نورمحمدنورل (اولی بھر)نبشتہ: گُلزارگچکی
نورمحمدنورل
(اولی بھر)
نبشتہ: گُلزارگچکی
اِے نبشتانک دو بھران اِنت۔ اولی بھرءَما کلی جمالدینیؔ نوشکی ءَ ودی بوتگیں نورؔمحمدءِ زبانی آئی ءِ زِندءِ بنداتی ماہءُ روچاں آژناگ بیں کہ آچہ نورؔمحمد ءَچونءُ چتور استاد نورلؔ بوت۔ اِے گْرانیں سپرءَ آئیءَ چے چے دیستءُکُجام جنجالءُ مُسیبتانی دیمپان بوتگ؟ کسانی، وانگءُزانگ، کار ءُ روزگار،زیمر ھیل کنگءَآ کُجام مُشکلاں گْوستگ؟ اِے بھرءَ نورمحمد نورلؔ وتی کسّھاں وت کنت اِے بھر ءَ استاد نورلؔءِ زندگیءِ بازیں انچیں گپّ ءُ ھبر دیمءَ کااَنت کہ چدءُپیش وانوکانی دیمءَ نہ یتکگ اَنت۔نبشتانکءِ دومی بھرءَ استاد نورلؔ ءِ زیمری ھزمتانی ساڑا ھگ ءَبلوچی میوزک سوسائٹی ءِچیر دستیءَ۱۹نومبر۲۰۱۹ ءَملیرؔءَ برجاہ بوتگیں زیمری مراگش ءِ اھوالاں شُمئے دیم ءَایر کنیں۔
نورمحمد نورلؔءِزندھال؛
بلوچی زبانءِ گْوشندھانی ھرکسی وتی اندازءُدابے۔کسے گزلءَنامدار اِنت،کسے سَوتءَوشّ الھان اِنت۔ کسے زھیروکءَ زانو گر اِنت،کسے ھالوءُلاڑوآں وشّ گْوش ایت، گڑا کسے لیکواں باکمال اِنت۔نورمحمد نورلؔ چما گْوشندھان اِنت کہ آناں ایوکءَبلوچی دستونکاں الکا پ زیمرین ایتءُ گو شد ا روکاں وتی توارءِ سھرءَ مانپتاایت،سَوتءَھم وشّ گْوشیں گْوشندھے۔نورمحمد نورلؔءِ گوشداروک بے ھساب اَنت۔ ملیرؔءَبگرداں ایرانءُمزن ھورءَ دراءُدنیا ھرچ ھما کُنڈ ءَ،کہ بلوچے جھد مند اِنت، آنورمحمد نورلؔءَ زرور گوشدارایت۔نورمحمد نورلؔءِ زیمری ھزمت ھمنچک مزنءُ شاھیگان اَنت کہ بلوچ راج ھمینکس پرائی ءَشرپءُمالی کُمکی مجلسءُدیوان بہ کنت کمّ اِنت۔
بلوچی میوزک سوسائٹی وتی وشّ لسانیں گْوشندہءُساھریں سازگرانی ساڑاھگءَمُدام جُھدان اِنت۔ھمے جُھدانی دْرچءَ سوسا ئٹی ءَجارپرّاینت کہ نامی ئیں گْوشندہ نورمحمدنورلؔءِ ھاتر ءَ ساڑاھی زیملی مراگشے ۲۲نومبر۲۰۱۹ءَملیرؔءَ کنگ بیت۔مروچی من شُمارا ھمے دیوانءِ بابتءَ مالومدار کناں بلے چرائیءَ پیش کمّو گوں وتی اِے دلدوستیں گْوشندہءَمجلسے کنیں ءُآئیءِزاتی زندگیءِچندے تاکدیم لیٹینں تنکہ ھما گپّءُھبرکہ گُلگداراں سرگْوز بنت، دیمءَآرگءُ زانگ بہ بنت۔نورمحمد نورلؔ کسّہ کنت کہ؛
منی نام نورؔمحمد اِنت ۔من چہ پت ءِ نیمگءَ نوشکیءِمینگلے آں ،ءُ مکھیں ماتءِنیمگءَایرانءِ دمگ سرا و ا نؔ ءِ مُلّازھی یے آں۔ منی پت ءِ نام صوفی بختیارؔبلوچ اِنت۔ منی پت بے پسادیںءُ مومنیں مردمے بیت پمیشکا میتگءَ صوفی بختیارؔءِنامءَمشھوربیت۔ منی پت دو سانگ کنت۔ چہ اولی سانگءَ محمد حیات ؔ ءُچار جنک بنت۔چہ منی ماتءَمنی مستریں بْرات ،حاجی محمد ابراھیمؔ ءُمن پیداک بیں۔ شُناسی کاٹ ءِمُتابک ءَمن سن ۱۹۴۴ءَ کلّی جمالدینی نوشکیءَودی بیتگاں بلے منی بوتن ماہءُ روچءُ سال ءِ بارہ ءَ کسانیں اڑے ھست۔منی بْرات حاجی محمد ابراھیمؔ گْوش ایت تو ۱۹۴۴ءَ پیداک بوتگ ئے،منی مات گْوش ایت، ھمے سال ءَ کہ پاکستان جوڑ بیت، تو ھمے سال ءَ پید ا ک بوتگ ئِے۔‘‘
)روان انت)