آزمانک: ھجالت۔ آزمانکار: زاھدہ رئیس راجی
آزمانک : ھجالت
آزمانکار : زاھدہ رئیس راجی
آئ ءَ سیمی رند ات کہ چَہ کمپان ءِ مٹ ءَ آپ کشگ ءِ جُہد ءَ بے سوب بَیگ ءَ اَت کہ دم پہ ساھت ءَ یک نہ یک مردمے پیداک ات۔ انوں ھم گونڈوکیں نادل ءَ لئیب لئیب ءَ ھمے نیمگ ءَ سرکش اتگ اَت کہ آئ ءِ چمپل ءُ پادانی توار ءَ گوں ایشی ءِ دست ءِ گلاس لگوشت ءُ جہل کپت۔
نادل تچانی ءَ ایشی ءِ نزیک ءَ اتک ، اشتات ءُ چو مزنیں مردمانی پیم ءَ جُست ئِے کُت کہ چے بیتہ ۔
وتی ھجالتی ءَ چیر دیان ءَ دراہینت ئِے کہ ھمسائیگانی کپودرمٹ ءِ دپیگ ءِ سرءَ پر رتکگ اَتنت اسٹیل ءِ گلاس ءِ دور داتگ ۔
نادل ءَ چَہ زمین ءَ گلاس چست کُت ءُ دیم پہ چَل ءَ روگ ءِ وھد ءَ گوشت کہ ادُّل گلاس ءَ ادءَ ایر مہ کن ، من ءَ آپ لوٹ ایت من وت چَہ چُل ءِ پاٹی ءَ زوران ئِے ۔
آ ھیران ات کہ نادل اگں دوبر اتک ءُ گلاس ءَ وتی جاہ ءَ مہ گندایت پدءَ بازیں جُست پُرسے کنت گُڑا ؟
بلے تُنّ ءِ ھلونگی ءَ نُک ئِےدراتکگ ات ءُ نئیشت ئِے کہ گیشتر بہ جیڑایت ءُ دوبر شُت گلاس ئِے زرت ءُ نوں ایشتاپی ءَ مٹ ءِ دپیگ ءَ پچ کنگ ءَ لگ ات کہ چَہ پدانکاں کسے ءِ ترندیں گامانی توار چست بیت۔ ایشی ءِ جہلیگ جہل ء کپت ءُ بُرزیگ بُرز ءَ ۔ ھما دمان ءَ گلاس ئِے سریگ ءِ تل ءَ چیر دات ءُ وت شُت چُل ءِ پُشتی دیوال ءَ چیر بیت ۔
ساہ ئِے تینزی ءِ سرءَ رویا کنگ ءَ ات ءُ ارس ئِے رچگ ءَ اتنت دل ءَ گریوگ ءُ گوں وت ءَ تران کنگءَ ات کہ ” مات ءَ چے زلورت ات کہ انچو روچ کسی لوگ ءَ پُرساں بہ دارایت نزانت کہ اُردوکیں سمّی بزگ اِنت ۔ ۔ ۔ “
ھمے وھد ءَ گرانیں گام نزیک آیان بیت اَنت ءُ چَہ ڈنی دروازگ ءَ درکپت ۔ دل ئِے دل ءِ جاگہ ءَ اتک ءُ چَہ اسپیتیں پشک ءِ بُش ءَ زانت ئِے کہ اے مستریں ناکو بیتگ کہ انوں ڈنّ ءَ درکپتگ ۔
دوبروتی منزل ءِ نزیک ءَ روگ ءَ پیش جیڑگ ءَ ات کہ نوں تری ھرکسے بئیت آ وتی کار ءَ سرجم کنت بلے اگں اناگہہ کسے بئیت جُست بہ کنت کہ چے کنگ ءَ ئے گُڑا چے کنت ؟
وتی اے جُست ءَ آئ ءَ گنترنزور ءُ پریشان کُت ۔
”یارب تو مارا پرچَہ چوش کُتگ کہ ما انچو مجبور ایں “ آ نوں دل ءَ گریوگ ءَ ات ۔ برے وتی جند ءَ ڈوبارگ ءَ ات ءُ برے مات ءَ یات کنگ ءَ ات کہ چارروچ بیت تروزتک ءِ پُرس نامی ءَ مُلک ءَ شُتگ ۔ آ مات ءِ یکیں ءُ دوستاکیں جنیں چُکے اَت ءُ پیسرءَ مات ھرکج ءَ شُتگ گوں وت ءَ ھمراہ ئِے کُتگ بلے لہتے ماہ بیت کہ مات ءَ گوشتگ کہ نوں تو مزن ئے ھرکج ءَ من ترا بُرت نہ کن آں ۔
انگت آ چْل ءِ پُشتی دیوال ءِ نیمگ ءَ اُشتاتگ ات کہ چم ئِے چُل ءِ پُشت ءِ پسیل ءِ درءِ سرءَ کپت کہ کانگی آئ ءِ سرینگ ءَ اتنت۔
ایشی ءِ جان ءَ انچو زیکت ھم نیست ات کہ کانگیاں بال دات بہ کنت ۔ دمانے آھاں چاران بیت کہ کانگی نوں چداں چست بیتگ ءُ کمپان ءِ کُنڈی درچک ءِ سرءَ شُت نشت انت۔ ھمے دمان ءَ چم ئِے پیسل ءِ پچیں درءَ کپت کہ توکی نیمگ ءَ آپ ءِ پُریں بالٹی یے ایر اَت۔ ایشی ءِ چم روشن بیت انت۔
ھما دمان ءَ پُترت ءُ درءَ کڑی کنگ ءَ رند پسیل ءِ بالٹی ءَ ایریں دزنماز ءِ آپاں دست ءَ کُلک کنان ءُ ورگ ءَ لگ ات ۔ دگہ وھدے بیت انت سک دل ءَ شورئِے کُتگ ات بلے اے ساھت ءَ آئ ءَ اے آپ چَہ جہان ءَ شرکن تر ءُ سپاتریں آپ مارات اَنت۔
تُن ءَ پہ شری پروشگ ءَ رند آئ ءَ سارتیں ساھے زرت ءُ دست دیم شُشت انتءُ زبوکی جت ءُ دیم پہ نشار ءِ اوتاگ ءَ شُت ۔
نشار زیبوک آئ ءِ کسانی ءِ دزگہار ءُ تروزتک ات کہ شش ماہ بیت اے لوگ ءَ سیر کُتگ اَتکگ ات۔ اے لُڈان ءُ روان ات کہ چم ئِے نشار ءِ اوتاگ ءِ کلہوکے پچیں دریگ ءِ سرءَ کپت۔ ایشی ءِ چم درگُڑاتنت ۔ پہ وت ءَ الّم کنگ ءَ دوبرگ چارگ ءَ لگ ات۔
نشار ءِ دیم ءَ مستریں برات اکرم ھم نشتگ ات ءُ آ گوں دلجمی ءَ سُبارگ کنگ ءَ ات۔
ایشی ءِ مجگ ءَ کار نہ کُت۔
مات ءِ ھیال ءَ کپت کہ چَہ پُرساں روگ ءَ پیسرسوج دَیگ ءَ بیتگ کہ ھاسیں روچاں جنین روچگ نہ بنت ، اگں بہ بنت گناہ ءِ رس ایت بلے بہ چار ورگ ءِ وھد ءَ ھچ مردین ءِ چم سرءَ مہ کپ ایت کہ اگں آئ ءَ مالوم بیت کہ تو اے سوب ءَ روچگ نئے آئ ءِ گناہ ھم تئ بڈءَ بنت ۔