ما کیوبا (اسپینش کوبا) ءَ چے دیست؟ نوھمی بَھر
ما کیوبا (اسپینش کوبا) ءَ چے دیست؟ نوھمی بھر۔۔
انجنئیر الطاف حسین بلوچ
انجنئیر الطاف حسین بلوچ
لیڈرشپ اگاں عاقل ببیت لس مھلونکے زندمان آسراتی آں سرریچ بیت، سروک کہ عاقل ءُ وژنری مَباں گڑا لس مھلونکے زندمان بزگ بیت، من زانگ ءَ نہ اتو کہ کیوبا ءِ انکلابی لیڈرشپ عاقل بوتگ کہ نا بلے انوگیں دوراں کیوبا ءَ رنگ برنگیں کلاسک گاڈی، اسپین ءِ دورے ماڈی، سگار، رَم ءُ کمیونزم ءَ ابید اچ نہ نیست، (نو وانگ ءُ زانگ ءُ جان سلامتی ءِ پڑءَ دیمروی کنگا انت)
ادا یک درورے کتاب Whay Nation fails ءِ تہا انت کہ یکیں نسل ءِ مھلونک دو ملکانی سیمسراں بھر بباں چو کہ میکسیکو امریکہ ءِ اسٹیٹ ءُ میکسیکو ملک گڑا میکسیکو امریکہ ءِ مردم گیشتر وشھال تر انت، عمر ایش گیش انت ءُ ایندگہ بنکی انسانی جنجالے ایش کم انت۔
ایشی سوب ملکی ءُ لیڈرشپے جوڑ کتگیں پالیسی انت، انچو کہ گلف ءَ سعودی عرب ءُ مشکت ءِ بگل ءَ یمن انت، بلے یمن ءِ لیڈرشپ عاقل نہ انت مھلونک بزگ انت۔
افریکہ تیوگا ھمیں پیم انت، لیتن امریکہ ءَ برازیل ءُ پانامہ ءَ کش ایندگہ دُرسے ملک ءُ زروان ہمیں پیم انت۔
بلے ایندگہ ملکانی نادراہی گیشتر کرپشن انت، کیوبا چرے نادراہی ءَ چہ کمو رکیتگ، بلے اگاں تو کرپٹ ئے یا نا بلے تئی مھلونک بزگ انت دوہنانی ھساب یک۔
گڑا سگارے ببیت؟ گورو منا جست کت۔
بلے۔
ما دیم دات کافی شاپے ءَ کہ سِگار ھم بھا بوگا ات۔
کیوبن سگار کُلیں جہان ءَ نامدار ءُ گران کیمت انت۔
مرد ءَ مارا سگارے سگارے دات۔
گورو بئیرے آرڈر کُت۔
من شکر کانڈیلے جوسیں کہ مشین لگوک ات۔
گوروو کافی ائے۔
سگار ما روک کُت۔
مئے کرسی انچیں جاگہہ لگوک اتاں کہ کہ دیم ءَ زر زاہر ات ءُ زرے کش ءَ Castillo De Los Tres Reyes Del Morro ءِ کلات ھم۔
اے کلات 1589 ءَ اسپین ءِ دوراں ھڈ کنگ بوتگ دانکہ ایندگہ دری قبضہ گیر دارگ بباں، بزاں اسپین ءَ بستگ کہ دری دز ءُ ڈھنگ، فرانس، برتانیا ءُ پرتگال دارگ ببنت۔
بلے 1768 ءَ برتانیا جورج کیپل ءِ سروکی ءَ اے کلات ءَ گیپت، برتانیا ءِ دوراں انچو گشاں کہ Havana امریکی ہندے سہمی مستریں دیمروی کنوکیں شھر بیت کہ شکر ءُ سگار ءِ بہائے بنجل بیت۔
بلے اے قبضہ دیراں برجا نہ مانیت ءُ سالے پد پیرس ٹریٹی بیت ءُ کلات دوار اسپین ءَ دیگ بیت بلے ایشی بدل ءَ انوگیں امریکی اسٹیٹ فلورڈا برتانیا ءَ را دیگ بیت۔۔
مئے دیما لہتیں عجبیں رکشہ اوشتاتگ ات کہ دگے وڈ اتاں، یک بسے اتک کہ دو تَبک ات Havana ٹورسٹ نبشتہ ات۔
ایندگہ ندارگ دُرس ہما رنگ برنگیں ٹیکسی اتاں کہ کیوبا ئے پجار جوڈ بوتگ انت۔
من جیسز جست کت کہ شمے ملک وینیزویلا چونے؟
برباد،
آئی دپ ءَ بس ہمیں برباد در اتک۔
بزاں روس ءِ سنگت کیوبا ءُ امریکہ ئے سنگت وینیزویلا دوہیں یک ھساب انت۔
یکیں وتی منَا چٹ آزات انت یکیں بندشانی دیمپان انت۔۔۔
روان انت۔