مصر۔ چارمی بہر۔انجنئیر الطاف حسین بلوچ
مصر۔ چارمی بہر۔
انجنئیر الطاف حسین بلوچ
اسلام آباد ملک او روچ ئے نہیے، شوم ءَ آھگے شرت ءَ منا پولین الرجی دات دُرسیں پلان سر ءُ چیر بوت انت۔
پٓشانک ات ھوٹل ات ءُ من اتو،
ڈنا روگی نہ بوتوں۔
آ دوراں فیس بک ءُ ایندگہ سوشل میڈیا نیست ات سوشل میڈیا ءَ تہنا Orkut ات منا ہمودا لہتیں (ھاصیں) سنگت است ات تیوگیں وکت گوں ہماہاں گپ ءُ تران ات۔
دو روچ انچو گوست سہمی روچ ءَ ایمبیسی والہاں منا فون کت کہ بیا تئی ویزہ جتگ پاسپورٹ ءَ بزور۔
من وتی ویزہ ءِ ھال وتی کمپنی ءَ را دات، ءُ ویزہے عکس ھم دیم دات بیگاہ ءَ تک منی ٹکٹ بوتگ ات۔
پنچمی سہب ءَ مہلہ چار بج ءَ منی جہاز ات۔
اے جہاز پنڈی بالی پٹ ءَ پہ دبئی ءِ ھاترا چست بیت، دبئی بالی پٹ ء٘ کساس چار کلاک ئے اوشتے کنت،
پدا دگے گرابے ایندگہ ہند ءُ دمگانی مساپراں زوریت دیم پہ قائرو ءَ روت۔
من کساس دوازدہ بج ءَ ھوٹل چیک آوٹ کت ءُ پنڈی ءِ بالی پٹ ءَ وت ءَ سر کُت۔
منی اولی در ملکی سپر ات من اچ زانگ ءَ نہ اتو کہ بالی پٹ ءَ چے کنگی انت۔
بلے وھدے من بالی پٹ ءَ سر بوتوں بورڈ لگوک اتاں کہ گُرابانی ٹیم ءُ بورڈنگ ئے وکت ءُ پاس نبشتہ اتاں۔
مئے جہازے بورڈنگ انگت بندات نہ بوتگ ات۔
من بالی پٹ ئے ڈن ءَ نشت وتی ڈائری نبشتہ کنگ بندات کت۔
ھرچی کہ سر گوست ات من تاکانی سرا کت انت دانکہ مئے گراب ءِ بورڈنگ ءِ وکت اتک،
من بورڈنگ کُت، بورڈنگ ءَ پد لاونج ءَروگے وکت ءَ منا ایف ائی اے والہاں توار کُت۔
کسانیں کوٹی ئے ءَ اپسرے گوں کُرنگاں چوں ھاکماں نِشتگ ات۔
منا نادینتے۔
گشی چیا رَوگائے؟
من وتی پسو داتاں کہ چیا رَوَگا اوں بلے گشے باورے نہ بوگا ات کہ بلوچستان ءِ پدمنتگیں ہند مکرانے انجئینرے چوں مصر ءَ پہ ٹیکنیکل کار ءَ شت کنت، منا اے گپ پیسرا ھم یک فوجی ئے ءَ کہوٹہ ءَ جُست کتگ ات کہ ما وارد پروجیکٹ ءِ ھاترا کہوٹہ شھر ءَ رَوگا اتاں۔
گشی ” بلوچی بھائی اتنے دور کام کرنے آئے ہو؟”
گُشے باورے بوگا نہ ات کہ بلوچے چوں مئے ہنداں اتکگ۔
من ہمیں سپاہی گشت ما اے جست شمارا نہ کتگ کہ مئے کوہ ءُ جبلاں شما اتگے کہ اچ نیست شمے وا انگت شھراں ھرکس اتک کنت۔
رندا پشل پشل گشی “مجھے خوشی ہوئی ہے بلوچ بھائی”
بالی پٹ ءِ ایف ائی اے والا منا یلہ دیگے وڈا نہ ات، باریں شک ات کہ من دروگ بندگا اوں (آ دوراں پہ بلوچاں جاور چوں نہ یتاں) یا زر لوٹگا اتاں ھُدا بزانت۔
بازیں جُست ءُ پرساں پد منا ایشاں کلئیر کت۔
من وتی کار ٹہنتاں وھدے اتکوں بالی پٹ ئے ابیتکیں لاونج ءَ نِشتوں ڈائری ءَ دُرس نبشہ کت انت (رند ءَ یک سالے ہمیں ڈائری ءَ منا کراچی بالی پٹ ءَ پدا زلیل کناہنت کہ من ایف آئی اے والا سک ڈوبارتگ اتاں).
آکر کار مئے جہاز بال ات دیم پہ دبئ ءَ۔
دُرسے مساپر دگے دگے ملکاں روگا اتاں کہ دبئی بالی پٹ ءَ ایشانی ملکانی جہاز بھر باں۔
گیشتر مساپر آزاد کشمیر ئے میرپوری ات انت کہ انگلستان ءَ رَوگا اتاں۔
میرپور آزاد کشمیر ءُ جہلم ئے کساس شست درسد ءُ برز مردم انگلستان ءِ انوگیں جہمند انت۔
ایشی سوب منگلہ ڈیم انت۔
نوزدہ سد ءُ ششت ءَ کہ پاکستان منگلہ ڈیم ءِ بندگ ءَ بندات کنت گڑا بازیں مردمے اسر مند بیت ہمے دورے پاکستانی ھکومتءُ ایشانی زامن انگلینڈ بیت ءُ مردمانا اے آپشن ءَ دنت کہ اگاں آ ملام ءُ زر زورنت یا انگلستان ءَ آھگ لوٹنت، دُرسیں مردم سوگا بنت کساس دُرس انگلستان ءَ رَونت مرچی میرپور لٹل لندن زانگ بیت ءُ
برھمنگم، لیڈز، بریڈفورڈ، مانچسٹر ءُ بازیں انگلستانی ایندگہ میتگ لٹل میرپور زانگ بنت۔،
چوناہا نوزدہ سد ءُ ہفتاد ءَ تک یورپ ءُ انگلستان پچ بوتگ مئے پیرین امارت ءُ مزن ھور ءَ اتکگ انت دیمے روگے تپ بوتگ۔
ما میرپور ءَ شتگ اتاں منا باور نہ بوت کہ اے پاکستان انت، مزن مزنے ماڈی انت کہ ھالیگ انت گران کیمتی گاڈی انت کہ ترگا انت۔
انچو گمان بیت گشے یورپ یا انگلستان ءَ ترگا ائے۔
مزنیں ماڈی جوڈ کتگ انت بلے کس تہا نہ انت انچو گشاں کہ بس زمستان ءَ کاہنت ایندگہ وھداں کس نیست۔
دبئ بالی پٹ ءَ جہاز ءَ ایر دات۔
دگے دنیائیں ات، چُشے جاگہ من اولی براں گندگا اتو،
مئے بالی گراب ٹرمینل سہ ءَ ایر کپت۔
بالی پٹ انچو مزن ات، تہا ڈیوٹی فری شاپ گشے نیادی ببنت، سہب ءِ سرا یورپ ءُ ایندگہ ملکانی مساپر سر ءُ چک ات انت
کسی کسی سُد ءَ نہ ات، کسے زمین ءِ سرا تچک ات، کسے کرسیانی سرا، کاڈانی زیبائی ات کہ چہ کد ءُ سیمسراں سرگوستگ ات۔
بالی پٹ گشی یورپ، ایشیاہ ءُ روس ببیت، وڈ وڈیں مردم، وڈ وڈیں چھرگ، وڈ وڈیں پوشاک، کسے پینٹ انت، کسے اسکرٹ، کسے دگے ڈولے ات۔
چم ات انت کہ تچگ ءَ ات انت بلے زیبائی ات کہ کُٹگ ئے نام ءَ زانگ ءَ نہ ات۔
ھود ءُ سینٹانی بوہ ات کہ چار کنڈ تالان ات زِرد ءَ تاہر بکشاھگ ءَ ات۔
چار کلاک گوازینگی ات سک کم ات۔
من تیوگیں شپ واب نہ بوتگ اتوں بلے بالی پٹ ءُ گرابے تہے تُرند آپ ءُ ندارگاں چُمانی وب چٹ گار کتگ ات۔
روان انت۔