کتابانی ارزشت۔ نبشتہ کار: شکور شوھاز
کتابانی ارزشت
شکور شوھاز
شکور شوھاز
اے کتابانی عکس کہ من ایر کُتگاَنت کہ اے کتاب سیاھگی ءُ نگارشی ھساب ءَ بلوچی ءِ ارزشتدارتریں کتاباَنت. منی بنگپ بس اے کتابانی سیاھگ ءُ رھبندانی پاسدارگ ءِ سر ءَ اِنت.
یکے ھدامرزی غنیبخش آدیش ءِ پاکساڑا ءُ پاکنازینکانی کتاب «مرادانی دوارجاہ» ءُ دومی واجہ محمد امیری ءِ رجانکی کتاب «تهار ماہ» اے ھردو سیدھاشمی ءِ سیاھگ ءَ اَنت.
سیدھاشمی ءِ سیاھگ بس ایوک ءَ ھمزھانی کارمرزی نہاِنت؛ بلکیں سرجمیں سیاھگ ءِ راستنبیسیاِنت. محمد امیری فارسی لبزانک ءِ یک مهکمیں وانوکے ءُ ماھریں رجانککارے ھچبر پہ کار ءَ اشتاپ نہکنت ءُ کاراں پہ پھتگی ءُ اوپار دیم ءَ بارت. محمد امیری ءَ وتی رجانکی کتاب «تهار ماہ» زبردست گیش ءُ گیوار کتگ ءُ آئی ءَ کوھنیں فونت «نستعلیق» چگل داتگ ءُ وتی رجانکی کتاب «Adobe Arabic» فونت ءِ تہ ءَ کمپوز کتگ ءُ «فاصلہ» ءُ «نیمفاصله» ھم ھیالداری کتگاَنت؛ پمشکا سیاھگی ھساب ءَ اے کتاب واناک ءُ ڈولدار اِنت. اے فونت ءِ شّریّ یے یکے اِشاِنت کہ تاکدیماں چہ گیش ءُ دراج بیگ ءَ رکّاینایت.
چونائی ءَ ما بلوچ سیاھگ ءَ اھمیت نہدئیں؛ بلے دنیا ءَ اولی درونت ھمے سیاھگاِنت کہ ھر وانوکے باید سیاھگ ءَ سرپد بہبیت، نبشتہکار ءَ وَ الّمیاِنت کہ اے پڑ ءَ آژناگ بہبیت.
بلوچی ءَ پیشوند ءُ پدوند ھرچے کہ لچّینگی نہاَنت آ باید اِنت کہ نیمفاصلہ دیگ بہبنت. پہ درور: «مہبنت، مہکنت، نہبنت، نہونت» یا کہ «کارگر، وامگر، زرگر، دردگر، شپگر» ءُ دگہ باز، چشیں گالاں فاصلہ دیگ زلورت نہاِنت.
پیسریگیں مئے ھر تاکبند ءُ مھتاکے یا کہ ردانکی کتابے چاپ بیتگ آ گوں سیاھگ ءِ نادلگوشی ءَ انچوشاَنت کہ ھچ واناک نہاَنت ءُ دومی پدا ھمے ”نستعلیق» ءِ فونت بنیاد ءَ ایرانئیگاِنت سک دیر اِنت ایرانیاں اے چگل داتگ ءُ نوکیں نوکیں فونت دیم ءَ آورتگ. اے نستعلیق گیشتر پہ دزنبشتی وشنبیسی ءَ کارمرز بیت، دگہ پہ چاپی شَیراں ھم کارمرز نہبیگ ءَ اِنت؛ بلے بلوچ اردو ءِ رند ءَ کپتگاَنت، اردو وت دگرانی چمدار اَنت. من گیشتر گپ جنگی نہاِنت، بس ھمینچو گوشاں وتی کتابانی سر ءَ کہ اینچو زھمت کشّاِت ءُ اینچو زر ھرچ ءُ درچ بیت؛ گڑا سیاھگ ءُ رھبنداں ھم ھیرتچاری بہکناِت دانکہ شمئے کتاب وانگ بہکرز اَنت.
کسے ءَ محمد امیری ءِ رجانکی کتاب ”تھار ماہ» نہونتگ؛ گڑا اے کتاب ءَ الّم دربِگیجایت ءُ بہوانایت کہ بلوچی ءِ تہ ءَ یک ارزشتداریں کتابے ھمشاِنت انچو سیاھگ انچو آئی ءِ رجانک وانگ کرز ایت.
بلوچی سبز ءُ میزران بات.