وھد ءِ مُجاں اَندیمیں گُشندہ۔اصغر لعل
وھد ءِ مُجاں اَندیمیں گُشندہ
اصغر لعل
سارتیں بیگاھے من، حاجی سلام ءُ استاد شوکت مراد نیاباد ءَ عابد راز ءِ زیمل جاہ ءَ روگ ءَ اتیں ،بغدادی علی ہوٹل ءَ ساری لوگے ءِ دپ ءَ پیرمردے اوشتاتگ اَت،باکسی ٹالے ءَ گوں وتی دنتاناں گلائش اَت۔شوکت مراد ءِ چم ھمے مرد ءَ کپت اَنت ،درائینت ئِے “صبر من وتی ناکو ءَ گوں ھال پُرسی یے کناں”۔گوں واجہ ءَ استاد شوکت ءِ پجی ءَ من ءُ حاجی سلام ءَ ھم تیار جوڑی کُت۔آئی ءِ لوگ ءِ دپ ءَ تلّویے ھست اَت مارانادینت ئِے۔یک ءُ دومی ءِ پجار کنائینگ بوت۔ پمّاآنوکیں مردمے آت،نوکیں نامے اَت،بندات ءَ آئی ءِ گپاں من ھاسیں دلگوشی یے نہ دات۔آکہ بلوچی زیمل ءُ آئی ءِ گوست ءِ کارستانی سرءَ گپ ءَ لگ اِت منی دلگوش ھمائی ءِ نیمگ ءَ بوت۔ من آئی ءِ گپانی زِر ءَ بُکّان اتاں کہ شوکت مراد ءِ موبائل ءِ توار ءَ ماراترانگ ءَ گیتک کہ عابد راز ءِ زیمل جاہ ءَ روگی اِنت۔ من واجہ ءِ دست گپت اَنت ءُ گُشت”من ءَ وھد بدئے لھتیں جست کنگ لوٹاں”۔آئی ءَ منی سرءَ دست وتی سمارت ءُ گُشت”من ءَ پیری ءُ نادراہی ءَ نوں تر ءُ تابی نہ کتگ،ہروھدے کائے دروازگ ءَ ٹُک ءُ بگش حیدرسربازی ءَ لوٹاں من حاضر باں”۔
واجہ حیدر سربازی بُن ءَ ایرانی بلوچستان سرباز ءِ مردم اِنت۔آئی ءِ پت پشمبے لڈاِتگ ءُ لیاری کراچی ءَ اتکگ ءُ جہمنند بوتگ۔
واجہ حیدر سربازی 1938 ءَ کلری عیدولین ءَ پیدابوتگ۔ آئی ءَ چہ کسانی ءَ گشندھی ءِ ھُب ءُ واھگ بوتگ۔ آئی ءَ جاڑک،ستار ءُ شفیع گوشداشتگ انت ءُ زیمل ءِ زِرءَ دورکتگ۔ آغافیض ءَ آوتی زیمل ءِ استاد لیکیت۔ آغافیض ءَ آئی ءِ لوگانی نزیک ءَ گُداستری ءِ دُکانے بوتگ ۔حیدر سربازی ءَ وتی تُن ایرموش کنگ ءَ آسانی بوتگ۔
1962 ءَ وھدے بلوچی کمرشل ریکارڈنگ بندات بوت۔اولی ریکارڈنگ محمد ڈولی ءِ بوت ،شعر اے وڑ اَت:
قربانوں خدا ءِ، بوجیگ ءِ نگہبان انت
دومی ناکو صدیق کوکو ءِ ،سیمی رمضان تاڑگل ءِ بوت۔ پدءَ ھمے سلسلہ دیم ءَ روان بوت،سلمان فقیر،جاڑک ءُ آدگراں ریکارڈنگ کُت۔
واجہ حیدر سربازی ءَ یک کمرشل سوتے ریکارڈ کت ای ایم آئی کمپنی ءَ دُھن ءُ شعر آغافیض ئیگ اتاں۔
بالی کپوت حالاں بدئے
من نشتہ نالاں دوست ءِ حیال ءَ
بد بہتی ءَ اے سوت شنگ نہ بوت۔
کم ءُ گیش حیدر سربازی ءِ بیست ءُ پنچ نوار شنگ بوتگ۔سیمی نوارءَ واجہ حیدر سربازی ءَ گوں سکینہ ناز ءَ ڈیوٹ گُشتگ۔اے ڈیوٹ بلوچی زیمل ءِ دنیا ءَ اولی ڈیوٹ اِنت کہ مردین ءُ جنینے یکجاہ گُشگ ءَ اِنت ۔شاداب اسٹوڈیو کراچی ءَ اے نوارریکارڈ بوت ءُ وتی وھد ءَ سک باز نامدار بوت۔
شش ،ہفت نوار آئی ءَ لوگانی تہ ءَ ریکارڈنگ کتگ۔ ایشانی زیمل مراد ءَ جوڑ کتگ اَنت ءُ رِدھم ءِ سرءَ یوسف بلوچ بوتگ۔دُھن استاد رحمت بلوچ (بینجووالا)ءَ جوڑ کتگ اَنت ۔شعر آغافیض،گل محمد گلو ءُ خیر جان ءَ نبشتگ اَنت ۔
واجہ حیدر سربازی ءِ دوستریں گشندہ محمد جاڑک بلوچ ءُ دوستریں شاعر حامد پردیسی بوتگ۔
آئی ءَ مزنیں وھدے نادراہی ءَ گوازینتگ ءُ چہ دیوان ءُ گشندہی ءَ دور بوتگ۔ءُ مئے لائقی اے بوتگ کہ ما آئی ءِ حال پُرسی ھم نہ کتگ۔ بژن ءِ گپ اِنت کہ چُشیں شیرکنیں توار ءِ واھندیں گشندہ ءَ مرچی آئی ءِ کش ءُ گور ءِ مردم پجا نیاراں۔۔۔