“”یا گوں دِلے بوھیریں ءُ مَنّو گریں گوشدار””۔پیرجان نعیم
“”یا گوں دِلے بوھیریں ءُ مَنّو گریں گوشدار””
“شالءَ نُگرہ بندن سلامت بات”
پیرجان نعیم
دو ھزار بستءُ دو ات گوادر کتاب مراگاہءَ تئی نام یک سیشنےءَ (آ سیشن چُکانی لبزانکءِ سرا )ھوار ات بلے آ سیشن مہتل دارگ بوان ات داں گُڈیءَ سیشن نہ بوت گڑا داد ساہبءَ گشت یار ملا جانی اے سیشن نہ بوت دگہ یک سیشنے است بْیا آئیءَ کمے یات کناںءُ آئیءِ لبزانکی ھزمتءِ بابتءَ چیزئے تران کناں کہ دیمے سیشن منا گون انت آئیءِ سرا باز گپ بوت کنت کہ آئیءَ باز کارءُ ھزمت مئے لبزانکءَ پہ کتگ۔
تئی بوتن روچ ءَ چہ شموشکار نہ اتاں نہ گیگیءَ انچو کتگ ات کہ ھچ نبشتہ کت نہ کنگءَ اتاں۔ بلے بْیا کمے ترا یات کنانءَ تئی بُتن روچءِ درگتءَ چیزئے کسہ آرگءِ جہدءَ کناں۔
تئی گومہ آشنائیءِ کسہءَ کنانءَ بْیا تئی ھما نامداریں شعر کہ نورخانءَ الہان کتگ من آ وھدءَ نزانتگ کہ شعر تئی انت
من مہ باں ھچ مبات قیامت بات
شالءَ نُگرہ بندن سلامت بات
ھو مرچی تئی بزاں بلوچیءِ مزن نامیں پٹءُ پولکار ڈاکٹر فضل خالقءِ بُتن روچ انت۔بے تواریءَ تئی بُتن روچ گوزگءَ انت منی دلءَ ات تئی کتابانی لڑءَ جوڑ کناں ترا بُتن روچءِ مراد بادیءَ دیاں اے ھم گومن بوگءَ نہ ات کہ نہ گیگ اتاں۔ تئی گومہ آژناگ ما یونیورسٹی ءِ زمانگءَ بوتاں تئی کتاب سرجمیں کورسءَ ھوار اتاں گیدی شاعری بہ بیت شر یا کسہی لبزانک بہ بیت شر یا درکسہی لبزانک یا رجانک کاری بہ بیت کہ من ھمے ماراں تئی اولی مہر رجانکاری انت پرچکہ تئی اولی کتاب ھم رجانک ئے۔پٹ پول تئی فیشن انت پرچکہ گیش ھمے تکءَ تو نام کماتگ گیدی لبزانکءِ سرا تئی کرتگیں پٹءُ پولکاری ھمے گش انت کہ اے پڑا تئی مہر گیش انت۔ تئی ھمک کرتگیں کارانی سرا باز گپ بوت کنت بلے اے ردءَ باز وھد در کار بیت۔۔
رجانک:
گچین گنج 1985بلوچی اکیڈمی کوئٹہ
میڈیا 2000 بلوچی اکیڈمی کوئٹہ
کروسیبل 2003بلوچی اکیڈمی کوئٹہ
بادشاہ 2003 بلوچی اکیڈمی کوئٹہ
جوہان 2010 بلوچی اکیڈمی کوئٹہ
ناحداءِ جَن 2012 بلوچی اکیڈمی کوئٹہ
مات 2012 شبعہ بلوچی جامعہ بلوچستان/ایچ ای سی
گُلڑو 2018سنگت اکیڈمی آف سائنسز کوئٹہ
شاعری:
دل گدان 2000 بلوچی اکیڈمی کوئٹہ
کوکر 2003 بلوچی اکیڈمی کوئٹہ
کسہی لبزانک:
ہرساعت چکاس 2005 بلوچی اکیڈمی کوئٹہ
درکسہی لبزانک:
رُستگیں نود 2010 بلوچی اکیڈمی کوئٹہ
ہفت تْلار 2015 بلوچی اکیڈمی کوئٹہ
کوہ بالاد 2020 استین شنگکار کیچ
گیدی شاعری:
بُتکگ انت سنج 2007 بلوچی اکیڈمی کوئٹہ
شیشلو 2021 علم و ادب کراچی
الامو 2021بلوچی اکیڈمی کوئٹہ
اُلس در 2022 بلوچی اکیڈمی کوئٹہ
امبا 2022زند اکیڈمی نوشکی
لیلو لیل 2023 علم و ادب کراچی
عہدیءُ نیم عہدی شاعری:
شلینی برپین چادر(لال بخش پانوانیءِ شعر)2005بلوچی اکیڈمی کوئٹہ
امبائی کتگ بانگواہ ءَ(ابابگر پیشکانی ءِ شعر)2007بلوچی اکیڈمی کوئٹہ
زر نکش(ابابگر کَلمَتیءِ شعر)2008 بلوچی اکیڈمی کوئٹہ
توشگ (داؤد نورک ءِ شعر)2016بلوچی اکیڈمی کوئٹہ
دنزاں گپتگیں مُروارِد 2019 بلوچی اکیڈمی کوئٹہ
تئی بُتن روچءَ بس تئی ھمے کرتگیں کارانی آژناگیءَ وانوکءَ سر کناں دگہ برے تئی لبزانکی ازمت ءُ کارانی سرا دلجمیں کارئےءَ گوں دیمءَ کایاں۔واجہ ھدا تئی عمرءِ تہا گیشیءُ برکت ھوار بکنتءُ تئی جانءُ سلامتیءِ ھیرءَ لوٹاں
پیرجان نعیم
28/5/2023
سوردو پنجگور