کازی ءِ پُرس ءِ پترءَ
زاھدہ رئیس راجی
ھرکسے دنیا ءَ اتکگ ، روگ ئِےالمی انت، بلے لھتے انسانی روگ نہ تھنا آھانی جند ءِ کھول ءُ نزیکیں مردماں تورین ایت، بلکیں آھانی سرجمیں راج ءَ اوں پدرد کنت۔چونائی ءاے تیزگامیں زمانگءَ انسانانی زند ءُ مرگ ءَ را ھچ جاہ ءُ بستار نیست ءُ چوشیں درورانی رسگ گران اِنت کہ یک انسانے ءِ بیرانیءَ سرجمیں راج یکپاریگہ پدرد بہ بیت، پُرس ءِ پتر ءَ پچ بہ کنت، ھزارانی کچ ءَ جنازہ ءَ کوپگ بہ دنت، ھمک روچ مردمانی مُچی یے آئی ءِ کبرءِ سروناں پہ پاتیہ ءِ وانگ ءَ سر بہ بیت، بازیں جاھاں غائبانہ نماز ِ جنازہ دیگ بہ بیت، بازیں جاھاں قران وانی کنگ بہ بیت، گوں آئی ءِ مھر ءُ یاتاں بندوکیں مھلوک ءِ ھمک کسان مزنیں شَھر ءُ میتگ ءُ بازاراں ھزارانی کچ ءَ بے تواریں روانکے برجم دارگ بہ بیت ، چراگ بالینگ بہ بیت، آئی ءِ پربستگیں سوت الھان کنگ بہ بنت، پہ آئیءَ ھمکروچ یاتانی دپتر پچ کنگ بہ بنت، پہ آئی ءِ کرد ءِ ساڑایگ ءَ دیوان ءُ مجلس ایرکنگ بہ بنت، تاک ءُ روتاک ءُ ماھتاک سیاہ کنگ بہ بنت، چاگردی رسانکدارانی تہ ءَ چہ ھپتگے ءَ گیش پُرس ءِ پتر پیچگ مہ بیت، اے ھستی بیدے مبارک کازی ءِ دگہ کسے نہ انت۔
وتی دوستانی شگان ءُ گم ، وتی دُشمانی بد ءُ ستم
چوشیں کازی یے کہ مبارک انت پدءَ مشکل انت کہ ودی بہ بیت
کازی کہ چہ سرءَ بہ گرتاں پاد ءِ پنچ ، بلوچے ات، آئی ءِ مھر ءُ اشک ، آئی ءِ جزبگ ءُ مارشت، آئی ءِ ھیال ءُ لیکہ، آئی ءِ کار ءُ کرد ، درست گوں بلوچ ءِ زمین ءَ پیوستگ ات انت، گوں بلوچ ءِ ارواہ ءَ ڈُک اتگ ات انت ءُ بلوچی ءِ روتگاں ساہ اش زُرتگ ات۔
وھدے آئیءَ شئیر الھان کُت راج ءَ وتی دل ءَ جاہ دات، وھدے آئیءَ وت ءَ بلوچے کنگءَ بلوچی کردے پیش دارگ ءِ جُھدے کُت، بلوچ ءَ آ بڈءَ بست۔ کازی ءِ مرگ ءَ پد راج ءَ آ ھمنچو شرپ ءُ ازت دات کہ ایشی ءِ درورے سرجمیں خطہ ءِ تہ ءَ دست نہ کپ ایت کہ کجام ھم دگہ راجے ءَ وتی نامداریں شائر ءُ لبزانت ءَ را چوشیں شرپ ءُ ازتے بکشاتگ۔
بیدءِ کازی آ دگہ کے ات کہ آئی ءِبیرانی ءِ دوازدہ روچ گوزگ ءَ پد ھم پُرس ءِ پتر یکشلہ پچ ات ءُ مروچی ما ھمائی ءِ یاتاں پرینگ ءَ ایں۔
ماں انٹرنیشنل ریلیشن شپ ءَ ماسٹرز ءِ سَند زورگ ءَ رند فائینس ڈیپارٹمنٹ ءَ 19 گریڈءَ افسریءِ اُگدہ ءَ سربوگ ءَ پد ھم، کازی ءَ وتی سرماں آزمان ءَ نہ ڈُکینت ۔ نامداریں عالم ِ دین قاضی عبدالرحیم کہ مکران ءِ یک بلائیں ھستی ءُ لبزانتے ات ، آئی ءِ نماسگ بوگ ءَ پد ھم مبارک کازی ءَ وت ءَ چہ اے دگراں جتا پیش دارگ ءِ جُھد نہ کُت۔
یک نیمگے آ گوں وزیر ءُ گزیراں نشت، دومی نیمگءَ آ گوں پوریاگر ءُ مید ءُ شپانک ءَ ھم نیاد بوت، اگاں مزنیں گاڈیاں سوار بوت، آ اوشتر ءَ اوں جماز ات ءُ ھرگاڈی ھکلیلونک ءِ اوں کش ءَ نندوک ءُ میتگ ءِ سئیل کنوک بوت۔آ نمازیانی سرپ ءَ اوں گون ات ءُ زگریانی دردءَ اوں شریدار اَت، آ کسان سالیں بچکانی اوں سنگت ات ءُ پیرءُ کماشانی ھم ھمبلے ات، آ اگاں ترندآپءِ ڈینگوکانی دیوانءَ ھنوش ات ، آ گوں سنگینیں مجلساں گوں سنگینی ءَ تران کنگءَ اوں ھوار ات، کسے ءَ آ ملنگے گوشت، کسےءَ ولی یے ، کسے ءَ آ شائرے زانت، کسے ءَ آ بے سُد ءُ نہ بزانتے کُت، بلے کازی ءَ وت ءَ پہ شری زانت کہ من کے آں ءُ چے کنگءَ آں۔
اے دنیا دروگ ءِ بازار انت مبارک
من ءَ چے چے ، ترا چے چے گُشان انت
کازی ھما ات کہ آئی ءَ بلوچی گوشندھانی گچین مٹینت، آئی ءَ سوت گوشداروکانی تام ءُ لذت مٹینت، آئی ءَ سِیرانی سرءَ بانورانی سرگوپ ءِ سوتانی الھان مٹینت۔نوارانی زمانگ ءِ نواربھاکنوکانی گوشگ انت کہ آوھد ءُ زمانگءَ کسے گوشندھانی نوکیں نوارانی گرگ ءَ دُکّاناں اَتکگ ، گُڑا آھاں بس ھما نوار لوٹ اتگ اَنت کہ آھانی تہ ءَ مبارک کازی ءِ شئیر مان بہ بنت۔
کازی ءَ ماراتگ ات کہ بلوچی شئیری تب چون مٹینگی انت۔  کازی ءَ جدیدیت اوں زانتگ اَت بلے اے اوں زانتگ ات کہ زندگ ھما شئیر بنت کہ لس مھلوک آئی ءِ رسانک ءَ سر بوت بہ کنت۔
بلوچی لبزانک ءَ شئیری ساچشتانی نگد ءِ سرءَ مردم کینگ ءِ دراں بوج انت، بلے زرنوشت ءِ پیشگال ءَ بہ چار ات، آ مبارک کازی اِنت کہ وتی ساچشتانی سرءَ نگد ءِ ھک ءَ وتی وانوک ءِ دست ءَ وت دیان انت۔
بلوچی لبزانک ءَ را داتگیں دَہ شئیری ساچشتانی کتاب ، مبارک کازی ءِ داتگیں انچیں مڈی انت کہ ھرکتابے وتی یک جتائیں دنیا یے پیش دارایت، جتائیں ازمے پیش دارایت۔ آ کہ پہ دلدوستیں کاڑاں شائری کنت، آ پہ ورنائیں بچکانی دل ءِ واھگاں زبان دنت ، آکہ چولاں ساز کنت، آ کہ پہ گوانزگ ءَ وپتگیں بچ ءَ لیلو جنت، آ پَہ رپتگیناں زھیریگ جنت، موتک جنت ، کُردیگ جنت۔
اے کتاباں اشتر ءِ پریات اوں مان ، زمین زادگانی بزگی ءُ واری ءِ دلبُریں داستان اوں مان ۔ بلے کازی ءَ نہ اے شائری ءِ مُز گپت، نے کہ ایش ءُ وت ءَ بھا کُت، پمشکا راج ءَ مروچی آئی ءِ بستار ماں آزمان ءَ رسینتگ۔
19 گریڈ ءَ پہ شانے ءَ ڈائریکٹر فائنس ءِ پوسٹ ءَ افسری کنگ، ھک ھلار ءَ گوں انچوش سنگتی کنگ کہ پہ وت ءَ یک لوگے اڈ کُت مہ کنت، وتی پگار ءِ گیشتریں بھر ءُ وتی پینشن ءِ سرجمیں زراں پہ ھُداءِ نام ءَ راج ءِ نیزگارانی گورءَ بھر کنگءُ وت اللہ ءِ نام ءَ سرءَ نندگ ءُ توکل کنگ کہ من ءَ چہ دگہ درے ءَ رس ایت، چوشیں کازی ءَ کہ ولی گوش انت گُڑا رد نہ کن انت۔
من کازی ءِ یک لچہ یے بنام ” ھمے ڈول بیت “ ءَ گوں وتی گوشتانک ءَ کُٹین آں۔
”ھمے ڈول بیت“
ھمے ڈول بیت
بس ھمے ڈول بیت
من نزانتاں کہ مرگ ءَ چہ ساری مرآں
ساھگانی گناھگار انچوش بنت
من کہ چمشانک دات دیم پہ دروازگاں
ھچ ندارگ نگاھانی پیم ءَ نہ اَت
تاک یک نیمگے
ھاک یک نیمگے
کانچ یک نیمگے
زند یک نیمگے
مرگ یک نیمگے
کسّی پاداں نہ شُت زندگی ءِ سواس
من رواجانی معنا بدل کُت نہ کُت
دیگرانی مُجاں میم انچوش بنت
من مساپر جسانی تہ ءَ گار اتاں
جُلگھانی تہءَ ایوک ا تاں وار اتاں
مُردنی چوں کن ئے؟
مردمانی بدل کانچ ءُ کاگد نہ بنت
ھاوند کازی ءِ ارواہ ءَ بھشت ءَ جاہ بہ دنت ءُ نام ءُ توار ءَ ابدمان بہ کنات۔ شالا انچوش بات۔
منتوار
جاگہ ءُ رمس :
کراچی آرٹس کونسل ۔ 27 ستمبر ، 2023 روچ چارشنبہ
ارشاد ِ اسلامی چابھار ، 28 ستمبر ، 2023 روچ پنچ شنبہ
٭
دلگوش: گوشتانک دیگ ءِ وھد ءَ وھد ءِ پابندی مئے سرءَ جنگءِ سوبءَ اے گوشتانک ءِ لھتے لبز ءُ لھتے شئیردیوان ءَ گوشگ نہ بوتگ انت۔