کیوبا (اسپینش کوبا) ءَ ما چے دیست۔یازدھُمی ءُ گُڈی بھر۔
کیوبا (اسپینش کوبا) ءَ ما چے دیست۔
یازدھُمی ءُ گُڈی بھر۔
نبشتہ کار: انجنئیر الطاف حسین بلوچ
نبشتہ کار: انجنئیر الطاف حسین بلوچ
ما داں دیراں کلات دیمءَ کت سِیگار کشت، نشت زرے ندارگ چارت، کہ دری دُز ءُ ڈُھنگ ءِ کیوبا ءِ راھے پیش داشتگ انگت ھما داب ءَ چول، چولءِ سرا کپگ ءُ پروشگ ءَ اتاں۔
تیاب دپی گیشتر کہُنیں ماڑی زر گوات ءَ پروشتگ انت ڈھرتگ انت۔
انچو سما بیت کہ مزنے جنگے بوتگ، ءُ بمب ءُ توپاں پروشتگ انت۔
بلے پدا یکیں گشگءَ ات کہ وت ڈھرتگ انت ءَ پدءَ مردمانی کرا ازباب ءُ زر نہ بوتگ کہ دوار بندگ بہ بنت گڑا ھمیں پیم مک انت۔
تیاب ءِ دپءِ دگ پراہ ات بلے گیشیں گاڈی نیست ات، کزا کزا یک گاڈی یےگوزگءَ ات، چونا ھمک ملک کہ فرانس یا اسپین ءِ کالونی بوتگ دگ ءُ راہ پراہ جوڑ کنگ بوتگ انت۔
سبارگ ءِ وھد بوگءَ ات ءُ گژن گشئے گیش بوان ات۔
کیوبا ءَ وتی مردمانی آسراتی ءِ ھاترا سرکاری ریستوران پچ کتگ انت، سرکاری ٹرانسپورٹ ءِ اسراتی ھم است ، ھندی مردمانیءُ ٹورسٹ کارمرز بکن انت ارزان انت۔
پیٹرول ھم ارزانیں نیاداں سرکار دنت، جان سلامتی، وانگ ءُ زانگ ھم پہ مھلونک ءَ ارزان انت ہمیں ھاترا کساس نود ءُ پنچ درصد مھلونک واندگ انت، ءُ کیوبا ئے ڈاکٹر کلیں دنیا ءَ نام در آرگا انت۔ ( ہمیں ھاترا دنیا ءَ کجام ھم ملک ءَ ھوپ ءُ ویل ئے بکپی کیوبا ءِ ڈاکٹر وت ءَ سر کن انت)
شھر ءَ دُزی ءُ ڈُنگی ایندگہ امریکی ملکانی ھساب ءَ سک کم انت۔
بلے واجہ امریکہ ءَ کہ نہ مَنے گڑا بزاں بندشانی دیمپان بوگ المی انت،
بندش ءَ نی سوب ءَ کیوبا گشے پنجاہ سال پشت ءَ انت، تہنا کُہنیں گاڈی، ماڈی ءُ انسان انت۔
تیوگیں کیریبن، گوریچانی، زرباری، رودراتکی ءُ نیامی امریکہ ئے بزگ تریں ملکاں چہ یکیں کیوبا انت۔
منی دلا اتک کہ اگاں امریکہ ءُ میان استمانی بندش چہ کیوبا ءَ چست کنگ ببنت یا کیوبا ءِ لیڈرشپ وتی پالسیاں شرتر بکنت دیمترا شریں ٹورسٹ بنجلے بوت کنت، ءُ دیمروی کنگا اچ چک ءُ پد نہ بیت۔
من گورو جُست کت کہ اگاں کلات ءِ چارگ ءَ یا دگے جاگہہ نہ رَونے گڑا بروونے سرکاری ریستوران ءَ ورگے ٹرائی کن ءَ نے۔
جیسز منی گپ گپت گوں آ ھوں گشنگ ات۔
کمو دیراں پد ما کسانیں ریستورانے ءَ نشتگ اتاں کہ سرکار ءَ ھڈ کتگ،
ریستوران ءِ تہہ ساپ ات گیشیں مردم نیست ات، دُرسے ویٹر ءُ کار کنوک سرکاری پوشاک ءَ اتاں کہ مارا وش اھتے کت۔
ورگ ارزان اتاں بلے چو سرکاری ایندگہ ادارھانی چیزانی وڈا تامدار نیات انت، چونا ءَ کیوبا ءَ وردنی ڈنی چیز سک کم انت، ھرچی کہ است گیشتر ملکے جندے وتی جوڈ کتگین انت۔
ورگ ءَ پدا ما ڈن ءَ در اتکاں، کمو کمو ھور شنزگا ات موسم دلکش بوتگ ات۔
مئے دیم ءَ پدا رنگ برنگ ئیں وینٹیج ٹیکسی اتاں کہ مارا ھوٹل ءَ سر کنگے ھاترا اوشتاتگ اتاں۔
ھلاس