پراز نور ءِ رملچہ : دْریگتیں در ملک ءَ مہ نشتین ئے
رملچہ : دْریگتیں در ملک ءَ مہ نشتین ئے
(پراز نور)
دْریگتیں در ملک ءَ مہ نشتین ئے
وتی گلزمین ءَ بہ نِشتین ءُ مہ تتکین ئے
لگور بوت ئے ءُ یل کُت
مِسک ءُ مھلب ءُ بو
ءُ دُناں آتاریں ھنکین
مرچی لگتمال اِنت ءُ
ھون ءِ ھار اِنت ھر نیمگ ءَ
آہ ءُ زاری اِنت ءُ بزّگی واری اِنت
مانداشتگ اَنت گِس، کبل اَنت وانگجاہ
پیر مرد ءِ آسرا ءُ پیری ءِ لٹّ
پلگ بُوتگ برگ بوُتگ
تو سھیگ ئے ؟؟؟
دْریگتیں راج ءِ گم بہ مار اِتین ئے
وتی گلزمین ءَ بہ کپتین ءُ بہ مُرتین ئے
درملک ءَ نشتگ ئے
وشّیانی تہ ءَ لیب ءَ ئے
نہ مار ئے درد ءُ گماں راج ءِ
نہ جیڑ ئے پہ بزّگیں راج ءَ
مئے ڈیھہ ءِ ھمک پُسگ
برگ بوتگ جَنَگ بوتگ
ءُ لھتے ماں زندان ءَ
بندیگ کنگ بوتگ
لھتے مئے ورناہ
بیگواہ کنگ بوتگ
تو سھیگ ئے ؟؟؟
دْریگتیں مہ رپتین ئے
دری ملک ءَ مہ کپتین ئے
وتی دود ءُ ربیدگ
تو پھک ءَ شموشت اَنت
دری راج ءِ گلامی
وتی گُٹّ ءَ کُتگ لوپ
برگشتگ ئے انچوش
تو دین ءُ ھدا نئیشت
ماسومیں پرشتگ
پیگمبر ءُ مھتر
رد ءُ بد کُت اَنت زالم
کن ئے گانڈ ءُ گلامی
درملکی تو راج ءِ
گُپتار تئی دگر اَنت
کِردار تئی دگر اَنت
دْریگتیں وتی وتن پھاز اتین ئے
دریگتیں بلوچ راج بہ چار اتین ئے
دْریگتیں در ملک مہ نشتین ئے
وتی گلزمین ءَ بہ نِشتین ءُ مہ تتکین ئے