صبا دشتیاری ءِ نمدی یے ، رحیم مہر ءِ نامءَ
واجہیں استاد صبا دشتیاریءِ یک نمدی یے پہ وانوکاں ندر انت ۔
دُردانگیں مہر !
دروت ءُ درھبات
واجہ مراد ساحرءِ باروا تئی نبشتانک منءَ ادءَ سر بوت۔ تئی واھگ ءُ حکمءِ پدءَ من ایشیءِ سرءَ چمے شانک دات۔ اے بے رھبندی یے بیت اگاں من تئی اے گوں سک جہداں رند سرجم کتگیں پٹ ءُ پولی نبشتانکءَ مہ ساڑایاں۔ اے نبشتانکءِ تہءَ تو حق ءُ دل اے گپ ثابت کتگ کہ اے یک یونیورسٹیءِ استادےءِ تحقیقی ءُ پٹ ءُ پولی سنچ ءِ درشانی انت ءُ من سک گل بوتگاں ءُ پہ مراد ساحرءِ شاعریءِ سرءَ گپ کنگ ءِ حاطرا ترا گچین کنگ یک راستیں گامگیجے بوتگ۔ من وت چہ بنگیجءَ بگر دانکہ آخرءَ اے نبشتانک ءَ کتگیں گپاں گوں ھم سنّت آں۔ بلے یک ءُ دو گپ ھنچین انت کہ من اِش ادءَ کنگ لوٹاں ءُ اے ایوکءَ منی حیال انت الم نہ انت کہ تو گوں ایشاں ھم سنّت بہ بئے۔ اولی گپ بنگیج ءُ تمہید ءِ دراجی انت۔حیر ! اے ھنکر دراج نہ انت ءُ اگاں یک تحقیقی نبشتانکے پہ تاکبندےءَ دیم دیگ بہ بیت بائد انت ھمےرنگءَ بہ بیت بلے تو زان ئے کہ مئے گورءَ اشکنوکانی ذہنی سطح چی انت۔ دومی گپ کہ یک حسابےءَ نبشتانک ئِے سک دراج کنگ آ گچین گپءِ کوٹیشن انت۔ زاناں اے شر نہ بیت کہ مراد ساحرءِ باروءَ تچکءَ گپ جنگ بہ بیت؟ کوٹیشن یا حوالہ جات ہم ھژدری چیز انت بلے گپ ھما وانگ ءُ اشکنگءِ فرق ءِ کئیت ءُ سیمی گپ کہ اے نبشتانکءِ بنگپ ءُ سرحال ءِ بابتءَ انت بزاں “ھشت تکیں ازمکار”اگاں تچکءَ مراد ساحرءِ ازمءِ ھشتیں تکاں بہ گیشین ئے انگت جْوان تر نہ بیت ؟ تو چے گش ئے ؟ پدءَ مستریں گپ وھدءِ تنگی ئیگ انت۔
مہر جان ، امیت انت کہ منی گپاں دلءَ نہ کن ئے۔ چوناھا چوشیں عالمانہ نبشتانکءُ تئی ھید ریچی ستا کرزایت ءُ من چہ دلءِ جہلانکیءَ ترا مبارک باد گشاں۔
دگہ تئی سر سلامت بات۔ تئی دعوت نامہ گون انت گوں دگہ حکم ءُ کارے بہ بیت دپءَ مہ دُزّ۔ زندءَ نہ دروہ ات گڑا 15 فروریءَ گندک بیت۔
تئی
صبا دَشْتیاری
کراچی 3 فروری 2009