غزل
ارشاد پرواز
زندگی کُٹّیت پدءَ ھر روچ رس ایت
اے تماشا ھرکُجا، ھر روچ رس ایت

ھرکجا سوگندیں، جاک انت، توبہ اِنت
سَنگ شاھیمءِ سرا ھر روچ رس ایت

چو نہ زاناں گْوات کئی دیوانگ اِنت
کیت تئی زلفءِ تہءَ ھر روچ رس ایت

چو نہ زاناں ماہ چہ کےَ رنگ چِنت
ھو تئی آسءِ تہءَ ھر روچ رس ایت

چو نہ زاناں ھور پہ کےَ عاشق اِنت
ھو تئی تُنّ ءِ تہءَ ھر روچ رس ایت

چو نہ زاناں انتظارءِ چے سبب
وسوسے وشّیں دلءَ ھر روچ رس ایت

چو نہ زاناں دْروگءِ چینچو دْروشم انت
اینچو زاناں بے وفا ھر روچ رس ایت

کمّو تھنائی ءُ کمّو انتظار
نیمگا چہ تئی من ءَ ھر روچ رس ایت

اینچو زاناں کشک بے ھالاں من ءَ
اینچو زاناں راہ من ءَ ھر روچ رس ایت

اینچو زاناں بے توار ہچبر نہ باں
بْرمشے دردانی تہءَ ھر روچ رس ایت

آئیءَ من بلکیں مرچاں کم رساں
آ من ءَ وھدءِ سرا، ھر روچ رس ایت

آئیءِ اَلوت پْرُشنت چو شیشگءَ
رازے کیتیں پہ من ءَ ھر روچ رس ایت

چو نہ زاناں دریاءِ بستارءَ من
ھو بَلے تئی دامنءَ ھر روچ رس ایت

اے وڑیں کردار کےَءَ را گون بیت
اے وڑیں مردم کجا ھر روچ رس ایت

زندگی ارشاد چو سِلّیں گْونڈوءَ
ٹِینُّک ے بڈ ءُ سرءَ، ھر روچ رس ایت