منی مردم زندگ مان اَنت (نھمی بھر) .
منی مردم زندگ مان اَنت (نھمی بھر). لیلہ ھالد ءِ سر گْوست
رجانکار : سرباز وپا
پہ آشوب ءِ سرد کنگ ءُ چَہ اَرَب ءِ مڈّیاں وتی دنتانانی تراسگ ءُ دیمپانی جیڑھانی شر کنگءَ اسرائیل ءِ واھُند، ارواہ ءُ پھازدار امریکہ ءَ 1950 ءِ بنداتءَ ھمے ھند ءَ نیٹو لشکریانی پُرکار کنگ بنگیج کرتگ۔ ڈلز ءَ مارچ 1953 ءَ روکپتی میان ءَ ترّ ءُ گرد کرتگ۔ ڈلز ءِ شوربندی ھمیش اَت کہ ما کمیونسٹانی پھریزگ ءُ آجوئیں جھان ءِ آجوئیں جھمنند سرجمیں جھان ءَ آجو بہ بنت۔ پمشکا یک نیمگےءَ نیٹو پُرکار اَت ءُ دومی نیمگءَ اَرب اسرائیل ءِ جیڑہ ءِ ھلاس کنگ ءِ ھمے جُھدءَ اَت روکپتی زورگر ءِ بادشاھی تیوگیں ھندءَ برجاہ اَت۔
ڈلز ءِ اے جُھد ءِ پسّو مئے کُٹم ءِ نیمگءَ نیستیءِ وڑءَ اَت۔ دُرسیں بھرگ اِے گپ ءَ چاڑ اِت کہ ڈلز ءِ شوربندیءَ بے سوب بہ کن اِیں۔ بیروت زانشتجاہ بنجاہ جوڑ بوتگ اَت، چَہ ورنایانی نیمگءَ ارب یوتھ موومنٹ ءِ نامءَ یک آجوئی ءِ جنزے بنگیج بوت۔ اِے ورنایاں سِلاہ بندیں لشکری گلانی کتار پروشت اَنت ءِ دیم ءَ شُت ءُ زورگری مردگ بات ءِ اُوگام جت ءُ ڈلز ءِ نیمگ ءَ روگ ءَ لگ اِت اَنت۔ درزنانی کچ ءَ نودربر گرگ بوت ءُ سدانی کَچ ءَ نودربر ھسپاں لپاشت اَنت۔ ھمے زھرشانی ءَ منی بْرات مھمد ھم گون اَت وھدے آ واتر گِس ءَ آتک گڑا زھرشانی ءِ درسیں ھال ءِ دات اَنت۔ اے وَھدءَ درسیں ڈیھ زھرءَ اَت، مئے وتی سپاھیگاں وتی ورنا لپاشت اَنت۔
جلتی ءَ تیل ءِ کار بیروت زانشتجاہ ءَ چَہ ھسن ابو اسماھیل ءِ کوش ءَ پد دیم ءَ آتک۔ نوں مردم امریکہ ءِ بھر ءُ بگداد ءِ بزانتءَ زانگ ءَ ات اَنت۔ انوں پَہ مئے مردمانی زوراکی ءِ آماچ کنگ ءَ بگداد پیکٹ ءِ وڑ ءَ موکوی دامے مئے سر ءَ بندگ ءَ اِت اَنت۔ ھسن ءِ کوش ھم گیشتر ناھک اَت کہ اول کوش بیروت زانشتجاہ ءِ دیم ءَ بوت۔ دومی گپّ ایش اَت کہ بیروت زانشتجاہ ءِ واکدار ایوک ءَ زھرشانی ءِ رجسٹر کنگ ءَ منّگ ءَ نہ اِت اَنت۔ نوں مردمان ءَ روکپتی راجمستری ادارھانی جْوانیں دروشم ءُ آیانی سْیاسی کرد شریں وڑے ءَ پدر بیگ بندات بوت ءُ دیم ءَ آتک۔ پنجاھمی دھک ءِ کِسّہ وتی گُڈّی ءَ سر اَت کہ سوئیز ءِ جنگ بزاں 1956 ءَ سر بوت۔ برتانیہ ءُ پرانس ءَ چہ اسرائیل ءِ کُمک ءَ مِسر ءِ سر ءَ پمشکا اُرش کرت کہ ناسر ءَ گسر بہ کناں ءُ اربانی سر ءَ گندگ ءَ یک پُرایمنیں شوربندی ءِ بہ لڈاں۔
25 مئی 1950 ءِ ھما جار کہ چہ آئی ءَ سَے مزنیں توانمند برتانیہ، پرانس ءُ امریکہ ءَ روکپت ءِ درمیانی ڈیھانی سْیاست ءُ ھندی سلامتی ءِ مانزمانی داتگ ءُ ھمے گْوشتگ اگاں کسےءَ چونیں تُوپان، اُرش یا اڑےءَ گپت آئی ءِ کُمک کنگی اِنت۔
اے جار ءِ بگیریءَ تچکیءَ دو مزنیں توانمند برتانیا، پرانس ءُ امریکا چَہ اسرائیل ءِ نیمگءَ کنگءَ اِنت۔ چَہ اے دوئیں کردانی سوب ءَ دُرسیں ارب ڈیھ امریکی مرگ ءِ پرّانی چیر ءَ چیر بیوکیں چورک نہ بوت اَنت۔ بلکیں تچکیءَ جتا بوھان بوت اَنت۔ ناسر ءِ نیمگ ءَ سرجھل کنوک آشوب دُژمن لیکگ بوت اَنت۔
ما دُرس ڈلز، میکمیلن، بن گوریون ءُ موشے دایان ءِ منتوارایں کہ چہ آیانی پندلانی سوب ءَ ما سْیاسی رِد ءَ مھکم بوت ایں۔ اے دوتل پوستی ءُ دو سریں شوربندیاں مارا پَہ چاگردی بنیاد ءِ پَٹپول کنگ ءَ لاچار کرت۔ نوں اربانی تَہ ءَ دُژمن ءُ دوستانی گونءَ روشت دارگ ءِ سرپدی آتکگ۔
روان اِنت ۔۔۔۔۔۔۔۔۔۔۔۔۔۔