منی مردم زندگ مان اَنت ( دھمی بھر ) لیلہ ھالد ءِ سر گْوست
منی مردم زندگ مان اَنت ( دھمی بھر ) لیلہ ھالد ءِ سر گْوست
رجانکار: سرباز وپاؔ
“وانگ ءُ آشوب”
“وانگ ءُ آشوب”
“مردم آجوئیءَ ودی بیت، بلے ھر نیمگءَ آ بندیگ اِنت”(روسو)
اَرب نیشنلسٹ موومنٹءِ باسکی ءِ بستارءَ منءَ پَہ گْوست، انوگ ءُ باندات ءِ بابتءَ سرپد بیگءَ باز ھیل داتگ۔ پدمنتگیں چاگرد ءُ مردمانی گیش انوگ ءُ باندءَ سرپد بیگ ءِ سماءَ نہ دارآں، بلے انچو سرپدی ءِ دارگ ھژدری اِنت کہ مارا وتی چاگرد ءُ وتی زندمان ءِ شر کنگءَ جُھد کنگ لوٹ اِیت۔
دانکہ ما گْوست ءِ نِزوریانی نیمگ ءَ مہ رَو اِیں ءُ مچارایں چَہ اے رَد پھمی ءُ نزوریں لیکھانی واھشتاں وتءَ کش اِت نَہ کن اِیں دانکہ آجوئیں زانت ءُ زانگے مئے راھشونیءَ مہ کنت۔ گڑا پدمنتگیں مردم بھت ءِ سرءَ بیسّہ کنت ءُ چَہ بھتءَ وارت ءُ وتی زند ءَ گوازین اِیت۔ آ ھمے بُنیادءَ گوست ءِ گپّءَ کنت ءُ گْوَستءَ یات کنت۔
منی راج ءُ من وت ھم، ھمے نزوریانی آماچ اِیں بلے ما گْوستانک ءِ ھمے جنجال ءِ بھر اِیں کہ مئے توان یا نادلگوشی پَہ مئے آؤکیں بانداتءَ جنجالے جوڑ بیت۔ پمشکا گھترھمیش اِنت کہ وتی پدمنتگیں گْوَستءِ رندگیری کنگءَ اَبید ما پَہ وتی بانداتءِ باروءَ بِہ جیڑ اِیں۔
زورگر ءُ یھودیانی پلستین ءِ دستیگ کنگ ءِ یک مولے ایش ھم بوت کنت کہ ما نوکیں وڑے ءَ وتی ءُ وتی چاگرد ءِ بنیاد ءَ شر بہ کن اِیں ءُ بہ پولیں۔
وھدے کہ ما چار اِت ءُ سرپد بوت اِیں کہ مئے چاگرد کْوھن ءُ پدمنتگ دوستے بوتگ، مئے پروش ھم پما پنتے بوتگ کہ آ مارا مئے ردی ءُ نزوریانی سرءَ جیڑگ ءُ وتءَ پَہ نوکیں سوشلسٹ راجمستری ءِ دیمءَ آرگءَ کردی گامگیج زورگءَ پرمان ءَ کنگ بوتگ۔ مارا اِے زُوراکیءِ بگیریءَ جنگ کنگی اِنت یا پشت دَیگی اِنت۔ اگاں ما جنگ کن اِیں گڑا مارا کوھاں، دھکانانی کُڈکان ءُ شھرءِ ھرابیں میتگانی نیمگءَ روگی اِنت۔
اگاں ما جنگ ءِ منّگ ءَ جاڑیگ نہ اِیں گڑا ما یھودی بادشاھی ءِ چیردستیءَ گندگءَ سکا وشیں زندمانے گْوازینت کن اِیں ءُ وتی وشھالی ءِ کَچ ءُ کساسءَ چِہ گْوَستگیں سالانی ھسابءَ موشےدایان ءِ دورءَ باز گھتریءِ وشیں ھالے جھان ءَ گوش دارینت کن ایں۔
ما پَہ وتی دلبڈی دیگءَ اِے ھم گوشت کن اِیں کہ نوں ما ایمن ءُ پُر تاھیرایں ءُ موشے دایان جے ءِ بلڈوزرانی کانود چَہ ھسین ءُ بودین ءِ ریجمنٹ ءِ ھسابءَ گیش راجمستری ءُ ارزانی اِنت۔
ما پَہ وتی دلبڈی دیگءَ اِے ھم گوشت کن اِیں کہ نوں ما ایمن ءُ پُر تاھیرایں ءُ موشے دایان جے ءِ بلڈوزرانی کانود چَہ ھسین ءُ بودین ءِ ریجمنٹ ءِ ھسابءَ گیش راجمستری ءُ ارزانی اِنت۔
1955 ءَ من پہ برجاھیں جیڑہ ءِ باندات ءِ شوربندیاں بازیں کچےءَ سرپد بوتگ آں۔ بھارگاہ ءِ موسم ءَ من ءَ بنداتی وانگجاہ ءِ سرٹیپکیٹ رستگ اَت ءُ نوں من ءَ دومی مزن وانگجاہ ءَ روگی اَت۔ منی اُمر یازدہ سال اَت ءُ اسرائیل ءِ امر ھپت سال اَت۔ ما اسرائیل ءِ ودی بیگ ءِ ھپتمی سالروچ ءَ ھم ھمے وڑ ءَ زورگری، یھودی ءُ ارب کوھنگ دوستی ءِ بگیریءَ اوگام جت ءُ درانڈیھی ءِ پُرس داشت ءُ گوازینت۔
اے وھداں اسرائیل ءَ اے ھپت سالاں پہ وتی اندری مُھکمیءَ اپرو ایشائی آبادی یھودیانی گون ءَ یکجاہ گْوازینتگ۔ 1954 ءَ موشے شیریٹ ءَ ایمنی ءِ مزنیں ٹاپار جتگ، بلے یھودیاں کزاکانی سرکار ءِ تھت چپّی کرتگ ءُ بن گیورون ءَ واکدار کرتگ۔
بزاں شیریٹ چہ کشگ ءَ پیش یھودی سرکار ءِ ڈپلومیسی ءِ گْوَستانک ءِ یک باز تُرسانکیں شوربندی یے ءِ رد ءَ کار کنگ ءَ اَت۔ اے شوربندی ءِ نام” لیون اپئیر” ءُ ایشی مول ھمیش اَت کہ مسر ءَ برجاھیں امریکی ءُ برتانوی سپارتجاہ ءُ روکپتی دیمپانی نپان بمب ایر بہ کناں ءُ تباہ بہ بنت دانکہ مسر ءِ سرکار نزور ءُ ترس آماچ بہ بیت، اسرائیل ءِ جاہ دیوک ھمے وڑ ءَ مھکم بہ بنت ءُ چہ سوڈان ءَ وتی لشکر ءَ واتر مہ کش اَنت۔ اسرائیلیانی ھیال ھمیش اَت کہ آ اے شوربندی ءِ سان ءَ مسریانی سر ءَ دور دے اَنت۔ آیانی بد بھتی ھمے بوت کہ گوں رنگیں دستاں گرگ بوت اَنت۔ شوربندی پدّر بوت ءُ ” لیون اپئیر” ءَ اسرائیل ءِ سْیاست داں دہ سالاں پشت ءَ دور دات۔
اسرائیل ءِ گیش دوستی ءِ بندات چہ 1949 ءِ روڈز کول ءِ رد ءَ درلشکری ھندانی نیمگ ءَ وتی دستاں دراج کنگ ءُ چہ اسرائیل ءَ اربانی مُدام کشگ گندگ بیگ ءَ اَت۔ چہ ایشی ءَ اَبید ھما ارب کہ اسرائیل ءِ تہءَ پشت کپتگ اِت اَنت آیانی تنگ کنگ ءُ گیش دوستی ءَ نوک پولگ ءَ اَت۔ دگہ یک مزنیں وئیلے کہ ارباں بازیں کچے ءَ کشگ ءَ اَت۔ ایشی بندات پازدہ اکتوبر 1952 ءَ بوت کہ اے روچ ءَ موزہ ءَ کیباءِ سر ءَ اُرش کرتگ اَت ءُ 28 پروری 1955 ءَ ھلاس بوت۔
وھدے اسرائیلیاں گزا ءِ سر ءَ اُرش کرتگ، مسر ءِ جوڑ کرتگیں سیمسر پروشتگ اَنت ءُ سد ءُ پنجاہ ءَ گیش مردم جتگ یا ٹپّی کرتگ۔ اے اُرش ءِ سان آیانی لوٹ ءِ رد ءَ نہ بوت، ناسر وتی لشکر پشت ءَ نہ کش اِت بلکیں درسیں ارب لشکر یکجاہ کرت اَنت۔
1955 ءِ بھارگاہ ءِ موسمءَ ناسرءَ وھد ءِ نامداریں سِلاھانی گرگ ءِ کول چیکوسلواکیا ءِ گونءَ کرت۔ ھمے وڑءَ روکپت ءِ اے ایوکی ءِ ھاکمی پروشتگ کہ تھنا روکپت رودرآتکی میان ءَ سلاہ دات کنت، ھمے وڑءَ پین اربزم ءِ زْرمبشت بنگیج بوت۔
روان اِنت۔۔۔۔۔۔۔۔۔