گاریں تاک ۔۔۔زینُل کلانچی باریں کجا نشتگ
گاریں تاک ۔۔۔زینُل کلانچی باریں کجا نشتگ
نبشتہ کار: اے آر داد
بلوچی لبزانک ءَ ھّک ءُ دلی جنک ءُ جنینے بہ بیت یا چاپ نہ بوتگیں مُرگے ،وت ءَ گوں جنکی بانزلاں رنگ بدنت ءُ دیم ءَ بیار ایت، اے دوئینانی سر ءَ یکیں ھساب ءَ شکّ کنگ بیت۔شّک پمیشکا کنگ بیت کہ بازینے رند ءَ زانگ بوت۔ یار ایشی ءَ اوں وت ءَ جنکے ءِ ریٹ ءَ بھا کتگ؟۔ نام ءَ نہ گراں کہ بہ کولء دین محمد تاثیر ئیگ ءَ
داور حشر مرا نامئہ اعمال نہ دیکھ
اس میں کچھ پردہ نشینوں کے بھی نام آتے ہیں
پرچا کہ آزمانک بیت کہ شئیر بازیں واجہ ءُ ورناھے ءَ وت ءَ ماں اندر ءَ اَنچو گوں جنک رنگ ءَ پیڑ اتگ ات کہ من ءَ مدام مبارک کازی ءِ اے شئیر یات اتکگ ات
کماریں دلبرے باتاں
شھپاریں مھپرے باتاں
اے باریں اندری واھگے ات یا زمانگ ءَ ریپنگ ءِ تکنیکے! یا بلکیں کپتگیں چیزے ءَ جوانیں نھادے ءَ بھاکنگ ءِ جارتاکے ؟ چیزے وَ ھیر بیت۔
زینل کلازنچی 1992 ھمے زمانگ ءَ دیم اتکگیں نامے۔ من آئی ءَایوک ماھتاک بلوچی ءَ چاپ ءُ شنگ بیگ ءَ دیستگ ات۔من آئی ءِ بارو ءَ ھچ رنگیں شّکے دل ءَ نیاورتگ ات۔ من گوش ئے چہ ازل ءَ اے نام ءَ چہ آشنا اتاں ۔ شّک کتگیں موسم داں دیر ءَ نہ مان انت۔ زینل ءِ بارو ءَ باریں چی ءَ، کس ءَ چوشیں گپے نہ کت کہ اے پلاں بچک ءُ واجہ انت ۔کس ءَ ھچ نہ گوشت۔
من وَ چوناھا ھم ازم ءِ منّوگراں پمن ءَ نام ءِ دروگ ءُ راست بُوّگ مانا نہ دار د۔ چو من جیڑگ اتگ ات کہ اے باریں پسنی کلّگ کلانچ ءَ نشتگ یا دگہ ھلک ءُ بازارے ءَ ،باریں کجا بیت۔
ھیران پمیشکا بیتگ اتاں کہ جنینی جاگہ ءَ بیدے بانل دشتیاری ءَ اے گمجتی ءِ دومی توار چہ کجا پیداک انت۔
دریگتیں پہ واھگ ءِ پُلّیں متاہ ءَ ناز کتیں
یا پہ درد ءِ مودگ ءَ یک مونسے شوھاز کتیں
بے بدل پہ وشنیتکاں بِھ نہ بیت شھداد
بلے
انچو پیدا مکھیں مات ءَ دو بر مھناز کتیں
ماھتاک بلوچی اپریل 1994 تاکدیم 59۔
ھمے دستوک ءِ اے شئیراں سیل بکن ات۔
آکہ پہ داباں زر انت ما ننگ، لج ءُ میار
انچو چاگرد ءَ شبند دودانی درانگاز کتیں
جی پہ للّہ ءَ کہ بستگ پہرمہر ءِ سیادی ءَ
چو ودی پہ کلمت ءَ قولانی آ گراناز کتیں
بندات ءَ کسے ءِ اے رنگیں گالوارے اش بکنت، کسے ھم نہ گوش ایت اے نوک کتہ کاریں شاعرے۔ تو گوش ئے اے وَ چہ زمانگ ءَ ھمے ازم ءِ چکاس ءُ تجربت ءَ گوزان بیتگ ءُ اد ءَ سربیتگ۔ جنینابی جیڑہ بگندے باز رند ءَ یک وڑیں بنت۔ پمیشکا فیمنسٹاں وتی لبزانک، وتی نگد ءِ کلینکے پچ کتگ کہ مردین ءُ جنین ءِ جوزہ ءُ مارشت گِستا ءُ جتا انت۔ ھیر من گوشاں اے انسانی جبزگ انت اشاں جنین ءُ مردین ءِ نام ءَ بھر کنگ پہ انسان ءَ زوراکی یے بیت۔ فیمنسٹاں گائنو کریٹی سسزم ءِ نام ءَ وتی نگد ءِ دکانے پچ کتگ کہ داں جنینان گوں، آیانی لبزانک ءَ گوں انساپ بہ بیت۔ زینل ءِ گمجتی ءِ ربیت من سما کناں چہ بانل دشتیاری ءِ شپاں گوں ھوار کپتگ۔
شادکامی بہ لیکاں شپاں اندوہ ءِ گیر
ھمک کنڈ کتگ زرد ءِ تئی مولماں جھگیر
پیڑ اتگ ھیالانی ما ریدگیں تانجو
مانپوشیت ستر زند ءَ سیاہ گوات ءِ مجیں بیر
زینل تچک ءَ بیان کنگ ءِ بدل ءَ جیڑ ایت ءُ چہر گوشگ ءِ جھد ءَ کنت۔
ابیتکیں دھر ءِ کوھیں گم نہ رنجین ایت من ءَ زینل
پہ درد ءِ تَوابّگ ءَ رستگ من ءَ را دمب دلبندے
دمب دلبند ءِ چہر پہ دل ءَ بلوچی ءَ نوکیں چہرے۔ ایوک کوھن ءُ کدیم ءِ مانا ءَ نہ دنت بلکیں ھزار گونگ ءُ ھزار رنگانی بنجل ءُ جاھے ءِ ھم مانا ءَ دنت۔ دل چو کبرستان ءِ چہر ایوک آئی ءَ رد نہ کتگ بلکیں ربیدگی اشارگے ءِ بنلاد ایر کت۔
کتگ اندیم دل ءِ آدینک تئی چماں چہ بدواھاں
بچار مئے دید ءِ آدینک ءَ کہ عکس ءَ تو وتی گندے۔ ماھتاک بلوچی اپریل 2023۔
زینل کلانچی نوزدہ سد ءُ نَودَ ءُ چار ءَ ماں ماھتاک بلوچی ءَ چاپ ءُ شنگ بیتگ ،داں دوھزار شش ءَ آئی ءِ اے سپر ھست ءُ برجاہ ات۔
اے آئی ءِ کمیں شئیر ات انت۔ من بہ لوٹ اتیں دگہ اوں مسال داتگ ات ۔آئی ءِ گور ءَ گمجتی ءِ درانگازی ءِ درشانداب ھمے رنگ ءَ انت کہ یک سرے آئی ءِ گوں سیمک ءُ مھناز ءَ روت ءُ رس ایت ،ءُ دومی نیمگ ءَ بانل دشتیاری ھم کیت ءُ گوں آئی ءَ دوچار کپ ایت۔
جنینی جاگہ ءَ دستونک ءِ چوشیں شئیر کشّگ ءَ کسے آئی ءَ بہ گند ایت شّک مہ کنت ، چی بکنت؟۔
باریں مروچاں کجا بیت؟ دنیگا شئیر گوش ایت ؟ یا دگہ رنگیں نازینکے ءِ شند ءُ آپشار ءَ گوشدارگ ءَ بیت۔ باریں کے سھیگ انت ۔؟۔
19اپریل2023۔
