پہ مبارک کازی ءَ ڈاکٹر غفور شادءِ موتک
پہ مبارک کازی ءَ موتک
شائر: ڈاکٹر غفور شاد
کئے ترا آرتگ مئی شپ کوریں مُجاں گار کتگ
کوریں ھرپانی
اے کورءُ لگوریں گیدی
وت ستا ءُ اے کوہ پروش ءُ
نِزوریں گیدی
چم پچپیں دروگ نبیسانی
اے کوریں گیدی
تئی گالانی تْرپیشکاں کجا ماریت اے جہان
کدی باریں وتا گندیت ترا چاریت اے جہان
گُنگءُ کرّیں اے جہان
دیدگاں کوریں اے جہان
چینچو تاموریں جہان
وتی شیدا وتی عشقءَ اے گرپتاریں مناں
وتی جندءَ پہ ھدوکاں
گارءُ سرگاریں مناں
کئے ترا آرتگ اے تاموریں مُجاں گار کُتگ
کئے ترا زانت گوں لبزانی لڑیں الماساں
کئے ترا زانت ءُ تئی اندرءِ روکیں آساں
آس پہ چیدگے زندءَ بلئے آسءَ کئے زانت
تئی چمانی اے آسگواریں وتاسءَ کئے زانت
تئی آسگوازیں اے گالانی شُناسءَ کئے زانت
کئے ترا آرتگ منی شپکور یں مجاں گار کُتگ؟؟؟