چیٹ جی پی ٹی چی یے ؟ زاھدہ رئیس راجی
چیٹ جی پی ٹی چی یے ؟
زاھدہ رئیس راجی
جی پی ٹی چیٹ یک انچیں نرم افزا یا ایپلیکشن یے کہ ایشی ءِ تہ ءَ مصنوعی زہانت ءِ کار گرگ بیتگ۔ اے ایپلیکشن بُندرءَ اوپن اے آئی نامیں امریکن ادارہ یے ءَ جوڑ کُتگ۔ اے ادارہ ءِ بُنی کار یا لوٹ ماں ٹیکنالوجی ءِ دنیا ءَ آرٹیفیشل انٹیلیجنسی یا مصنوعی زہانت ءَ دیمروی دیگ انت۔ ایشانی واھگ ءُ لوٹ وَ ھمیش انت کہ انچیں مشین یا ربورٹ اڈ کنگ بہ بنت کہ آ انسانانی پیم ءَ پگر ءُ مارشت ھم ایر بہ کن انت ءُ مردمانی رنگءَ ھمک کار ءِ پیسلہ ءَ ھم وت زُرت بہ کن انت ۔ بلے تنیگہ آ سد درسد سوبین نہ بیتگ انت ۔ سَوَب ایش انت کہ دنیا ءِ دراھیں مشین بے پروگرامنگ ءَ ھچ کار کُت نہ کن انت ، مشین ءِ سرپد کنوکیں یا مشین ءَ وانینوکیں پروگرامنگ، تھنا ھما زباناں بیت کنت کہ کمپیوٹر ایشاں ونت ءُ پھم ات بہ کن انت ءُ داتگیں جُستانی پدءَ پسہ دات بہ کن انت۔ چوشکہ پائیتھون ، جاوا ، جاوہ اسکرپٹ ءُ یک دو دگر انت کہ آھانی نام اے ساھتءَ من شموشتگ آں بوت کنت کہ دیمترءَ یات بئیت گُڑا آھانی نام ءَ ھوار کناں۔
”اے آئی“ ءِ دو تھر ءُ بھر گِشّینگ بیتگ انت یکے ءَ ”نیرو“ یا ”شیلو اے آئی“ گوشنت بزاں ”اے این آئی“ گوشگ بیت ءُ دومی ءَ ”اے جی آئی“ گوشنت کہ ”آرٹیفیشل جرنل انٹیلیجنس“ ءِ گونڈ نامے۔
اے آئی ءِ دومی تھر ءِ سیادی چوشکہ گوں انسانی زہانت یا بودناکی ءَ ھمگرنچ انت ءُ مول ءُ مراد ئِے ایش انت کہ چہ ایپلیکشن ءِ وسیلہ ءَ ھما کار گرگ بہ بیت کہ انسان وتسرءَ (آٹومیٹکلی ) کنت۔ اے پڑءَ تنیگہ کار بیگءَ انت، بلے سوبمندی ءِ جار پرینگ نہ بیتگ کہ ٹیکنالوجی ءِ دنیا ءَ چیزے داوا کن ئے، آئی ءِ کنگ، پیشدارگ ھم المی بیت۔ البتہ انونگیں وھدءَ گیشتریں کار ”اے این آئی“ ءِ تھر ءَ کنگ بیگءَ انت ءُ لھتے زانتکارانی گوشگءِ رِدءَ ”چیٹ جی پی ٹی“ ٹھینگ وَ ”اے این آئی“ ءِ ردءَ بیتگ، بلے ایشی ءِ کارپدانی سوب ءَ گمان ھمیش انت کہ اے”اے جی آئی“ ءِ بُنھشت بہ بیت۔
”اے این آئی“ ءِ تہ ءَ چونائی ءَ بازیں ایپلیکشنے ٹھینگ بیتگ انت ءُ سرجمیں دنیاءَ سک دیر انت کہ ایشاں کارمرزگ انت چوشکہ گوگل ءِ شوھازکارے کہ ما ٹیکسٹ نبیس ایں یا تواربندے دیم دئیں ءُ گوگلءِ شوھازکار ھما ھساب ءَ نکان چہ سائیٹاں شوھاز ایت ءُ مارا پیش دارایت، ھمے پیم ءَ وتسرءَ بے رانندہ یا ڈرائیورءَ گاڑی تاچینگءِ ایپلیکشن اِنت کہ بازیں مُلکاں کارمرزگ بیگءَ انت۔ ھمے پیم ءَ ڈرون کہ دیر دراج ءَ روت ءُ وتی شر ءُ ھرابیں کاراں کنت، ایشی ءِ اڈ کنگ ءَ ھم ھمے ٹیکنالوجی کارمرزگ بیتگ۔
دگہ یک درورے” اے این آئی“ ءِ ایش انت کہ وھدے ما لوگی گوانکوھانی (لینڈ لائین ) ادارھاں زنگے جن ایں اودءَ کمپیوٹر سسٹم ءِ سرءَ جنکے ءِ توار کئیت ءُ آ کلوھے دنت کہ پہ جُستے ءَ اے نمبرءَ ٹِک بہ جن، پہ شکایتءَ اِے نمبرءَ ٹک بہ جن، پہ جھگیر یا نمائندہ ءَ گوں گپ جنگءَ اے نمبرءَ ٹک بہ جن۔ اے بُندرءَ ھمے ”اے این آئی“ ءَ ٹھینتگیں ایپلیکشن اِنت۔ پیسرءَ وَ دراھیں ادارھاں جنین یا مردینانی توار پُر کنگ بیتگ بلے نوں ھمے ایپلیکشنانی وسیلہ ءَ جنینی ءُ مردینی توار کشگ ءِ کار ھم گرگ بیگءَ انت۔
”چیٹ جی پی ٹی“ ایپلیکشن ھم ھمے رنگیں یک ” اے این آئی “ ایپلیکشن انت۔
”اوپن اے آئی“ ادارہ ءَ گوں مائیکروسافٹ ادارہ ءِ ھمگرنچی ءَ ”چیٹ جی پی ٹی“ ءِ ایپلیکشن گوستگیں سال ءَ بزاں دوھزار بیست ءُ دو ءِ نومبرءِ ماہ ءَ دیم ءَ آرتگ ءُ سرجمیں دنیا ھیران کُتگ۔ بندات ءَ ” چیٹ جی پی ٹی “ ءِ ورژن سے ءُ سے اعشاریہ پنچ مپتی ورژنز جوڑ کنگ بیتگ انت کہ ھرکسے ءَ اے کارمرز اتگ انت، پرچہ کہ اے پہ مھلوک ءَ ویب براؤزر(گوگل کروم ، انٹرنیٹ ایکسپلورر ءُ دگہ ) ءِ سرءَ شنگ ءُ تالان کُتگ انت۔
”چیٹ جی پی ٹی“ ءِ اسکرین ءِ سرءَ ایشاں یک انچیں ٹیکسٹ باکسے داتگ کہ اودءَ ھردابیں جُست ایر کنگ بیت ءُ ”چیٹ جی پی ٹی“ چہ وتی ماڈیول ءَ ایریں مالومداریاں گچین کنت ءُ ترا یک پسّہ یے ٹھین ایت دنت۔ پسہ ٹھینگ ءِ کار ءِ بابتءَ دگہ نبشتانکے ءَ گپ جن آں، انوں ھمنچو بہ زان ات کہ اے ٹیکسٹ باکس ءَ پرومپٹ ءِ نام دیگ بیتگ۔
کسے ءَ پہ وتی وانگ ءُ زانگ ءَ جُستے ایر کنگی انت، کسے ءَ وتی انگریزی، اردو یا دگہ میان اوستمانی زبان شر کنگءِ سرءَ جُستے ایرکنگی انت یا کسے ءَ یک مُلکے ءَ روگءِ بابتءَ جُستے ایرکنگی انت ، کسے ءَ اکسے جوڑ کنگءِ رھبند ءِ سوج گرگی انت، کسے ءَ پاسپورٹ ءُ ویزہ ءِ رھبند سوج گرگی انت، کسے ءَ چکاسے ءِ تیاری کنگی انت، کسے ءَ ورڈ پریس ءِ بابتءَ دربرگی انت، بلاگرے ءِ بابتءَ زانگی انت، ویب ڈیزائینگ ءِ بابتءَ سوج گرگی انت، پہ یوٹیوب ءَ تامُرے جور کنگی انت، کسے ءَ گوشتانکے ءِ تیاری کنگی انت، درستانی بابت ءَ جُست ایر کنگ بنت ءُ اے جُستانی کنوک پرومپٹ ءِ سرءَ جُستاں گوں گونڈگیری ءَ نبیس ایت ءُ ھما دمان ءَ آئی ءَ پسّہ رس ایت۔
ھمے پیم ءَ کسے ءَ یک آفیشل کاگدے وتی کارمسترءَ نبیسگ دیم دیگی انت یا اپ ورک یا فائیور ءِ سرءَ کاردزگرگ ءِ پروپوزل اڈ کنگ ءُ دیم دیگی انت، اے ”چیٹ جی پی ٹی“ ءَ درستینانی پسہ ءَ دیگ ءِ سنچ مان انت۔
ادءَ جیڑگی گپ ایش انت کہ ”چیٹ جی پی ٹی“ ءِ گورءَ اے جُستانی پسّہ اتکگ چہ کُج ءَ؟
کسّہ ایش انت کہ اے مالومداری یا انفارمیشن، ”اوپن اے آئی“ ءِ ادارہ ءَ چہ ٹیوٹر ءَ پَہ بھا زُرتگ انت، ٹیوٹر ءِ سال دوھزار بیست ءُ یک ءِ دراھیں ڈیٹا یا مالومداری، اوپن اے آئی ءَ زُرتگ ءُ چیٹ جی پی ٹی ءِ ماڈیول ءَ ھوار کُتگ انت۔
ادءَ ماڈیول ءِ مُراد ایش انت کہ ماڈیول چہ ڈن ءَ مواد یا نکان زور ایت ءُ وتی تہ ءَ جاہ دنت ءُ ھروھدءَ چیٹ جی پی ٹی یا دگہ دگہ آرٹیفیشل انٹیلیجنسی ایپلیکیشنزاں زلورت کپ ایت ، چہ اے ماڈیول ءَ پسّھاں چست کنت ءُ وتی کارمرز کنوک ءَ پیش دارایت۔
مائیکروسافٹ ءَ تاں ”چیٹ جی پی ٹی“ سے اعشاریہ پنچ ءَ مپتی آسراتی داتگ کہ ھرکسے ایشی ءَ کارمرز ات کنت بلے ھمے زوتاں کہ ایشی ءَ چارمی ورژن شنگ کُتگ، آئی ءِ سرءَ کرایہ پچ گرگءَ اِنت۔
ھرکس ءَ کرایہ پُر کنگءِ توانے است آ چہ چارمی ورژن ءَ مزنیں نپے چست کُت کنت کہ آئی ءِ تہ ءَ آ دراھیں چیز است انت کہ پیسریگینانی تہ ءَ نیست انت، بلے ھمایاں کہ مالی توانے نیست ، آ چہ نوکیں ورژن ءَ پشت کپ انت بلے انچو الم ءَ بیت کہ آ چہ ”جی پی ٹی چیٹ ءِ سے ءُ سے نیم ورژن ءِ وسیلہ ءَ ھرچے کہ دربرانت ، دگہ ایپسانی تہ ءَ ھمے چیز ءَ کارمرز اِت ءُ نپ چست کُت کن انت۔