سرگوست : بیا چورن بھا کن ایں (دومی بھر)
سرگوست : بیا چورن بھا کن ایں (دومی بھر)
نبشتہ کار: زاھدہ رئیس راجی
دل ءَ گوشت کہ چہ بانک ھانیہ کنول ءِ واٹس ایپ ءَ وتی زانت دپتر ءَ ولگوج بِہ کن کہ گوں ناسرپداں کپگ ءَ سرءِ درد نہ کپ ایت۔ پدءَ دل ءَ جیڑ ات کہ پرچہ ایشتاپ ئیگ ئے ، کمے اوپار کش ، ایشاں گوں ھمراہ بُو، بلکیں تئی کار ھم چہ ھمدءَ شر بہ بیت۔ بازیں وسواس جندءَ کجین ایت۔ زھن ءُ دل انگت ھمے گڑمنجانی تہ ءَ مان گِش اتگ ات آں کہ چہ مکران ءَ یک دزگھارے ءَ گوانکو ءِ سرءَ زنگے جَت ءُ سلام ھلیک ءَ رند گوشگ ءَ لگ اِت کہ زاھدہ من ءَ مُرادبادی بہ دئے کہ من شوکیں کارے دست گپتگ ، ماھے پنجاہ ھزار کلدار رس ایت۔ من پُرس ات ، کار ءِ دیوک کے اِنت، آئی ءَ گوشت کہ مردم وتیگ انت ءُ آئی ءَ دیستگ ات کہ من دیرانت وتی کار یلہ داتگ گُڑا من ءَ گوشت ئِے کہ من گوں آئی ءَ ھمکاری بہ کن آں۔
دزگھار ءَ من مُرادبادی دات ءُ دلبڈی دات ءُ گوشت کہ انوں ایشتاپ ئیگ آں کہ من ءَ ھم یکے ءَ پہ کارے ءَ گوشتگ ، دَہ منٹ ءَ رند باریں انٹرویو انت اگاں نہ ٹریننگ۔ ھروھدءَ گیش ات آں گوں تو دوبر ھال اھوال کن آں۔
وھدے منی ٹرینگ ءِ وھد نزیک ءَ اتک بانک ھانیہ کنول ءَ دگہ بانکے ءِ بابتءَ سرپدی دات کہ آ چہ دبئی ءَ آنلائین کئیت ءُ زوم ویڈیو کانفرنس ءَ مارا ٹریننگ دنت۔ چوشکہ ایشاں من ءَ ادار دو نیم ءِ جاگہ ءَ سے نیم ءَ ھوار کُتگ ات پمشکا من تھنا ھمنچو دیست کہ آ گپ جنگ ءَ ات کہ جاب کنوک ءِ سرءَ ویلے ھم کپت ایت بلے کارمستر آھاں نادراھی یا دگہ ویلے ءِ موکلانی زراں نہ دنت ءُ ھمنچو روچءَ آ کار ءَ نہ روت، آئی ءِ پگار ءِ زر کاٹ بنت۔ بلے باپاری کنوک یک برے زر ھرچ کن انت ءُ تاں زندگ ءَ انت، اے زرانی مُزّ ءَ وَر اَنت۔
منی جاگہ ءَ اگاں دگرے بوت انت آئی ءَ گوشتگ ات کہ اے بانک ءَ سد درسد راستیں گپ جَتگ بلے من بانک کنول ءَ کلوھےدیم دات کہ بانک ھمائی ءَ چورن بھا کنگ ءِ ھُنر کئیت، آ تُری لوگ پہ لوگ بہ روت وتی چورناں بھا بہ کنت، دُکان پہ دُکان بہ روت، اگاں نہ آن لائین اے کار ءَ بہ کنت، آ الم ءَ سوبین بیت کہ آ کار رھبند ءَ زانت، بلے درست چورن بھا کنگءِ ھنر ءَ نہ زان انت۔ پمشکا ربّ ءَ بہ چار اے میڈیکل ءُ انجنئیرنگ ءِ نامداریں ءُ شرپداریں پِڑانی مردماں رَد رھشونی مہ کن۔ پَہ سیلزگرل ءَ میٹرک ءُ انٹر پاس نیزگار مُچ انت ھمایاں بہ گر ءُ کمیشن ءِ سرءَ کار کنائین۔
بانک کنول نوں چَہ زھرءَ گج کپ بیت کہ بانک زاھدہ ترا باپار کنگی نہ انت مہ کن، مئے مینٹور بزاں سرءُ سوج کنوکیں بانک بینِش امارات ءَ مزنیں باپارے، آ پہ سرءُ سوجی دیواناں دگہ نیمگءَ زر زورایت بلے شمارا مپتی سوج دیگءَ انت ءُ شما مجاز ات۔
من گوں کندگ ءَ جنک ءِ ترندی ایرموش کنائینت ءُ گوشت کہ شریں ما آئی ءِ منتوارایں کہ مارا باپاری راہ ءُ رھبنداں سوج بہ دنت۔پدءَ من بانک کنول ءَ گوشت کہ منءَ مروچیگیں سیشن ءَ ھم ھوار بہ کنت کہ سوج دیوک ھرکسے بہ بیت دربروک بے مُز نہ بیت۔
ھیر اے دگہ روچءَ پدءَ کلاس بنگیج بیت۔ نوں سوجکاریں بانک بینش ءَ” فار ایور “نامی سنگاری ازبابانی ادارہ ءِ توسیپ ءُ ستا ءَ چہ پنچ ءَ بہ گرتاں 10 منٹ ءَ مئے گوش کر کُت انت۔
پدءَ وتی اماراتی ادارہ” پاور ایگل“ ءِ بابتءَ پتاری کُت، پدءَ ھما بانکانی اکس ءُ تامُر پیش داشتگ انت کہ آھاں اے ادارھاں گوں ھمگرنچ بوَگ ءَ رند ملیون کلدار، درھم ءُ ڈالر کمائینتگ ءُ سالے دو سال ءِ توک ءَ پہ وت ءَ ایشاں مزنیں گاڈی ءُ لوگ زُرتگ۔اے درست ھما مردم ات انت کہ ایشاں وتی پیسریگیں کار روزگار یلہ داتگ اَت ءُ چیزے زر ھرچ کُتگ ءُ باپار کُتگ اَت ءُ نوں کول ء بانک بینش ءِ، اے درست آپ لاپ اَت انت۔
پدءَ بانک بینش ءَ چہ دینی کتاباں یک اربی گوشتنے ءِ اردو رجانک دیم ء آرت کہ اسلام ءِ دین باپار ءِ سکین ءَ دنت کہ باپار کنگ ءِ 95 راہ انت اگاں کسے کنگ بہ لوٹ ایت۔
پدءَ بانک ءَ باپارئیگی مزنیں ادارہ ءَ گوں ھمگرنچ بوَگ ءِ سیت ءُ نپانی بابتءَ واز کُت ءُ رندءَ گوشت کہ منی انسٹاگرام اکاؤنٹ اوں است انت ءُ گوں من ءَ ھمودءَ رھوت بہ کن ات۔
چوشکہ من بانک ءِ دراھیں ٹریننگ ءِ سلائیڈانی اکس چہ دستی گوانکو ءِ کشّان کُتگ ات انت پمشکا من گوں آسانی ءَ بانک ءِ انسٹا گرام اکاؤنٹ ءَ سربیت آں۔
چاراں پنچ کلو میکپ اپ ءَ گوں وتءَ زیبدار ءُ براھدار پیشداروکیں بانک یک نیمگے ءَ گوں دبئی ءِ شاہ ءِ بچ ءَ اکس کشگ ءَ انت دومی نیمگءَ پاکستانی ٹی وی چینل ءِ نامداریں ازمکار آئی ءِ توسیپ ءُ ستا ءَ کنگ انت کہ ایشی ءَ پاکستان ءِ توک ءَ سداں گیش جنک ءُ جنین ملیونر جوڑ کُتگ انت پمشکا ھمک لوگی جنینے ءُ کارمندیں جنینے ایشاں گوں ھمگرنچ بہ بیت ءُ وت ءَ ایزگار ءُ سیریں مردمے جوڑ بہ کنت۔
من ھیران اتاں کہ اے دوئیں روچ ءِ ٹریننگ ءَ منی زانت دپترءَ گوں ھمگرنچیں کسانیں کارے ھم ھوار نیست اَت بیدء اے گپے کہ دراھیں کاراں یلہ بہ دئیت ءُ چورن بھا بہ کن ات بزاں فارایور کمپنی ءِ سنگاری ازباباں بھا بہ کن ات۔
انگت من ھمے گڑمنج ءِ تہ ءَ اتاں کہ بانک کنول ءَ زنگے جت کہ بانک زاھدہ مروچیگیں کلاس ءَ تو چے دربُرتگ۔ من سوجکار ءِ کساس دراھیں نکتھانی بابت ءَ آئی گوشت، نوں بانک کنول سک بِر بیتءُ گوشگ ءَ لگ ات کہ بانک زاھدہ ترا ھزار نامھُدا بات کہ تو سرجمیں ٹریننگ در بُرتگ۔ من بچکندات کہ بزگ نزانت کہ ٹریننگ ءِ زُرتگیں اکسانی دوبرچارگ چُنت وھد زور ایت۔
روان انت۔۔۔
٭٭٭٭٭