کمبر ءُ کازی دائم گیر کاینت،۔ پُرسدانک۔ نبشتہ کار: زاھدہ رئیس راجی
پُرسدانک
کمبر ءُ کازی دائم گیر کاینت
زاھدہ رئیس راجی
وھدے کمبرءِ شھیدی ءِ ھال سر بوت، ھُشک ءُ ھیران ءُ سنگ ءُ سیاہ اتاں کہ چے بوت، چون بوت، کے ءَ کُت؟ پرچہ کُت؟ مجگ ھچ کار ءَ نہ ات۔اے بدیں ھال ءِ سرء نہ ستک بوت، نے باورے، زوت نیٹ پچ کُت کہ بہ چاراں کمبر بلکیں آن لائن اِنت ءُ اے بدیں ھال دگہ ھمنامے ءِ بہ بیت، بلے کلوھانی ردءَ کمبر ءِ نوکیں ھچ کلوھے نیست ات، بیدے ھما کلوھانی کہ سے چار روچ پیسرءَ کُتگ ات ئِے۔ پدءَ فیس بُک ءَ تالانیں آئ ءِ شھیدی ءِ اکساں، منی بے باوری، پہ زور باور کنائینت کہ نوں تئی اے برات پہ دائمی رپتگ ۔
بلے من ھردیں کہ کازی ماں دیوانان دیست، کمبر الّم ءَ گیر اتک، کمبر ءِ شیتانی ، آئ ءِ ستائینگ ، آئ ءِ دلبڈی درست گیر اَتک انت ءُ وھدے کازی ءِ نگاھانی تہ ءَ پُرس ات، اودءَ کمبر ءِ مھر ءُ شرپ اوں گندگ بوت۔ چریشی ءَ یک عقیدت ءُ اھترامے ءِ سیادی یے ودی بوت۔
کازی ءَ گوں اولی آشنائی چاگردی رسانکدراں بوت۔ برے واٹس ایپی گروپاں ءُ برے فیس بُک ءَ ءُ ھمے درگت ءَ آ باسک لبزانکی دیوان ءَ اوں ھوار بوت۔ ادءَ برے برے دگرانی پوسٹ ءِ چیر ءَ آئ ءِ چمشانک یا کمنٹس گندگ بوت انت۔
پدءَ یک انچیں وھدے اوں اتک کہ بازینے ءَ دیست کہ منی یک نبشتانکے ءِ باسک ءَ شنگ بوَگ ءَ رند کازی ءِ وال ءِ سرءَ منی بابتءَ ترندیں گپ ھبرے اوں نبیسگ بوت، چریشی ءَ من سک دلرنج بوتاں۔ پدءَ کازی ءِ نزیکیں مردماں من ءَ گوشت کہ بوت کنت کسے ءَ تئ بابتءَ آئ ءِ گوش پُرکُتگ ءُ دروگ بستگ، پمشکا تو اے گپّاں دل ءَ میار۔ من چارات کہ ھروھدءَ منی دیم ءَ چوشیں گپ ھبرے بئیت، منی زھن ءُ دل دگہ کارانی نیمگءَ دلگوش دات نہ کن انت ءُ وھد ھم زوال بیت، پمشکا من آئ ءِ آئ ڈی چہ وتی گورءَ در کُت بزاں انفرینڈ کُت۔
تاں اے وھد ءَ من مبارک کازی ھجبردیم پہ دیمی ءَ نہ دیستگ ات۔
زندگی ءِ اولی برءَ من دیم پہ دیم ءَ کازی گوادر ءَ دیستگ ات۔ سید ھاشمی ءِ سالروچ ءَ بھرزورگ ءَ من ءُ کماش گون ات ایں۔ شئیری دیوان ءِ بھر ءَ کازی گندگ بوت کہ آ تلو ءِ سرءَ، سرکپگ ءَ ات کہ اناگہہ ءَ چم ئِے منی کماش ءِ سرءَ کپت ءُ چَہ ھمودءَ دستاں سُرینان ءُ سلام ھلیک کنگءَ ات۔ یک نگاھے آئ ءِ منی سرءَ اوں کپت ءُ پدءَ دگہ نیمگءَ دلگوش بوت۔
اے وھدءَ آڈیٹوریم ءِ دروازگ ءِ نزیک ءَ من وتی کماش محمد سلیمان رئیسی ءِ کش ءَ جھل ءِ سندلیانی سرءَ اولی ردءَ نشتگ اتاں۔ کماش ءَ گوشت کہ کازی تئی سوب ءَ منی گورءَ نہ اتکگ ۔ ھمے درگت ءَ ناکو الی ایسا ءَ من ءَ کلوھے دیم دات کہ ترا پربندے وانگی انت ءُ دمانے ءَ رند تلو ءِ سرءَ منی نام توار پرکنگ بیت ءُ من شُت وتی دستونکے ونت ءُ ایرکپت آں کہ ڈاکٹر زینت ءَ من ء گوانک جت۔
ڈاکٹر زینت ڈائس ءِ دیم پہ دیم ءَ نندوک ات۔ بزاں ما راستی دروازگ ءِ دپ ءَ نندوک بوتگ ات ایں ءُ آ چپی دروازگ ءِ نزیکءَ ۔
آئ ءَ منی گوش ءَ گوشت کہ تو بیا منیگ ءُ زیا بلوچ ءِ میان ءَ بِہ نند کہ چوش مہ بیت کازی بئیت بہ نندایت۔ من بچکند ات ءُ آئ ءِ کش ءَ شُت نشت آں۔ آ گوشگ ءَ ات کہ کازی ھنوش انت ءُ ھمار اِنت ءُ اے جاور ءَ آ ھچ پجا نیارایت۔
وھدے من تلو ءِ سرءَ اوشتاتگیں کازی دیست کہ آ دیوان ءَ آیوکیں مردماں گوں وشگپی کنگ ءَ ات ءُ مردمانی گپ ءُ جُستانی پسہ دیگ ءَ ات ءُ ماں تلو ءِ سرءَ ناکو الی ایسا ءِ مُج اتگیں مُرک ءِ نگیگیں جاورانی گندگءَ گوں من کازی ءِ نگاھانی پُرسگ بنا کُت۔ سما کُت کہ آ انچو ھنوش اوں نہ انت کہ کس ءَ پجّا میار ایت۔ رند ءَ منی چمان اے اوں دیست کہ کازی چہ تلو ءَ ایر کپتگ ءُ کماش ءِ گورءَ اتکگ ءُ آئ ءَ گلائش کنگ ءَ اَت۔
پدءَ شئیری مراگش ءِ ھلاسی ءَ رند دیوان برجم داروکانی نگیگی ھم دیست کہ آ کازی ءِ آھگ ءَ گوں وش وش نہ ات انت ءُ استاد داد ءِ سرءَ زھرءَ پُر ات انت کہ آئ ءَ زانتگ کازی ھنوش انت پرچہ مراگش ءَ یاورتگ ات ئِے۔
یک نیمگے ءَ منی گورءَ چاگردی رسانکدر ءِ سرءَ کازی ءِ ھما ترندیں پوسٹ ات ءُ دومی نیمگءَ اے مردمانی وڑ وڑیں گپ ءُ ھبر، ایشاں من ءَ چہ اے درستیں چست ایراں ، یک کر بیگ ءِ شور دات۔
۱۱ نومبر ۲۰۱۸ ءَ ماں فقیر کالونی ءَ نوکاپ لبزانکی دیوان ءَ زالبولانی چاگردی کرد ءِ سرءَ مراگشے ایر کُتگ ات ءُ من بھر زورگ ءَ اتاں کہ اودءَ کازی اوں اتک۔ کازی مردینانی ردءَ گوں کماش ءُ دگہ سنگتاں گون ات، مراگش ءِ گُڈسرءَ کازی تلو ءِ سرءَ ھاسیں مھمان ءِ جھت ءَ توار پر کنگ بیت۔
کازی بلوچ چاگرد ءِ جنیں آدمانی بابتءَ گوں سنگینی ءَ گپ ءَ ات ءُ آْئ ءِ ھما اکس کہ منی دیم ءَ گوادر ءَ نکش بوتگ ات بدل بوان اَت کہ اناگہہ ءَ آئ ءَ زاھدہ رئیسی ءِ لبزانکی کارانی توسیپ ءُ ستا کنگ بنا کُت۔ من سٹّے کُت ءُ گوں ھُشک ءُ ھیرانی ءَ آئ ءَ چاران بوت آں ءُ وت ءَ چہ وت ھجالت ھم چہ اے ھجالتی ءَ من آئ ءِ منتواری اوں نہ کُت۔
مراگش ءِ ھلاسی ءَ پد وھدے من وتی چادر ءِ زورگ ءَ جھل ءِ تبک ءَ اتکگ اتاں کہ ھمے درگت ءَ کازی اوں پت ءُ دگہ لبزانکی مردمانی ھمراھی ءَ جھل ءَ ایر کپتگ ات۔ آ تچک ءَ منی گورءَ اتک، من سلام کُت ءُ آئ ءَ ھلیک گپت ءُ منی سرءِ سرءَ دست ئِے سمارات ءُ گوشگ ءَ لگ ات کہ تو سلیمان ءِ چُک ئے بزاں منی چُک ئے ۔ تئ لبزانکی کاراں منی دل سک وش کُتگ ۔ ھمے پیمءَ برجاہ بہ دار ئِے۔
من مارات کہ بلکیں کماشءَ آئ ءَ منی بابتءَ گپ ھبرے کُتگ۔ بلے وھدے کماش ءَ گوشت کہ تئ کارانی بابتءَ من گوں کازی ءَ ھچ نہ گوشتگ منی ھیرانی گیشتر بوت کہ اگاں مبارک کازی ایش انت کہ چہ وت ءَ کسترین ءَ انچو ساڑائیت گُڑا آ کے اَت کہ چہ کازی ءِ نام ءَ من ءَ ڈوبارگ ءَ اَت؟
۲۰۱۹ ءَ وھدے عندلیب گچکی ءِ کتاب کُلی ءِ دیمدرائی ءِ دیوان ءَ کازی توار کنگ بوت کہ بئیت عندلیب ءُ اے دیوان ءِ بابتءَ دو گپ بہ جنت، کازی ءَ گپ گپ ءَ اناگہہ ءَ گوں سنگینی ءَ زاھدہ رئیسی ءِ توسیپ کنگ ءُ دلبڈی دیگ بنا کُت۔
اے وھد ءَ ھم من جھل ءَ سندلیانی سرءَ کازی ءِ دیم پہ دیم ءَ نندوک ات آں ءُ کازی منی نیمگءَ چارگ ءُ گپ ءَ ات ءُ من چہ ھجالت ءَ سرچست کنگ ءَ نہ اتاں۔ اے دوئیں مراگشانی تہ ءَ کازی ءَ وتی شخصیت ءِ سنگینیں پھنات من ءَ پیش داشتگ ات ءُ من منتواری گرگ ءِ وام وتی سرءَ لڈان ءُ بے توار اتاں کہ مراگش ءَ رند کازی ءَ من ءَ توار کُت کہ بیایاں ءُ گوں آئ ءَ اکسے بہ کش آں ءُ من ھما مردم اتاں کہ من بازیں باسکے آ وھد ءَ اکس کشگ ءِ مکن کُتگ ات بلے کازی مکن کنگ نہ بوت۔
چد ءُ پد من وتی وانگ ءُ تھیسز ءُ دگہ زند ءِ جنجالاں انچوش مان گش اتگ اتاں کہ بازیں دیواناں ھوار بوت نہ کُت ءُ من چہ دراھیں چاگردی رسانکدراں اوں وت ءَ یک کر کُتگ ات بلے کازی ءَ وھد وھد ءِ سرءَ باسک لبزانکی دیوان ءَ پوسٹانی چیر ءَ کمنٹ دیگ برجاہ داشتگ ات ءُ آئ ءِ بازیں کمنٹے ءَ آئ ءِ زانت ءُ سرپدی پدر ھم بوان بوت۔
بلے بیا کہ ھمے زوتاں چاگردی رسانکدر گوں زاہ دیوکاں پُر بوت ءُ زاہ دیوکانی مزنیں کچے ھما فیک آئ ڈیزئیگ ات کہ آھاں کازی ءَ گوں کُنّت اَت۔ ھمے درگت ءَ میر ساگر ءَ قاضی ءَ گوں گپ ءُ تران ءُ لبزانکی جُست پُرسانی سلسلہ یے بنگیج کُتگ ات، من ءَ گوانک ئِے جت کہ ادءَ ھوار بہ باں۔ اے لبزانکی گپ ءُ تران انت ءُ ھمک لبزانتے وتی ھیال ءُ لیکہ ءَ ھوار بہ کنت ،گُڈ سرءَ آ ایشاں کتابی دروشمے دنت۔
من میر ساگر تچک ءَ مکن کُت ءُ گوشت کہ من ءَ زاہ ءِ اوپار نیست ءُ چہ من ءَ گیش منی لوگ ءِ مردماں نیست۔ ءُ مروچاں ھال ایش انت کہ کسے کازی ءِ نام ءَ پہ شَرّی بِہ گپت ، آ زاہ وارت، کسے کازی ءِ پربندے دیم ءَ بیارایت ، زاہ وارت، کسے کازی ءِ گپانی پلامرزی ءَ بہ کنت آ زاہ وارت، شمئے اوپار ءَ سد سلام انت کہ انچو زاہ ورگءَ رند ھم کارءَ اِت۔
آئ ءَ من ءَ سرپد کنگ ءِ جُھد کُت کہ ما وَ علم ءُ زانشی گپ ءُ تران کن ایں تاں نوک دربراں رھشونی بہ رس ایت ۔ زاہ دیوک تاں کد چوش کن انت۔ من پسہ ات کہ مئے نیمگءَ زاھانی بیر جنگ ءُ مِڑگ انت پمشکا گنتریں شدّتے مہ بیت ، من ءَ وتی دیوان ءَ ھوار مہ کن۔ بلے ھو۔ من شمارا الم ءَ وانان ءُ دربراں۔ بلے دزگٹیاں من ءَ موہ نہ دات کہ اے سلسلہ ءِ دراھیں گپ ءُ تراناں بوان آں۔
ھمے درگت ءَ یک روچے کماش ءِ گورءَ ماں واٹس ایپ ءَ نبشتانکے آتک کہ آئ ءَ من ءَ دیم دات ءُ چارگ ءِ گوشت۔ من چاراں اے نمدی ءَ میرساگر ءَ گوں مبارک کازی ءَ تران کنگ ءَ انت۔ منی چم وتی نام ءِ سرءَ وَ کپت بلے من کہ یک چکاسے ءِ تیاری ءَ دزگٹ اتاں اے نبشتانک ھم باندا وانگ ءِ نیمون ءَ یلہ دات۔
پدءَ یک دیوانےءَ اسحاق خاموش ءَ گوں دوچار کپتاں آئ ءَ گوشت کہ ” بانک کازی ءَ تئ بابت ءَ وش نبشتہ کُتگ۔ آ راست گوش ایت۔ “
من سٹّے کُت کہ اے نبشتانک یا نمدی منی دیم ءَ وَ گوستگ، بلے باندات ءِ نیمون ءَ یلہ داتگ ات ءُ دوبر چارگ اوں شموشتگ ۔
وھدے دوبر وانگ بنا کُت، گنتر ھجالت بوت آں کہ مبارک کازی ءَ وَ پیسریگیں پیم ءَ من ءَ چہ منی بستار ءَ گیش ساڑائیتگ ءُ بلوچی لبزانک ءَ جاھے دیگ ءِ جُھد کُتگ۔ نوں پہ من ءَ لازم ات کہ من کازی ءِ منتواری ءَ المءَ بہ کن آں ءُ نوکی جیڑگ ءَ اتاں کہ نمدی یے کازی ءِ نام ءَ نبشتہ بہ کن آں ءُ میر ساگر ءَ بہ دیاں کہ آ کازی ءَ دیم ئِے بہ دنت کہ ھمے درگت ءَ برات ھاسل نور ءَ کازی ءِ بیرانی ءِ پوسٹے من ءَ دیم دات ءُ من سنگ سیاہ اتاں کہ کازی ءِ رنگیں مھروانیں انسان ءِ منتواری ءِ وام انگت منی سرءَ ات ءُ آئ ءَ مارا پہ دائمی یلہ دات۔
کمبر ءَ اوں چہ وتی شھادت ءَ لھتے روچ ساری ءَ من ءَ چہ منی بستار ءَ گیش ساڑاتگ ات ءُ منتواری ءِ وام منی سرءَ لڈاتگ شُتگ ات ءُ کازی ءَ ھم انچوش کُت۔
مروچی کازی ءِ بیرانی ءَ سیمی روچ انت ءُ من جیڑگءَ آں کہ بلوچی لبزانک ءَ اگاں کسے ءَ زرنگے پُشتے مہ بیت، آئ ءِ نام توار ءَ وَ چونائ ءَ اوں کسے نہ گپت۔ من بلکیں کمے بھتاور اتاں کہ نہ زرنگیں پُشتے است ات ءُ نے کہ منوگرے، یکیں کازی ات کہ چہ روگ ءَ چیزے روچ پیسر وتی مھروانیں دانکے پہ من ءَ شات کُت انت ءُ من ءَ وژنام ئِے کُت۔
کمبر ءُ کازی ءِ ارواہ آسودگ ءُ شات بات انت ءُ تاں بلوچی لبزانک ھست انت اے نام ابدمان بات انت۔
۱۸ ستمبر ۲۰۲۳
