نورکؔ بلوچ ءُبینجو،دیمرئیءِ شھدگءَ
نورکؔ بلوچ ءُبینجو،دیمرئیءِ شھدگءَ
گُلزار گچکی
سبزل سامگی زیملی مراگش (۶اکتوبر۲۰۱۸)ءِ بندءُ بوجانی چارگءُ انتزاماناں گُڈ ّی دْروشُم دیگءَ ساری یکّ روچے سبزل سامگیؔءَ چہ من لوٹ کت کہ؛ ’’من بے نورُکؔ ءَ سَوت جت نہ کنیں۔ نورُکؔءَچہ پسنی ءَزرور بیار ۔‘‘نورُکؔ سبزلؔ سامگیءِ بینجوماسٹر بوتگ۔ مروچاں پوریاگری کنت لاپ والین ایت بلے بینجوءَ انگت ھبرپرماایت۔پیشءَآپسرؔءَجھ منند بوتگ، مروچاں سندھی پسّوؔ،شادی کور پسنی کوکونٹ فارمءَ کمّو پنددیم پہ کراچی پُھّل ءِراستی دستءِمیتگءَنشتگ۔ من نصیبؔ مزارءُ شاکرؔ رحمنءِ کُمکءَ مزنیں جنجالےءَ پد نوربکش نورُکؔ ھالءُ اھوال کتءُ آئیءَ وتارا۱،اکتوبر ۲۰۱۸ءَتربتءَ سر کت ۔
نورُکؔ چو سبزلؔ سامگیءَ سادگیں، بے ھبریں ، مولانگیں اِزمکارے۔ گوں بینجو ءِ سیمّاں کمالءُ دھمال کنت، مجلسءَ مست ءُدودست کنت۔ آئیءِوشّیں ساز گوں سبزلؔ سامگیءِپُرسوزیں الھاناں گْورامباز بنت ھژمی آں پہ نچّگ ءَ لاچار کن اَنت۔ تربتءِ سربوُگءَمن نورُکؔءَ را جُست کت ۔”اُستاد تئی بینجو چون اِنت ؟ ساز ءُ سُر اِنت؟ “ پسّہ ئِے دات؛ ”واجہ پْرُشتءُ پْروش اِنت۔ اَڈ کنگ لوٹ ایت۔ منءَ اولاکے بہ دئے، بھمنؔءَ رویں شرّئِے کنائین ایں ۔ یکّ موٹر سائینکلی بیٹری یے ھم لوٹ ایت۔ کْوھنیں سازے، چوش توارئِے درنئیت۔ بیٹری توارءَئِے کشّ ایت ءُگیش کنت۔“ من وتی ڈلیورچنگیزؔءَ را ڈُبّہ دات کہ ناکوسبزلؔءُ نورُکؔ ھرجاہ رَوَگ لوٹ اَنت بہ براِش ءُ تنکہ کارئِے سرجم نہ بنت،یلہ اِش مہ دئے،اشتاپ مہ کن ۔
دومی روچءَ من نورُکؔءُ ناکو سبزلؔءِ ھالءِ گرگءَ گمشادؔءِ ھوٹلءَ شُتوں ،چہ نورُکؔءَجُست کت کہ بینجو ءِ ھالاں بہ دئے، باریں ساز بوت؟ گْوشت ئِے ۔ ” جی ھَو واجہ۔۔! نوں بروبراِنت۔“ من پرمائش کت کہ یکّءُ دو ساز بہ جن تنکہ ما وشّنود بہ بیںءُ بینجوءَ بچاریں کہ پکّائیءَ شرّاِنت، مراگشءَ مُلما کت کنت؟ گْوشت ئِے ، ’’رِدھم نیست۔ بے رِدھمءَ بہ جنیں؟‘‘آئیءَ را وتی بچّ ھمراہ اَت، آئیءَ ھوٹلءَ ایریں پلاسٹکءِ ایرانی گیلن، کہ پٹرول ئِے مان کن اَنت، زُرتءُ رِدھم کت۔ نورُکؔ ءَوتی بینجو ساز کتءُ دو سہ آئیٹم جت۔من ریکارڈ کت اَنتءُسوشل میڈیا ءَ شنگ کت اَنت۔
نورُکؔ ءِجتگیں چرے سازاں یکّے ءَ ھارکت۔ مھلوکءَ سکّ دوست داشت۔من اِے سَوت۴ اکتوبر۲۰۱۸ءَ فیسبُک ءَ Weird Instrument Tribeنامی زیملی گروپےءَشنگ کت ۔اِے درمُلکی سازگرءُزیمرزانتانی گروپے۔ سالےءَپد ۱۳ لکّءَ گیش مردماں اِے ساز چار اَتءُشیئرکت۔ نورُکؔءِ ساز ھمے گروپءِ درمُلکیءُ در کومی زیمرزانتءُ زیمر دوستاں سکّ پسُند بوت۔ چمیشیءَ بنیجوءِ سازءِ بابتءَ مزنیں گپّءُتْرانے بوت۔ چندیناں گْوشت اِے سازءَ ’’بُلبلء تْرنگ‘‘(ھما سازکہ چو بُلبلءَ وشّ لسان اِنت)ھم گْوش اَنت۔
چہ مراگشءَ چندے ماھاں پد منءَ چہ برازیلؔ ءَمردکےءَ مسینجرءَ کلوھے روان دات کہ؛’’ نورُکؔ بلاھیں بینجونوازے۔ من لوٹیں کہ نورُکؔءَ برازیلؔ ءِ جتاجتائیں شھرانی کلباں پہ بینجوءِ جنگءَ بلوٹائین ئِے۔ ھرچءُ درچاں من کنیں ۔ چینچک مردم آئیءِپجّیءَ کیت گوں؟‘‘ من پسّہ دات کہ کساس چار مردم کیت ۔ مرد سکّ دل اَت،منّ اِت ئِےبلے چوش کہ ما را رجسٹرڈ ادارہ نیست اَتءُ جاورھم جْوان نہ اِت اَنت،ما دل پُرّ کت نہ کت۔ ھمے ویڈیوزانی شنگ بُوگءَ پد کراچی ءِ ٹی وی چینلےءَ منءَ نورکؔءِ بابتءَ جُستءُ پد کتءُ آئیءَ را وتی مراگش ءَ داوَت دیگءِ گْوشت۔انجنیئر چاکرؔبلوچءَ ھم نورکؔءِ بابتءَ جُستءُ پد کت کہ اِے بے د َروَریں سازگرءَ چونءُ چتور دیمءَ بیاریں؟
مراگشءِ دومی سُھب(۷اکتوبر۲۰۱۸) ءَکہ من نوکی چہ بالی گُرابءَ ایرکپتگءُ دیم پہ حبؔ ءَ رھادگ اِتوں، سبزلؔءَمنءَ کال کت کہ’’نورُکؔءَمُزّءَ بہ دئے بِلّے باندءَ پسنیؔءَ بہ رَوت۔‘‘من گْوشت ، ناکوؔ۔۔۔! دوشی نورُکؔ مُزّدیگ بوتگ۔ پسّہ یے گرد اِینت ؛’’ نورُکؔ گْوش ایت، منءَ ھچّ نہ رس اتگ ۔ ‘ ‘ من ناکو سبزلؔءِ گْومے دانْکاں سکّ پریشان بوتوں کہ اِے چوں؟ ھمے ساھتءَ بجّارؔ بلوچ کال کت کہ اَھیّا کن ، ناکوسبزلؔءِ لوگءَ بہ رو ،نورُکؔءَبہ ٹھین۔
بجّارؔبلوچءَ ھمت کت، شُتءُگوں ناکوسبزلؔ ءَ ھمنیاد بوت۔ منءَ کال ئِے کت ، سکّ کنداِت ئِے۔ من جُست کت ھَیراِنت تو کندگءَئے؟ درّاھینت ئِے؛ ’’ نورُکؔءِ زَرّ بھرامؔ بلوچءَ لپاپہ یے ءَ مان کتگءُ آئیءِکیسّگءَ داتگ اَنت ۔ نورُکؔءَ نہ زانتگ کہ لپاپہءَ زَرّ مان، لوگءَ اتکگ لپاپہ یے نہ چاراِتگ، سرجاہءِ چیرءَ ایت کتگ وپتگ۔ من کہ جُست کت، گْوشت ئِے، ھَومنءَیکّےءَلپاپہ یے داتگ، من نہ چاراتگ سرجاہ ءِ چیرءَایر کتگ۔انّوں ما لپاپہ پچ کتگ ،چاراِتگ زَرّئِے مان اَنت ۔ منءُ ناکو سبزلؔ سامگی نورُکؔءِ سادگیءِسرءَ سکّ کندگءَ ایں۔ نورُکؔ ھم کندگ ءَ اَنت۔ گْوش ایت، ’ من چے زانتگ کہ لپاپہءَ زَرّ مان۔‘ناکو سبزل ؔ گْوشگءَ اِنت ئِے ،’ نورُکؔ شرّیں تولپاپہ دورنہ داتگ۔‘‘
دومی رنداں من چہ حبءَ دیم پہ کیچءَسپرءَ اتوں ، دلءَ گْوشت نورُکءِ لوگءَ سرے بجن، ھالءَ بگر۔وشّ بھتیءَ نورُکؔ وتی لوگ سندھی پسّو پسنی(شادی کورءِ پُھلءِ لمبءَ کسانیں میتگے)ءَ اَتک، منی گندگءَ سکّ وشّ بوت۔ مارا بُرتءُڈْرھتگیں لوگےءَ نادینت ئِے۔ من گْوشت نورُکؔ منءَ سازے گوش دارین۔ گْوشت ’’ زرور واجہ۔‘‘ گْومے گپّءَ پاد اتک، رھادگ بوتگءُ گْوشت ئِے’’ بینجوءَ کاراں۔‘‘ واتری گوں بینجو کہ لوگءَ پُترت، من جُست کت کہ تو زاناں بینجو کجاایر کتگ؟ اِے لوگ کہ ما نشتگیں زاناں تئی نہ اِنت؟ پسّو ئِے دات’’ واجہ منی اِے لوگ سکّ نزوراِنت، ھورے بہ بیت ریچ ایت ،بینجوھراب بیت۔ من ھمساھگےءِ لوگےءَ پھمیان کتگ۔‘‘ من دلءَ جیڑا ت، کُجا دنیاءُکُجا مئے ازمکار کہ سازءِایرکنگءِھم جاگھے نیست۔ سکّ بژن بوتوں کہ بلوچ ازمکار گوں دھرءِ چونیں کھراں دوچار اَنت۔ بلے مروچی بزاں ۱۵ جون ۲۰۲۳ءَ کہ نورُکؔءِ ویڈیوکلپس آں گندیں کہ ما یورپءَ گوں دمبورگءِ ردھمءَ بُلبلء ترنگ( بینجو)ءَ وشّ گْوانک کنگءَ اِنت، دل وشّ بیت۔ بلوچی زیمر انچوش میزراں بات۔(چہ منی نبشتانک’’ سبزل سامگی زیملی مراگشءِاھوال۶اکتوبر۲۰۱۸‘‘ءِ اھوالءَ زورگ بوتگ۔)
٭٭٭
