بالی بلوچ ءِ ساچشت : منءَ درچکے سبزینگی اِنت
منءَ درچکے سبزینگی اِنت
نبشتہ کار: بالی بلوچ
اے جاگہ ءَ من زمانگے سپر کُتگ۔ اے ھند ءُ جاگہ ءَ منی زندءِ بہرے گون۔ اِدءَ من زندگی ءُ مرک ھمسنگی ءَ دیستگ اَنت۔ اے جاگہ ءُ ھند مھرانی ھنکینے بوتگ۔ اِدءَ زندگی ءِ ھزاراں تہر انگت چمّانی دیمءَ پدّر اَنت۔ اے جاگہ ءَ منی زندءِ نُھ سال وتی تَھا جاگہ دات ءُ ایشاناں ھنچو پُر ارزش کُت ءُ منءَ ھنچیں جاھے سر کُت کہ من انگت چما نُہیں سالانی کیف ءَ در اَتک نہ کن آں۔
وانگ۔۔۔مھر۔۔۔کھر۔۔۔جتائی۔۔۔ ارمان۔۔۔ارس۔۔۔ کندگ۔۔۔ٹَھک۔۔۔بِچکند۔۔۔ زار زار ءَ گریوگ۔۔۔ چیروکانی گریوگ۔۔۔ وانگ۔۔۔ ھچ نہ وانگ۔۔۔جنگ۔۔۔ انقلاب۔۔۔ آجوئی۔۔۔ غلامی۔۔۔ وانگ۔۔۔ نہ وانگ۔۔۔کھر۔۔۔ مھر۔۔۔ جنگ۔۔۔ انقلاب۔۔۔ بیگواہ۔۔۔۔۔۔ لاش۔۔۔۔ یک۔۔۔۔ دو ۔۔۔سئے۔۔۔ چار۔۔۔ پنچ۔۔۔۔ لاش۔۔۔۔۔۔ قبرستان۔۔۔۔ بے تواری۔۔۔گُنگی۔۔۔۔ پٹاسک۔۔۔۔ڈِیزّ۔۔۔۔۔۔ جاک۔۔۔ کُوکار۔۔۔۔ بے تواری۔۔۔۔ بے تواری۔۔۔۔ پٹاسک۔۔۔۔ جاک۔۔۔ بے تواری۔۔۔ بے تواری۔۔۔۔ پٹاسک۔۔۔۔ بے تواری۔۔۔ بے تواری۔۔۔۔۔ بے تواری۔۔۔۔ بے تواری۔۔۔۔من ھمے جاگہ ءَ دیستگ انت۔ من چریشانی تاثیر ءَ ، چریشانی کیف ءَ در اَتک نہ کن آں۔۔۔ ھمے کیف ءُ تاثیراں منءَ ھُنر پرماتگ۔۔۔ رودپترانی ھزاراں تاک ھمے کیف ءُ تاثیراں گوں سیاہ کُتگ اَنت۔۔۔
اے ھند ءَ من زِند ءِ نُھ سال گوازینت بلے وتی زمانگ ءِ اسپیتیں رنگ ءِ مزنیں گیٹ ءِ دیم ءَ، یخ بستگیں شپاں آس ءِ لمب ءَ نہ نِشت ءُ گاریں ھمراھانی واستہ ننداک نہ داشت۔۔۔ما دگہ وڑ اَت ایں۔۔۔ ما دگہ رنگ ءَ اَت ایں۔۔۔ مارا شست سال ءِ توک گُٹّ ءَ لوپ اَت ءُ ما اناگہ سھِی بوتگ اَت ایں۔ ما چریشی ءَ وتءَ درکنگ ءِ واستہ سکّ اِشتاپی ات ایں یا وَ ھنچو بُوھگی اَت کہ ما کنگءَ ات ایں۔۔۔ ما کہ زانت تہ حیران بوت ایں کہ شست سال ءَ گیش اِنت کہ توکے مئے گُٹّ ءَ لوپ بوتگ ءُ ما سھِی نہ بوتگ ایں۔ ما اے توک ءَ را وتی بھرے زانتگ ءُ نہ مار اِتگ۔
بلے پدا ھم ما گل بوت ایں کہ دیر آید درست آید۔۔۔۔ زند پہ روزگار وش اِنت۔ مُدام پہ کنگ ءَ کارے بہ بیت تہ مردم زندگی ءِ سُر پُرانی لذّتءَ گپت کنت۔ مارا کارے دست کپتگ اَت۔مارا منزلے پیشدارگ بوتگ اَت۔
مئے کار ءِ دیم ءِ مردماں مارا تچک ءَ چہ دوری ءَ منزل پیشداشت کہ ظاہر اَت۔ پُورا گِندگ بوت۔ مئے تَھا بازینے ءَ را منزل ءِ مھر ءَ ھنچو ھدوک کُتگ اَت کہ آھاں کار ءِ کنگ ءِ رہبند اوں جُست نہ کُت، وت دل ءَ کارءَ لگّ اِت اَنت۔ چو منءَ بازیں کسے۔۔۔کار کنت، کارءَ نہ زانت۔۔۔ ھنچوش اَت۔۔۔بلے کار بوت۔۔۔باز کار بوت۔۔۔ باز گار بوت۔۔۔باز گار اِنت۔۔۔۔
ما دم نہ بُرتگ اَت۔۔۔ بلے۔۔۔ ما جنگ بوتگ اَت ایں۔۔۔ما ژند ات ایں۔۔۔ ما دم کُت۔۔۔ بلے ما واب نہ ات ایں۔۔۔ ما آگھی ءَ دم کنگءَ ات ایں۔۔۔ما جیڑگءَ اَت ایں ءُ دم کنگءَ اَت ایں۔۔۔ ما وانگءَ ات ایں ءُ دم کنگءَ ات ایں۔۔۔
پدا کہ وھد کِنز اِت۔۔۔۔ پٹاااااااااااااسک۔۔۔۔۔۔ما دم کنگءَ دم بُرتگ اَت۔۔۔ پاد اتکگ ات ایں۔۔۔ بلے ما، ما نہ ات ایں۔۔۔ ما مئے پُشت ءِ مردم اِت اَنت۔۔۔مئے تَھا بازینے دم کنگ ءِ ساھت ءَ واب کپتگ اَت۔۔۔ لھتے پاد اتکگ اَت ءُ لھتے انگت واب اَت۔۔۔۔ لھتے انگت واب اَنت۔۔۔ بلے پُشت ءِ مردم دیما اتکگ اِت اَنت ءُ دیم ءِ مردم جوڑ بوتگ اِت اَنت۔۔۔
اے ھمے جاگہ اِنت۔۔۔بلے مردم دگر اَنت۔۔۔گوں نوکیں رنگے ءَ دیما اتکگ اَنت۔۔۔ دانگ دانگے چہ کوھنیں مردماں گوں۔۔۔ھمنام اَنت۔۔۔ ھم رنگ اَنت۔۔۔ وھدے گِندان اِش چم سینزدہ سال پُشت رو اَنت۔ ھمک چمّ ءَ بہ چار چہ دومی ءَ گیشتر ارمانی اِنت۔۔۔ ھزار واھگ۔۔۔ ھزار ارمان۔۔۔ ھزار درد۔۔۔۔ ھزار گم۔۔۔۔ھونیگ اَنت درستانی چمّ۔۔۔۔
اے بری پٹاسکانی توار ودّ اِتگ اَت۔۔۔ گرند اَت۔۔۔ گرندگءَ اَت۔۔۔ ھر گورءَ جمبر مانشانگءَ اَت۔۔۔بلے ھمے ساھت ءَ آزمان ءِ بُن ءَ ھنچیں جاہ اوں ھست اَت کہ اودا جمبر سر نہ اَت۔۔۔ جمبر بس گرندگءَ اَت۔۔۔
انگت گرندگءَ اِنت۔۔۔ گِروک اِنت۔۔۔ اے موسم ءَ پہ ھورے ءَ دلمانگ کُتگ۔۔۔ دیریں کہ چمّاں سبزیں درچکے نہ دیستگ۔۔۔ دیریں کہ ما پہ درچکے ءِ سبزینگ ءَ ھورے ءَ دلمانگ ایں۔۔۔ءُ جمبر آزمان ءَ گِرگا نہ اِنت۔۔۔
گمان اوں بیت کہ ھمے آزمان ءِ بُن ءِ بے جمبریں جاگہ جمبر ءَ گوارگءَ نئیل اَنت۔۔۔ پرچا کہ منی چم بس ھمینکس دیست کن اَنت۔۔۔
دل اوں لوٹ اِیت کہ کہ جمبر کمّے انگت بہ گرند اِیت۔۔۔کمّے انگت گِروک بہ جنت۔۔۔ گوات ءَ را ھُنرے بہ پرما اِیت ءُ گوات آزمان ءِ بُن ءِ ھالیگیں جاگھاں پُر بہ کنت۔۔۔۔
پدا بس زنڈیں ترمپانی درْدے بئیت۔۔۔۔چُشیں جمبر نہ شنزاِیت۔۔۔، گوار اِیت۔۔۔ بے کساس گواراِیت۔۔۔
درْد ءِ پُشت ءَ درْدے بیاھات۔۔۔ ھور گوارات ءُ ھمے کساس ءَ گوارات کہ نوکیں کئور بہ تچات اَنت۔۔۔
من زان آں کہ اے رنگیں ھور ھار کنت۔۔۔ ءُ ھار منءَ بازیں تاوانے دنت۔۔۔ منی کِشاراں بارت۔۔۔ پہ من ھچ نئیل اِیت۔۔۔بلے من دل ءَ سدّک آں کہ ھار منی زمین ءَ شرّیں مِلکے دنت ءُ منءَ دنت۔۔۔ءُ منی کِشار، مچّ، اِسپُست ءُ برنجانی توم ھمے مِلک ءَ ھوار اَنت۔۔۔ ھار پہ من نوکیں توم ھم کار اِیت۔۔۔۔
ھار کہ سرءَ ایر کنت۔۔۔ءُ پدا ھور لھم لھم ءَ شنزاِیت۔۔۔تہ روچے نہ روچے منی توم سراں چست کن اَنت۔۔۔ من درچک سبزین آں۔۔۔۔وڑ وڑیں درچک۔۔۔۔۔ من دھکان کارے ءِ چُکّ آں۔۔۔۔من زان آں کہ منءَ چے کنگی اِنت۔۔۔