لچہ: بےوسی، لچّہ کار: شے چاکر
لچہ: بےوسی
لچّہ کار: شے چاکر
لچّہ کار: شے چاکر
بےوسی
بےوسی تئی ستا ءَ
کُجاں مھرگانی رداں گوں کماھاں بہ باں
تو وس ءِ شِیرکنی ءِ جسیں آچش ءِ لزت ئے
چم وپس اَنت ءُ استال بند اَنت دراں
تو وتی موسمانی بیانیں دلاں پرّچ ئے
آگھی ءِ چِڑکہ تھاریں مُجاں گار بنت
بادشاھیں ھیالانی واجہ سراں وار بنت
پوپلیں بیگہ ءِ شیرگیں پن ءُ بو
نمبگیں سھبے ءِ پہ ھوا ءَ مِر اَنت
نیمروچیں جلانی سپر سبز بنت
واھگ ءِ رھسرانی چنالیں تما گیمر اَنت
نود ھِیسک اَنت ءُ جند ءَ شمور اَنت وتی
ترّ نہ بیت گلزمین ءِ زراگیں بدن انگتہ
بےوسی تئی ستا ءَ
کجاں مھرگانی رداں گوں کمایاں بہ باں
تئی ستا مکھیں ماتے ءِ دیدگانی دل اِنت
بُرتگیں بچے ءِ موکگانی پد ءَ
دْرِیکگانی تہ ءَ دْرِیکگاں بند کنت
گوں زمین ءَ مُشیت ءُ سر ءَ ژند کنت
تئی ستا براتے لج کیلیں گھار ءِ گُشان ءِ گم اِنت
بےپسات ءَ گوں دستء یزیدیں کساں چِل بیت
تئی ستا یک جنیں چُکے ءِ آگھی ءِ ھما واب کہ
گندگ ءَ پیش آگاھی ءَ ایر بُرت
تئی ستا یک گھاریں گَلے براتے ءِ تْرانگاں بار دنت
تئی ستا گژنگیں زھگے ءِ زندگی اِنت کہ
گوں شپادیں پدانی چراگیں گماں
روک بیت ھر دمان ءُ مریت ھر دمان
تئی ستا تُنگیں آھواں پہ ھما ڈاک ءُ کپ
دور گندئے تاں دریا تچیت ھرگْور ءَ
اے سر ءُ آس ءَ تاں بہ تچ آپ نیست
بےوسی تئی ستا چہ تپنگ ءِ نل ءَ سْرپتگیں چرّھے
مُرگے ءِ نکشی ئیں بانزلاں گوں اڑیت ناگھاں
برز بالیں چشانی کُشیت واھگاں
بےوسی تئی ستا ءَ
کجاں مھرگانی رداں گوں کماھاں بہ باں
تو ھما تاکریچ ئے ترا وھد نیت پاس نیست
تو کجاں موسم ءَ اوں کجاں دیدگ ءِ اندر ءَ روک بئے
یکیں سھت ءَ ھزار رنگ ءُ پیم ءِ تہ ءَ کْوھن بئے نوک بئے
بےوسی تئی ستا بس ھمیش اِنت کہ
تئی زد ءَ کپتگیں سر بہ سگّیت ءُ بس
ھر ھساب ءَ ترا بُوّگی اِنت بہ بو