فضل ھیات۔ چِنچو دیوانگیں مَردم منی راہ ءَ کَپتہ
غزل فضل ھیات
چِنچو دیوانگیں مَردم منی راہ ءَ کَپتہ
ھَو بِگندے مئے گنوکی نوں سَماہ ءَ کپتہ
من وتی جِند نزاتہ ءُ نہ دیستہ من وت ءَ
نوں کہ زاناں اے گنوکی منی ساہ ءَ کَپتہ
وت گَلا مرچاں زبان اوں تئی باھوٹ نہ بیت
چونیں کِردے اے تئی سَر کہ پہ زاہ ءَ کَپتہ
تو کہ بے ھال کُتہ دُور بُشوھازے بُرو
پُرشتگیں دل منی اَنگت ھما جاہ ءَ کَپتہ
شانتُل ءَ نالگے الھان کُتہ چِینک نہ چِنت
بلکنہ بَر ءِ کھیر نوں سَر ءُ شاہ ءَ کَپتہ
شاگ دریا ءَ نہ لُڑّیت ءُ نہ چُکّیت چولاں
حَملوں اَھد ءِ منی سَنج سِلاہ ءَ کپتہ
مَٹ اِتہ رنگ پدا موسم ءِ تَبگواتیں لَد ءَ
میتگ ءِ گْوات پہ نازے چہ تَماہ ءَ کَپتہ
کوریں رَہ دَربَر ءِ ہمراہ ءُ مَھاری ءَ فضل
مَردمے دونشی پدا میتگ ءِ چاہ ءَ کَپتہ