مصر ءِ سپر۔ پنچمی بھر۔ انجنئیر الطاف بلوچ
مصر۔ پنچمی بَھر۔
انجنئیر الطاف بلوچ
انجنئیر الطاف بلوچ
دبئی بالی پٹ گشے زروان ئے ببیت چاریں نیمگا چّماں شانک دے جہاز انت کہ لِچتگ انت۔
چونا دبئی ءَ بالی پٹ سہ انت ٹرمنل ون، ٹرمینل ٹو ءُ تھری بلکہ چار
کہ یکیں شھر ءَ ڈن انت بزاں المکتوم بالی پٹ۔
ٹرمینل ون ءَ ایندگہ ملکی ءُ کسانیں گراب کاہنت، ٹو ءَ در مُلکی مزنے ءُ ٹرمینل تھری تہنا امارت ائیر لائن ءِ گرابانی ھاترا انت،
نچو گشاں کہ دبئی ءِ بالی پٹ نہمی میان استمانی رش تریں بالی پٹ انت، ءُ مزنے بہرے کارگوئے ھاترا ھم کارمرز بیت۔
دنیا ئے مستریں جہاز بزاں Airbus 380 ھو Boing 777 بال کننت ءُ ایر دینت۔
ٹرمینل تری دنیا ئے دوہمی دراج تریں ائیرپورٹ ئے ماڈی انت کہ کساس یک کلومیٹرے تہنا ایشی دراجی انت کہ دبئی ءِ تہا مک انت۔
ٹرمینل تری تہنا امارات ئے بالی گراب ءُ مساپرانی ھاترا کارمرز بیت۔
کلیں دنیا ءَ مساپرئے کہ امارات ائرلائن ءَ سوار بیت یکبرے الم دبئی ءَ کیت، نو پدا وتی دیمتری سپر ءَ روت۔
ٹرمینل تھری ئے ڈیوٹی فری شاپ چہ شراب، چاکلیٹ ءُ سینٹ ءُ وشبو ءُ ایندگہ ساماناں انچو پُر انت گشے نیادی ببنت۔
چونا عرب امارت ءِ ہفت ریاست انت، دبئی تر ءُ گرد ءُ بیپار ئے بنجل انت۔
ایندگہ ریاستانی ھم جندے ائیر لائن استاں چوں کہ ابودبئی ءُ شارجہ ئے بلے آ چو دبئی ءِ امارات ائیر لائن ءَ نامدار نہ ینت۔
پاکستانی انچو گشاں کہ امارات ائرلائن کمپنی پی ائی ائے ٹیکنیکل مردماں ہفتاد ءِ دک ءَ ٹاہنتگ دبئی ءِ شخ ءَ را داتگ ءُ وتی وھداں پی ائی اے ءَ بالی گراب ھم وام داتگ انت،
چوناہا ضیاہ الحق ئے دور ءَ پیسر گیشتر جہاز کہ مئے ہنداں گوستگ روس، چین ءَ ذیندگہ ہنداں شتگ انت الم کراچی بالی پٹ ءَ پہ تیل ءُ آپ ءَ داشتگے، نو ہمک ادارھانی وڈا پی ائی ائے ھم پنڈگے سرا انت، بالی پٹ انچو ابیتک انت گشے جنوزام ببنت،
دوہمی نیمگا دبئی ءِ شیخ محمد ریکانی تہا دنیا ئے مستریں بیپاری بنجل چست کتگ۔
سہ ءُ نیم کلاک چوں گوست اچ سما نہ بوت۔
مئے دوہمی جہاز گیٹ نمبر سی ءُ دو ءَ کائرو ءَ روگے ھاترا ساڈی ات
کساس سہ ءُ نیم کلاک ئے بال ءَ پد مئے جہاز ءّ کائرو بالی پٹ ءَ ایر دات۔
جہازے گیشتر مساپر ریٹارئرڈ انگریز اتاں کہ ریٹائرمنٹ ءَ پد گوں وتی ڈِییک ءَ فرعونانی مصر ئے تر ءُ گرد ءَ روگا اتاں۔
بالی پٹ چہ پنڈی بالی پٹ ئے کلنڈیں بالی پٹ ءَ مستر ات بلے دبئی ءِ ھساب ءَ سک کسان ات۔
من وتی ایمیگریشن کُت ڈن ءَ در اتکو۔
منی گمان ات کہ یکیں بلکہ منی نام ئے نیم پلیٹے گون ئے منا زوریت لوگ ءَ روت۔
بلے کس نیست ات۔
نو منا نہ فون گون نہ انٹرنیٹ کہ آفس والہاں جست بکنی کہ منی رندا شُمے کے راہ داتگ۔
بازیں وھداں کہ من کس نہ دیست گڑا ائیرپورٹ ئے کاردارے جُست کُت کہ شمے بالی پٹ ءَ انٹرنیٹ ئے آسراتی است؟
منا ھال ئے دات کہ کمو دیم ءَ برو جہلی پدیانک کہ جہل ءَ بزاں گراونڈ فلور ءَ روگا انت ہمودا بچار یک انٹرنیٹ کیفے ئے است۔ اگاں پچ انت گڑا بلکہ تئی کار بیت۔
من وتی سامان تیلانک دیان وت ءَ گوشتگیں جاگہ ءَ سر کت۔
انٹرنیٹ کیفے پچ ات، من نشت وتی لندن والا کمپنی یک ای میلے کُت کہ من بالی پٹ ءَ کپتگوں کس منی دیما نہ اتکگ۔
کائرو ءُ لندن ءِ ٹیم یک انت، منا منی مردم ءَ پسو دات کہ کمو سبر کن من جست کنی چیا کس نیتکگ۔
کساس دھ منٹ نہ گوست کیفے ءَ بُرز ءُ بارگیں مردے پترت۔
گشی التاپ کے انت۔
من پاد اتک گشت منوں،
گشی من تئی ڈرائیور مھمد اوں۔
تئی ودار ءَ بوتگو بلے پارکنگ ءَ واب کپتگوں۔
روان انت۔