راجدپتر ۔ ھراسان ءُ مکران
کتاب ءِ نام: مکران (حمید بلوچ)
رجانکار: عبدالله میر
اولی بھر 1

سکندر ءِ بیرانی ءَ پد آئی ءِ بادشاھی چنڈ چنڈ بیت پارتھیا بھیرہ کزر دریا باری ءُ روچباری دمگ سیلو سینڈز ءِ بھر ءَ کپت انت آئی ءِ دور بادشاھی 250 کبل مسیھ تک بوتگ آئی ءِ مرگ ءَ چہ پد پارتھی یک مشت ءُ یکجاہ بوتگ انت ءُ آیاں وتی وت واجھی ءِ جار جتگ پارتھی وت ءَ را وت ایران ءِکوھنیں بادشاھانی پدریچ گش انت یونانیانی زوال ءَ پد پارتھیانی سُر پُر گیش بوان اتاں پارتھیانی سیمسر کوہِ البرز ءَ بہ گر دانکہ اوگان ءِ آب ریچ ھرات ءَ تک سرجمیں دمگ پارتھی ءَ وتی کرتگ ات آیانی مرکز ھراسان ءُ گوریچانی نیمگ ءَ توران ھم ھوار ات
گش انت کہ کدیم ءَ اے دمگاں پارتھو نامیں یک راجے نشتگ ءُ آباد بوتگ پمیشکا اے دمگ ءِ نام پارتھیا گشگ بوتگ یونانیانی وھد ءَ اے دمگ سیلوسیڈز ءِ ایر دست ءَ بوتگ پارتھانی اولی سرکماش متھری ڈیٹس 138 تا 171 کبل مسیھ بوتگ آئی ءِ وھد ءِ بادشاھی ءَ بابل ءُ شام تک اے سرجمیں دمگ گون بوتگ انت وھدیکہ یونانیاں چہ پد رومن اتک انت گڑا ایشانی میانجی ءَ بازیں ترسناکیں جنگ بوت انت اے جنگ 53 کبل مسیھ بہ گر دانکہ سیمی سدی ایسائی بزانکہ میلادی تک اے جنگاں تول کش اِت پارتہ۔ساسانیانی دیم ءَ 227 ء میلادی ءَ ایر جیگ بوت انت پارتھاں یک سرجمیں دمگے گون بوتگ ات بابل ءُ شام ءَ بہ گر دانکہ ھندوستان ءَ بہ روت آیانی دلیری ءِ دَرور دیگ نہ بیت ۔وھدیکہ پارتھاں پروش وارت ایران ءِ تہ ءَ ساسانی دور بندات بیت اے 227 میلادی ءَ بہ گر دانکہ 651 میلادی ءَ تک مکران ھم اے دَور ءَ ایران ءِ تہ ءَ ھوار بوتگ اے دور ءِ ھکومتی ءَ بلوچانی نام ھم پردوسی ءَ وتی شاھنامہ ءِ تہ ءَ آرتگ گش انت کہ ساسانی دور ءِ راجدپتر تچک نبشتہ کنگ بوتگ دانکہ شاپور دوئم ءَ تک لھتے چش انت۔ یاد بہ کن ات کہ میلادی (عیسوی) رمس انت

اردشیر اول۔ 226 بہ گر 241 میلادی
شاہ پور اول۔241 بہ گر 272
ھرمزد اول 272 بہ گر 273
بھرام اول 273بہ گر 276
بھرام دوم۔276 بہ گر 293
بھرام سوم۔یک سالے
نرسی۔293 بہ گر 303
ھرمزد دوم 303 بہ گر 310
آذرنرسی۔310 تا۔۔۔۔۔۔۔۔۔۔
شاپور دوم۔310 بہ گر 379
اردشیر دوم 379 بہ گر 383
شاپور سوم 383 بی گر 388
بھرام چھارم۔388 بہ گر 399
یزدگرد جرد اول 399 بہ گر 420
بھرام پنجم۔420 بہ گر 438
یزدگرد دوم۔438 بہ گر 457
ھرمرذ سوئم۔457 بہ گر 459
پیروز 459 بہ گر 484
بلاش 484 بہ گر 488
کباداول۔488 بہ گر 531
کسرو اول(نوشیروان) 531 بہ گر 579
ھرمزد چھارم۔579 بہ گر 590
کسرو۔دوئم 590 بہ گر 628
کباد دوئم۔628……..
اردشیر سوئم۔628 بہ گر 630
یزدگر سوئم 632 بہ گر 651
اے رمسانی رِد ءَ ساسانیانی دور ایش بیتگ انت

ساسانی ٹک ءِ اولی سرکماش بادشاہ اردشیر اول ءِ بابت (الطہری) گش ایت کہ ایشی ءِ پت بابک بندر ءَ چہ شیزار ءِ روبرکتی دمگ (خیرکا) ءِ سرکماش بوتگ ۔ بابک ءِ پت ءِ نام ساسان بوتگ آ وتی ھند ءُ دمگ ءِ مزھبی ملایے بوتگ آئی ءَ ایران ءِ کسان کسانیں دمگانی سرکماشانی دمگ پچ گپتگ انت ءُ وت راجدھانی کرتگ ءُ وتی دستور ءِ جار پرینتگ دیمترا (الطہری) گش ایت کہ ھمے دَور ءَ اے ٹک دیم ءَ آتکگ ءُ آئی اشکانی (پارتھی) بادشاہ ارتبانوس پنجم ءَ را پروش داتگ ءُ آئی ءَ جتگ اے واکیات 224 میلادی ءَ پیش آتکگ ءُ 226 میلادی ءَ آشکانی(پارتھی) ھکومت مرکز مدائن ھم دست ءَ گپتگ ھمے وڑا ساسانی دَور بندات بوتگ…

روان انت