مبارک قاضی ءِ لچّہ: گس ءَ واتر کنگ لوٹاں
لچّہ : گس ءَ واتر کنگ لوٹاں
لچّہ کار: مبارک قاضی
بیا اے چاگرد جتیں زندگی ءَ گند منی
وت وتی جند ءِ تَھا در پہ در انت جند منی
پہ من ھچ پشت نہ کپتگ دگہ میراس ءَ متاہ
دل زھیراں منى سپتگ تو سر ءَ سند منی
کئے بزانت باریں منى واھگ ءِ آسر چے بیت
دردے چؤلاں داں سرے چیر ءُ سر انت زند منی
من کہ مھرانی مساماں وتا بندیگ کتگ
نوں پدا گوں من ءَ چوں زُرت بنت سوگند منی
سد بَر ءَ ساہ منی بلّے چہ جبین ءَ دربئیت
یک برے بیا تو سرون ءَ کلھے نند منى
اے شگانے پا بلوچانی بھشتیں وتن ءَ
پہ دو کلدار ءَ بھا بوتگاں پرزند منی
بلکیں کیمیا گراں در گیتکگ ھمک درد ءِ دوا
پمن مھرم بلے کلپورگ ءُ ازگند منی
ھرکجا چاراں زِر اِنت يا منی چماں ریک انت
قاضی شر دیست نہ کنت زنگی ئیں دور گند منی