آئزک باشیوس سنگر ۔ چندن ساچ
آئزک باشیوس سنگر
نبشتہ کار: چندن ساچ
نبشتہ کار: چندن ساچ
آئزک ءِ سرگْوَستی گدار A young man in search of love کہ مشیر انور ءَ “محبت کا متلاشی ایک نوجوان” ءِ نام ءَ رجانک کرتگ۔ انچیں گِدارے کہ ایشی ءِ وانگ ءِ وھد ءَ دل ءَ بس ھمے لوٹ اتگ کہ واناں بُو، اوشتاں بُو، پدا راہ گران بُو۔
اے گِدار ءِ تہ ءَ یہودیانی دود ءُ ربیدگ، عبادت کنگ ءِ وڑ ءُ پئیم، آ زمانگ ءِ یہودی ورنایانی سیاسی سوچ ءُ پگر، واھشت ءُ واب دراھیں رنگ گندگ بنت۔
یک نبشتہ کارے نبیسگ ءِ بنداتی روچاں چونیں واب گندیت اے گدار ءَ ھمے وابانی گندگ ءِ سپر ھم ھوار اِنت۔ اے گدار ءَ مہر ءُ دوستی ءِ رگام ھم کاینت ءُ رؤ اَنت۔ جاھے جاھے دلپروشی ءِ کوکر ھم سر ءَ کش اَنت۔
یک مردمے کہ کتاب وانیت ءُ پدا کتاب آئی ءِ تہ ءَ چونیں بدلی کار اَنت ءُ آ چے چے جیڑیت۔ اے گدار ءَ آئزک سنگر ءَ وتی ونتگیں کتابانی باروا ھم نبیس اتگ۔ گوں ھدا ءَ آئی ءِ چونیں سیادی یے بوتگ ءُ آئی ءَ چے جیڑتگ۔ اے دراھیں ھیال ءُ جیڑگ آئی ءَ وتی کلم ءِ ساھگ ءَ آؤرتگ ءُ نبیس اتگ انت۔
من کہ اے گدار ءَ وانگ ءَ بوتگاں، اے گدار منی ھمراہ بوتگ۔ چش اے گدار من یکیں بیل ءَ ھلاس کرتگ ات بلئے من پمیشکا ھلاس نہ کرت کہ اِے گدار ءِ لذت ءَ بگراں۔ کمو ونتگ ڈن ءَ در کپتگاں، دریا چارِتگ، بالی مُرگ چارِتگ اَنت۔ دمکاں شتگ ءُ لیب کنوکیں گونڈو چارتگ اَنت۔ وتی گْوَست یات کرتگ۔ آزمانکے ءُ کسہے جیڑِتگ۔ وابے دیستگ۔ گوں وتی جند ءَ دوچار کپگ ءِ جہد کرتگ۔ کند اتگ، ملور بوتگاں۔ داں کہ اے گدار آسر بوتگ۔ دل ھمے سکین ءَ دئیگ ءَ اِنت کہ اے گدار یکرندے پدا ترا وانگی اِنت۔
اے گدار ءَ وڑ وڑیں کارست دوچار کپ انت۔ بچار یک پیریں یہودی یے چوں تران کنت۔
“جنکے ءَ اگاں ناچ ءِ شوک اِنت اے چشیں مزنیں جیڑھے نہ انت۔ ناچ بکنت، بلئے ھر چیز پہ کیائدگ ءُ کساس شر اِنت۔ ھر چیز ءَ ھَدّے است۔ یک انچیں پدریچے اتکگ کہ اِے ھدّ نہ منّیت۔ آ یکیں گِین ءَ دراھیں وشی ءُ لذتاں گرگ لوٹیت ءُ اگاں تو بگوش ئِے کہ چش مکن۔ انچو تئی جنئگ ءَ پاد کیت۔ گمان بیت پُورا ھمے دمان ءَ ترا وارت ءُ پِلکّیت”
اے گدار ءِ تہ ءَ مردم دوداں پرشگ ءُ پروشگ ءَ ھم گندیت۔ نبشتہ کار گوشیت کہ من چہ کسانی ءَ ھمے جیڑتگ کہ چہ وت ءَ پیشتر ءِ نبشتہ کارانی راہ ءَ نہ رواں۔ ھما چیزاں نبیساں کہ مئے نبشتہ کار آیاں دلگوش نہ دئینت۔ ھما کہ اسل اِنت، ھما کہ راستی انت، ھما نبیسگی انت۔
چہ ھمد ءَ راہ گیش اَنت۔ چہ ھمد ءَ نوکیں در پچ بنت۔ چہ ھمد ءَ نوکیں سپرے ءِ بنگیج بیت۔
چندن ساچ
22 اپریل 2023
گْوادر