گاریں تاک۔ھاشم شاکر ءِ شوھاز۔ اے آر داد
گاریں تاک۔ھاشم شاکر ءِ شوھاز۔
نبشتہ کار: ڈاکٹر اے آر داد
چندیں نام کہ زی آیاں نبشتگ کرتگ ات ،مرچی ھم زندگ انت بلے نویسگ ءَ نہ انت۔ آیانی دَور ءِ مردم ءُ چاگرد دوئیں نہ منتگ انت ۔اشاں نویسگ ءِ گم یکّر کت ءُ دگہ نیمگے دلگوش بوت انت۔ بگندے چریشاں چندیں دنیگا نویسگ ءَ بہ بیت ،بلے آیانی نبشتگیں گندگ نہ بنت۔
گاریں تاک ھماگاریں مردمانی شوھاز ءِ نام انت کہ آیانی گور ءَ ساچشتی بودشت بوتگ۔مرچی ھم آیانی نبشتگیں لاچار کن انت کہ مردم آیاں بْوان ایت۔
چرے گاریں ناماں چہ یکے ھاشم شاکر انت کہ 1969 ءِ دور ءُ باریگ ءَ ماھتاک ” الس” ءَ چاپ ءُ شنگ بیگ ءَ انت۔ دومی تاک بابو شورش ءِ ” نوکیں دور” ات کہ نہ ایوک اود ءَ اشی ءِ لچہ چاپ ءُ شنگ بیت انت، بلکیں بابو ءِ تاک ءِ کَمّکارات ھم۔
ھاشم شاکر کہ زندگ انت گڑا چون درگیجگ بیت؟۔دوسال پیش بازیں جست ءُ پرس ءَ پد آئی ءِ من ءَ نمبرے رس ات۔ ھمک دومی روچ ءَ من آ فون کتگ ات بلے نمبر ءَ گرگ ءِ وڑ ءَ نہ ات ،من ھم دمبرت ءُ نشتاں۔ من چو کہ وتی تب ءَ زاناں دوشی پد ءَ آئی ءِ نوکیں نمبرے رس ات۔ من کال کت، نہ گپت ئے۔ مرچی سھب ءَ من کال ءِ بدل ءَ میسج کت کہ من پلاں کساں ، ترا گندگ لوٹاں۔ گڑا مرد ءَ وت پد ءَ من ءَ کال کت ءُ گْوشت من اے وھد ءَ کراچی ءَ یاں ،شال ءَ کہ کایاں گڑا ھال ءُ اھوال بیت۔
ھاشم شاکر ءِ بارو ءَ اے سرجمیں نبشتانکے نہ انت ۔ دگہ دیوانے ءَ آئی ءِ لچہ ءُ زند ءِ بارو ءَ جھد کناں کمیں گیشیں سرپدی شمارا بہ رس ایت۔ھاشم شاکر ءِ وتی گوشگ ءَآ عطا شاد ءَ گوں باز نزیک بیتگ۔ اے نزیکی ءَ ما آئی ءِ لچھانی تہ ءَ دیست کنیں۔
دومی جست من آئی ءَ ھمے کت کہ تئی لیکویے ، منی دیم ءَ گوستگ اے گیدی لیکویے یا شما وت نبشتگ ۔ مرد ءِ گوشگ ھمیش ات کہ من لیکو نویسگ ءِ تجربت کرتگ ،اے منی جند ءِ لیکو انت۔
ھاشم ءِ لیکو ءِ وانگ ءَ پیش ،لیکو ءِ بارو ءَ کمیں سید ءُ سبا ءِ گپاں بْوان ات کہ بے سواب نہ بئیت۔
بلوچی ءَ ” لیکو” ھما گونڈبندیں لچہ ءَ گوش انت کہ کوچگ ءُ کوھستگ ءَ پہ کسے ءِ یات ءَ گوشگ بیت۔ ابید چہ ایشی ءَ لیکو چہ گالاں گیشتر گوں زیمر ءَ سیادی کنت۔ھمے لیکو ءَ ماں پراہ ءُ دراجیں بلوچستان ءَ ” ڈئیکو” یا ” ڈئیرو” ھم گوش انت۔(چکاسنگ۔ تاکدیم 36)۔
سبا دشتیار ” گلکار ءُ چکنکار” ءِ تہ ءَ ایشی ءِ بارو ءَ چو نبشتگ کنت۔”ایشی ءَ شپانک ءُ شوانگ جن انت۔ اشی ءِ شم ءَ سات ءُ سپر ءِ دوری ءُ جتائی ءِ مارشت گندگ ءَ کیت، پد ءَ کوہ ءُ تلارانی وشیں زید ءُ ندارگ ءِ گپ ءُ باھند ھم درشان کنگ بنت”۔
ھاشم شاکر ءِ اے لیکو ءِ تہ ءَ سپر ءُ جتائی دوئیں جْوانیں رنگے ءَ گندگ بنت۔
لیکو۔ محمد ھاشم ۔چاگئے
کاگدے آحتہ دیگرو شام ءَ
سر منی ندر انت پر تئی نام ءَ
بارگی(بارگ ءِ )کوٹھی فرش و غالی انت
پر تئی جند ءَ دوست خالی انت
کاگدے دیم دئے اندر ءَ وانیں
تئی دل ءِ مطلب ءَ من وت زانیں
پاکستان ملک ءَ موٹل چون باز انت
بارگ بورجان اچ ما بے نیاز انت
بارگو گوشتہ منا نوارت مار ءَ
سحتگیں راجے ھچ میا دوارہ
سوار بیں ریل ءَ من رئیں ڈالو(دالبندین)
ٹی ٹی یے گون انت نیست منا باڑو
کافر ءِ ریل ءَ من کنیں باڑو
شپ منی یکّے ایر کپیں ڈالو(دالبندین)
ماری یے داریں روت خراسان ءَ
اللہ نگہبان انت ہر دو براسان ءَ
شاہ کریم ساز کن بلبلی تار ءَ
دشمن ءَ جوڑینت ناشریں کار ءَ
شالکوٹ ءِ ٹیکسی دیگر ءَ آحتہ
بارگی حال ءَ را منا داتہ
بارگی موداں نائی ءَ گونڈ کرت
دشمن ءِ عمر ءَ خالق ءَ کم کرت
خالق ءِ امران بوتگن بندی
آ چے روچے بیت من ترا گندیں
مُرگے پہ بال انت، بال چنڑینیت
بیوسیں ماس تئی پیر گوندینیت
ماری یے داریں کیدو سر زان انت
مزّلے دوریں پمّن آسان انت
جامگے چیٹ ءِ برشخ دنت توئی
بارگیں بیکاں ترنز دنت بوئی
بارگی بالاد رستہ چو سول ءَ
اعتبار نیست برجن ءِ قول ءَ
جمّرے اُستیت چو تنک پیش ءَ
قسمت اُن سحتہ گوں مزن ریش ءَ
سرحدی مسوانکاں مجن زّری!
ہوش چہ سلطان ءِ ھم سر ءِ پرّی
24اپریل 2023۔