سرمگیں بیگاھے ماں پسنی ءَ۔ سلام کریاب
سرمگیں بیگاھے ماں پسنی ءَ
نبشتہ کار: سلام کریاب
نبشتہ کار: سلام کریاب
من چہ رسانکدر ءَ سرپد بوتاں کہ یک دو روچی کتاب مراگاھے ماں پسنی ءَ10ءُ 11 مارچءَ برجم دارگ بیت گڈا من گوں وتا جیڑایت کہ منا اے مراگش ءَ روگی انت یک بیگاھے من وتی کمرہ ءَ ڈپریشن ڈائری ءَ وانگ ءَ اتاں داں وٹساپ ءَ سنگتے ءَ توار بندے راہ دات کہ من ءُ تو پسنی ءِ سپر ءَ ھمسپر بئیں من پسو دات کہ وشیں گپ ئے بلے روگ ءَ یک روچے ساری من ءِ ھال دات کہ من کراچی ءَ رواگایاں من گشت سلامت باتے ، ھیر من دومی سہب ءَ گریب آباد ٹرانسپورٹ ءَ فون کت ءُ پہ وت ٹکٹ ءِ گپت بلےبس وھد ءُ پاس ءِ رد ءَ انگہ درنیتک ءُ ما دیر ءَ سربوت ایں من کہ سبارگے کت گڈا رکشہ ءِ گپت دیم پہ ڈگری کالج پسنی ءَ اودا مراگش ءِ انتظام کاراں مارا وش اتک کرت بلے اے دمان ءَ مراگش مہتل ات من کتابانی چارگ ءَ شتاں گڈا منی ملاقات گوں کتاب دوستیں سنگت شبیر شاکر ءُ ڈاکٹر خالدءَ بوت ، من کتاب چاراں چاران ءَ زبان اور لسانیات کے مباحث ، تنقید اور لسانیات ، اصناف سخن ءُ رودراتکی افریقی ملک کینیا ءِ نبشتہ کار Ngugi Wa Thiongo ءِ دو کتاب Decolonis in the Mind ءُ Writers in Politics ءِ جست کرت بلے اشاں چہ یکے ھوں دست نہ کپت ، دیر نہ گْوَست داں ساز ءُ زیمل بندات بوت کہ اشی تہا کسان سالیں طبلہ نواز زیشان بلوچ ءُ بینجو نواز نوربکش نورک ءَ گوں زیملاں دیوان زرینت اگاں من بیھال نیاں گڈا شاکر رحمان ءَ مبارک قاضی ءِ سوت ءِ ھم دیوان ءَ گشت ءُ درستیں ازمکارانی دلبڈی گوں چاپاں بوت ، اشی ءَ پد دگہ بہرے وتکشی ءِ سرا ات کہ اشی تہا زاھد دوست ءُ نادل بلوچ ءَ وتی پٹ ءُ پولانی رد ءَ وتکشی ءِ میئل ءُ آئی Cause آنی باروا دیوان ءَ را سرپدی دات ، دمانے کہ دیوان مہتل بوت من پدا کتابانی نیمگ ءَ جُنزگ ءَ اِتاں کہ گوں اے آر داد ساہب ءَ ملاقاتے بوت کہ گوں سنگتاں نشتگ ات من شت ءُ کتاباں چاران اِتاں کہ منی چم پہ وقاص انیس قاضی ءِ کتاب مابعدجدیدیت اور مارکسزم Postmodernism &Marxism ءَ کپتاں گڈا من زرت واتری ءَ داد ساہب ءَ جست کت کہ اے کتاب چہ کجا زرتگ من گشت چہ خالد کرا گڈا سنگتے ءِ گشت برو یکے بْیار ، کتاب ءِ چارات ءُ گشتئے جْوانیں کتاب ئے ، دمانے ءَ رند دگہ بہرے کہ بندات بوت آ بتلانی سرا ات اسحاق رحیم ءُ قدیر لقمان ءَ وتی گشتانکانی تہا گشت کہ بتل مے زبان ءِ عہدی مڈی اَنت بائد اے زندگ دارگ بہ بنت اشانی سرا گیشیں پٹ ءُ پول بہ بیت ءُ نوکیں پدریچ ءَ سرکنگ بہ بنت پدا نودربرانی نیام ءَ بتل مقابلہ ءِ بوت کہ اشانی جج ھم ھمے دوئیں واجہ اتنت من پدا یکرندے کتابانی چارگ ءَ شتاں تہ سنگت چندن ساچ دیست ھال ءُ اھوال ءَ پد آئی کتابانی باروا جست کت تہ گشتئے منی کتاب رسگ ءَ نہ انت منا وت ھم درکار انت شریں دمانے ءَ پد دگہ بہرے بندات بوت اے لبزانک ءُ شعر ءِ سرا اَت اے بہر ءَ استاد منیر مومن ءُ اے آر داد ساہب ءَ صادق صبا ءِ جستانی پسو ءَ شعر ، ھیال ، گوناپ سازی ، رپورٹ ، گدار، آزمانک ،عہدی شاعری ءُ دگہ تہرانی سرا بے درویں وڈے ءَ اے دوئیں لبزانکی شہسواراں سرجمیں دیوان ءِ ھیال وتی دُرؑیں دانکانی نیمگ ءَ گور کت مُردنئیں منی جند ءَ اے بھر سک دوست بوت ءُ منی مزنیں واھگے ات کہ دریگتے اے بہر گیشتر وھد ءُ پاسءِ بوتیں داں ما اے دوئیں استادانی علم ءُ زانت ءَ چہ گیشتر دربُرت کتگ ات ھر دو وتی پڑانی بے دروریں شہسوار اَنت ، وھدے استاد منیرمومن کہ چہ تلو ءَ ایر اتک آئی ءَ گوں ملاقات ءِ بوت ، منیر لبزانک ءِ شاعری بہر ءَ گشئے نوکیں عہدے سازگ ءَ اِنت ءُ ھمےعہد ءَ باندا وتی نام ءَ کنت ، گڈ سری بہر شاعری اَت ءُ منی واھگ ءَ ات کہ من ھم شعر ءِ واناں منی دیم ءَ نشتگیں گلاب غالب ءَ من گشت کہ من شعر ءِ واناں گشتئے تئی نام کے ایں من وتی نام گشت ، یک ءُ دو شاعر ءَ ابید گیشتر شاعر پسنی ئیگ اِتاں ، ھر کسی کہ نام توار جنئگ بوت اتک ءُ وتی شعر اش ونت انت ما نیام ءَ ڈالچار کنگ بوت ایں تہ باکے نیست ، گڈ سرا بلوچی شاعری ءِ مُہکمیں نام ءُ توار استاد منیرمومن گوں دیوان ءِ چاپاں تلو ءِ سرا اتک ءُ اے وڈا گشتئے کہ
داب کنت میتگ ءَ ساھریں زندمان شعر اوشتاتگ انت
لُڈگاہاں بدن لَڈگ ءَ انت زبان شعر اوشتاتگ انت
شادھے یا گمے کس مباتیں زبھر چہ تئی گْشتناں
پاتوی بانزلاں ءُ سگاری زِھاں شعر اوشتاتگ انت
یا
شہر ءِ چمّ ءِ تہا گنوک کتہ
تو اوں مارا کُجا گنوک کتہ
تو وَ نئیل ئے کسے گنوک بہ بیت
تو وتا مئے وڑا گنوک کتہ
دُرسیں شِیوار نشتگنت کئے زانت
کہ کئیارا کئیا گنوک کتہ
ما دیوانگ منیر تئی درد ءِ
درد ءَ تئی ہر دوا گنوک کتہ
( اِدا اے دوئیں شعر سرجم ءَ نبشتہ نہ اَنت )
اے دوئیں شعراں چہ پد ھوں دیوان ءَ لوٹ کت کہ منیر دگہ شعر بوانیت بلے استاد ءَ مائک یلہ دات
شپ ءِ اولی پاس ءَ گوں منیر ءِ شیرکنیں شعراں دیوان آسر بوت ، من ءَ یک ءُ دو سنگت ءَ جست کت کہ تو کجا روئے من گشت ھوٹل ءَ ، پدا انتظام کاراں من ءَ کالج ءِ بس ءَ سوارکت بس داں دیر ءَ جلیت درستیں سواری اتک ءُ سوار بوتاں واجہ مرادجان الہی باز جْوانیں انسان ئے ءُ راہ ءَ من ءَ پسنی باروا بازیں سرپدی ئے دات ئے آئی مِنزل پیسر ءَ اتک ءُ ایر اتک من ھوٹل ءَ ایر اتکاں ورگ ءَ پد وتی تہت سرا تچک اتاں کہ سپر ءَ منا کمے ژند کتگ ات موبائل ءَ چارگ ءَ اِتاں داں سنگت خالق ارمان ءِ میسج ءِ اتک کہ مراگش ءِ ھالاں بدئے من چیزوکے لبز نبشتہ کت ءُ راہ دات ارمان ءَ گوں ارماناں لہتیں پُل ءُ لاڈ ندر کت پدا من واب ءِ امبازاں شُت ءُ نہ زاناں کدی واب کپتاں ، سہب ءَ مہلہ پاد اتکاں گریب آباد ٹرانسپورٹ ءَ شُتاں داں انگہ بند ات بلے کش ءِ ٹرانسپورٹ پچ ات من شُت ءُ ارزبندے بست وھدے اتکاں داں ٹرانسپورٹ سک رش ات منا سیٹ نہ رست ھمے وھد ءَ استاد رسول بکش فرید ھم اتکگ ات مے ملاقات ءِ بوت من استاد ءَ جست کت کہ تو مراگش ءَ گِندگ نہ بوتگے استاد ءَ گشت کہ من مرچاں چہ مراگشاں یک کِرؑاں ءُ وتا دور داشتگ
پدا مے وین دراتک ءُ راہ ءَ مردم سوار کناں بوت گڈی اسٹاپ ءَ اوشتات ھمے سیٹ ءَ کہ من نشتگ اتاں اے پیسر ءَ یکی ءَ بُک کتگ ات آ اتک ءُ رست گڈا من ایر اتکاں دومی وین اتک آھم پُر ات ڈاکٹر خالد ھمے وین ءَ گون ات گشتئے من زی ٹکٹ گپتگ من پدا گوں سیئکلے ءَ بازار ءَ شتاں نوں ایوک ءَ یک بس ءِ ادار دو ءَ درآئیگی ات بلے انگہ وھد ءُ پاس دہ ات
من ناکو ءَ گشت منا کراچی اسٹاپ ءَ ایرکن بگندے لوکل ءِ بوت ما کہ اودا شتیں داں بس ءِ درآئیگ ءَ انت من ھمے بس ءَ گون کپتاں ، گوں جمرانی ساھگ ءُ سارتیں گْوات ءَ من مزن نامیں شاعر ، گشندہ ، آرٹسٹ ءُ وش روئیں مردمانی ھلک پسنی یلہ دات ءُ ادار دو ءَ عطا شاد ءُ پنو ءِ گلیں کیچ ءَ سربوتاں اے وڈا اے سپر آسر بوت بلے اگاں زند ءَ نہ دروھیت پسنی ءِ زریارت ءَ الم پدا کناں