راجمان تاک نُہمیءِ بابتءَ چندیں دانک۔ عباس حسن
راجمان تاک نُہمیءِ بابتءَ چندیں دانک
چمشانک: عباس حسن
چمشانک: عباس حسن
راجمان تاک ءَ اگاں من گیشینگءِ جھدءَ بہ کناں گڑا منی نزّءَ راجمانی سائنس(social Science)ءَ گوں بندوکیں اوّلی بلوچی جنرل تاک انت کہ امین ضامن بلوچءِ شونکاریءَ چاپ ءُ شنگ بوگءَ انت۔ بلوچیءَ ردانک نویسیءِ ربیت چونائیءَ ڈکالیءِ پداں کپتگ ءُ راجمانی سائنسءِ جاور چد ءُ گنتر انت؛ اگاں من چوش بہ گشاں کہ راجمانی سائنس ماتوئی چماں گوں چارگ بیت گڑا من بگندئے رد مہ باں۔۔۔۔ بلے چریشیءَ ابید من وھدے امین ضامنءَ بس گنداں کہ وتی گشادءَ اے نیمگءَ ھاسیں دلگوشی دیگءَ انت گڑا دمانے منی ایمان کالبءَ بیت۔ پدا رجمان چوشیں ھیرّاں بُستیں تاکے اوں نہ انت کسے باندا پاد بئیت انت بہ گش ایت کہ نام ءُ نامداری، یا کہ ادارکی تب ءُ میلےءِ مانزمان انت بلکیں راجمان یک انچیں تاکے کہ بازیں دری ءُ کالونیل بیانیہ ءُ ڈسکورسانی پروشگءِ زانشتی تاکے، اے ڈسکورس توری لبزانکی بہ بنت یا سیاسی بہ بنت، رجمانزانتی، نیکراہی ءُ شھزانتیءَ گوں بندوکیں بہ بنت ھمیشانی ھلاپءَ زانشتی جھدے۔ راجمانءِ انوگیں تاکءَ مارا جتائیں بنگپانی بابتءَ سَندی ءُ پٹپولی نبشتانک پہ وانگءَ رس انت، انچشکہ اولی نبشتانک امین ضامنءِ وتی انت کہ لبزانک ءُ بلوچی نگدءِ بابتءَ انت۔ امینءِ ھیالءَ بلوچی نگدءِ ھما پریم کہ است انت یا ایشیءِ گیش ءُ گیوار کنگءِ زانشت کہ است انت آ دری انت ءُ اے دری نگدی پریم بلوچی ساچشتءِ گیشینگءَ کارآمد نہ انت پرچہ کہ اے نگد ساچشتءِ راستیءِ لیکہءَ چہ سستگ۔ دومی نیمگءَ آ بلوچی نگدءِ اسلیں بنزہءِ ھم شوھازگءِ جھدے کنت۔ پمیشکہ اے تران پہ من مردنی نگدءِ دریگانی پچ کنگءَ نوکیں در ءُ وسیلگ انت۔ چریشیءَ ابید پاکستانءَ سیاسی کرپشنءِ سرءَ ھم ڈاکٹر ذولفقار علیءِ رجینتگیں نبشتانکے مان انت کہ امین ضامنءَ بلوچیءَ ترینتگ، ایشیءِ وانگءَ رند مردم ذولفقارءِ ھیالاں زانت کرت کنت۔ آئیءِ نزّءَ پاکستانءِ سیاسی کرپشنءِ سببءَ چہ اُلسی راجمانءَ دلتپرکہی ءُ بے تاھیریءَ سرکش اتگ۔ اے نبشتانکءَ مارا دگہ ھم بازیں سرپدی دست کپ ایت، چوشکہ اگاں ما زانگ بہ لوٹ ایں کہ پاکستانءِ کارگل(ادارہ) ءُ رھبندءِ رد ءُ بندءِ مستریں دست کئی انت گڑا ما زانت کرت کنیں کہ کار گلانی رد ءُ بند برطانیہءَ بکشاتگ انت؛ بزانکہ اے نچینبندی(arrangement) ھمائیءَ کرتگ انت ءُ داں مروچی پاکستان برٹش کالونیل رھبندءَ گوں ساہ کشگءَ انت۔ اے ردءَ اے سیاسی کرپشن پاکستانءَ روچے انچیں گپچلےءَ پرینیت کہ آئیءِ سر ماں سواساں نہ کپ ایت۔
ایشیءَ ابید سبالٹرن تھیوریءِ بابتءَ فدا احمدءِ رجینتگیں نبشتانکے ھوار انت گوں۔ اے نبشتانک سبالٹرنءِ بندپتری پشدرءَ بگر داں ھُندوستانی پترنویس راناجیت گوہاءِ لیکھانی پہمگءَ کمک کنت۔ چریشیءَ ابید وھدے من راجمانءِ نزوریانی بابتءَ گپ بہ کناں گڑا منءَ درستاں گیش ھما نزوریانی مرت ءُ مارشت بوت کہ آ راجمانءِ کُلیں نبشتانکانی ھمرنگی ءُ ھمگونگی ات۔ ترا سما بیت گشئے اے سرجمیں کتابءِ زبان شونکارءَ تراشگ ءُ پیاز اتگ۔ تراشگ شر انت اے شونکارءِ ھک انت بلے شونکار بائد انت بنرھبند ءُ سیاھگءَ یکرد ءُ یک پیم بہ کنت نئیکہ آ ایدگہ نبشتہ کارانی درشانداب ءُ لبزگنجاں وتی بہ کنت۔ چوشکہ تو وھدے فدا احمدءِ رجانکءَ وان ئے گڑا ترا امین ضامنءِ لبزگنج، درشانداب گندگءَ کیت۔ دگہ نزوری یے ھمیش انت کہ اے تاکءَ فدا احمدءِ رجانکءَ ابید سرجمیں نبشتانک ءُ رجانک امین ضامنءِ وتی انت۔ بائد انت سرجمیں تاک یک کسےءِ مہ بیت، اگاں یک کسےءِ سرجمیں نکان بہ بنت گڑا تاکے نہ بیت بلکیں کتابے بیت۔ سیمی نزوری کہ من مار اتگ آ ایش انت کہ ھما جاہءَ گالریچ ءُ لس زبان گٹاں پیلو کنگءَ انت گڑا اودءَ زوریں گالبند کارمرز بوگءَ انت ھمیشیءِ سببءَ بلوچیءِ ھملسون ءُ ریچوکیں زبانءِ تام ءُ لزت انگریزی ءُ اردوءِ کچل ءُ ماجیناں گوں ھوار بوگءَ انت۔ پمیشکہ وانوک باز رندءَ مان اڑگءَ انت کہ گشگ چی بوگءَ انت۔ نوکیں گالبندسازی بگندئے کسےءَ پہ جیڑھے بہ بیت بلے منی نزّءَ مستریں جیڑہ ھمیش انت کہ بے زلوری ئیں گالبندانی کارمرزیءَ بلوچیءِ تام ءُ چَس بُرتگ۔
گڈیءَ من امینءَ را اے وڑیں پرارزشتیں تاکےءِ برجمینگءَ وتی مرادیں واھگانی درشانیءَ کناں ءُ امینءَ را وتی سلاہے ھم دیاں گوں کہ راجمانءَ تاکءِ لوٹ ءُ گزرانی ھمرائیءَ ایدگہ نبشتہ کارانی ھم ساچشت ھوار کنگ بہ بنت پرچہ کہ اے سوشل سائنسءِ بازیں زانتکاریں مردم دست کپ ایت کہ آ کار گرگ بنت، ءُ بلکیں آوکیں وھدءَ پدا ھمے مردم بلوچی زبانءَ وتی پِڑءَ شریں ساچشتءِ دیمءَ آرگءَ سوبمند بہ بنت۔
تئی گام ءُ وتی زبانءِ پُرمہریں واھگ دائمءَ میزران بات اَنت !