہ فٹ ءَ کم آئی ءِ گْور اِنت۔ نا مردم شری ءِ سر ءَ اوشتات کنت ءُ نئیکہ پادانی پچ کنگ ءَ دو گام جت کنت۔۔۔ شہ درستاں مزنیں درد ھمیش بیت کہ مردم ھچ نزانت کہ اے وھد ءَ۔۔۔۔ اے ساھت ءَ کہ من زندگ اوں اے ساھت ءَ شپ اِنت یا روچ اِنت۔ ماں زنداناں شپ چی یے ءُ روچ چی یے۔۔۔؟
اد ءَ شپ، شپ اِنت ءُ روچ ھم شپ اِنت۔۔۔ چیاکہ رژنائی ءِ ھچ وڑیں برمشے گندگ ءَ نہ ایت۔۔۔ نئیکہ استار ترپ اَنت ءُ نئیکہ ماہ ماھتاپ بیت۔۔۔۔ نئیکہ سبزیں آزمانے ءُ نئیکہ بیگاہ ءِ زرد چکیں رنگے۔۔۔ نا مُرگانی توارے ءُ نئیکہ سبزانی سھر چکیں لنٹانی بچکندے کہ دمانے مردم ءَ شہ دنیا ءِ ھست ءُ نیستاں یک کر کنت۔۔۔
بس تھاریں کوٹی یے، مردم کُور نہ اِنت کُور اِنت۔ اد ءَ ترا بس چیزانی(شہ کوٹی ءَ ڈن سپاھیانی بوٹانی توار ءُ ماں کوٹی ءَ مُشک، چِرِت ءُ زُومانی) پادبمشاں سما کنگی اِنت۔ آ مُشکے گْوست۔۔۔۔ اِش اِنت چِرِتے دیوال ءَ گردگ ءَ اِنت۔۔۔ دومی کوٹی ءَ کسے قران وانگ ءَ اِنت۔ کسے وتی گْوست ءَ گیر آرگ ءَ اِنت ءُ گریوگ ءَ اِنت۔ بایدیں زندان ءَ مردم وتی گْوستگیں روچاں یک کر بکنت ءُ ھمے زندگی ءَ قبول بکنت ءُ وڑے نا وڑے ءَ وترا گوں تھاری ءَ سنگت بکنت۔
طاہر بن جیلون جاھے نبشتہ کنت ” یاد کرنے کا مطلب تھا مرنا۔ مجھے یہ سمجھنے میں تھوڑا وقت لگا کہ یادیں ہی دشمن ہیں۔ ہم میں سے جو کوئی بھی ماضی کو یاد کرے گا وہ مرنے میں وقت نہیں لگائے گا۔”
طاہر بن جیلون ءِگدار ءِ تہ ءَ یک حمید نامی مردے (ماں زندان ءَ شہ بازیں لٹ ءُ کُٹاں گنوک بیت۔۔۔ دم پہ ساھت کوکار ءُ زار کنت۔۔۔وتی سر ءَ گوں دیوالاں جنت۔۔۔ ماں زندان ءَ وتی سر ءَ وت زمین ءَ کنڈ کنت)بیران بیت۔ گڑا ایدگہ زندانی کہ آئی جنازہ ءِ وانگ ءَ شہ تھاریں کوٹیاں درکنگ بنت۔ گڑا آ وتی اندر ءَ یک انچیں مارشتے سما کن اَنت کہ ھچ بیان کنگ نہ بیت۔ اے مارشت وشی یے نہ اِنت۔۔۔ گمے اوں نہ اِنت۔ نوں اے مارشت واناکاں مارگی اِنت کہ اد ءَ زندانی وش اَنت کہ آیاں روچ دیستگ یا وتی سنگت ءِ بیرانی ءَ گمیگ اَنت۔۔۔
طاہر بن جیلون ءِ گدار ءُ عمر ریوابیلا ءِ گدار بلوچاں وَ الم وانگی اِنت۔ چیاکہ مروچاں ماں اوں انچیں جاورے ءَ زندگ ایں۔ ءُ ھر یکے وتی باریگ ءِ ودار ءَ نشتگ ۔۔۔۔۔