دستونک
شائر: دیدگ بشیر

بلیں تامُوری ءَ سینگار بیارئے
چراگ ءِ ساھگ ءَ ماندار بیارئے

مُجاں گپتگ زمانگ مُدّتے بیت
برو آدینکے ءَ پیشدار بیارئے

ھلاھوشیں گشے ھوشام ءَ گپتگ
زِر اِنت مرچی پدا ھینار بیارئے

سَتر رہن اِنت وتارا موکگ ءَ اِنت
وتی جند ءِ تھا اِنت گار بیارئے

خداھے ، آدمے برمشے کہ شھمے
نگاھے مھتل اِنت دیدار بیارئے

مُدام تھنائیاں تاھیر بکشیت
کئے اِنت دیدگ بشیر بیدار بیارئے