ریزمانک: بیا وتی ھست ءَ بہ پھریز۔ زاھدہ رئیس راجی
ریزمانک
بیا وتی ھست ءَ بہ پھریز
نبشتہ کار : زاھدہ رئیس راجی
دل گوشیت ، تو راست اَت ئے کہ وھد ھمک درد ءُ دور ءُ ٹپ ءُ ٹورءُ پُرشت ءُپروش ءِ وت مستریں درمان ءُ توجیل اِنت ءُ آ ھجبرءَ نئیل ایت کہ رپتگینانی ٹپ پشت کپتگینانی دل ءَ چو شومک ءِ نادراھی ءِ وڑءَ تُند بندان ءُ سرجمیں بالاد ءَ پتایان بہ کنت ۔
بلے کارے زان ئے! مروچی گورتگیں ھور ءَ تئیگ ءُ مھلوک ءِ ھمک گپ ءِ دروگ پاشک کُتگ ءُ گوشتگ کہ اے درست وتی جند ءَ را تسلی دیگ ءِ نیمون بیتگ انت دگہ ھرکسے زانت کہ موسمانی ھبر گوں کرن ءِ کسھاں بندوک اِنت دمانے ءَ سدگ نہ بنت۔
تو وت بہ چار !
نے گوست چَہ مارا سِدگ لوٹ ایت نے ما چَہ آئ ءَ سدگ ءِ واھگدار ایں ۔ چونائ ءَ ھم کے گوشت کنت کہ ما وتی مروچ ءِ تہءَ زندگی کُتگ اگں نہ کنگ ءَ ایں؟
مئے وَ ھمک ھست ءَ مارا برے گوستءِ وش ءُ تھلی ءِ زمزیلاں گوں مُھر بستگ ءُ برے پَہ باندات ءِ اُمیت ءَ نئیشتگ کہ وتی ھست ءَ بہ پھریزایں ۔
برے برے تو گوں بے تواری ءَ الوت کُت کہ گوست ءِ دراھیں زھرگاں وتی کھنیں چادر ءِ لُمب ءَ بند ءُ چَہ نیٹی جیٹی ءِ پُل ءِ سرءَ اوشت ءُ دیریں جاھے ءَ اِر بہ دئے داں کیاماڑی ءِ دریا ءِ گندگسڑانی ھمراھی ءَ سونامی ءِ توپان ءِ چولانی ھمراھی ء َ دیمتر ءِ ھپت دریاھانی دامن ءَ بُک بہ دَنت ءُ کس مہ زانت کہ اے زھرگانی کسہ ءَ کئی چمانی واب ءِ توجیل کُشتگ اَنت۔
بلے تو اوں زان ئے کہ اے تھنا واھگے بیت کنت۔ چَہ زندمان ءِ دپتر ءَ گوست ءِ تاکانی دِرّگ ءَ کے سوبین بیتگ کہ من بیت بہ باں ۔
دوزواھے ءَ سکین دات وھدے بلائیں کارے ءَ دست ءَمان کن ئے وتی گوشاں چَہ کش گورءُ دیم پُشت ءِ دراھیں جاک ءُ تواراں مُھر بہ بند نتہ کار وَ کارے چَہ جند ءَ اوں نگیگ بئے ءُ سرپہ وت کُشی ءَ کشگ ءَ دلمانگ بئے ۔
بلے زندگی ، زندگی زان ئے وت چے گوشگ ءَ اَت !
آ تچک ءَ گوشگ ءَ ات کہ منی تاکانی دِرّگ ءِ دانکہ مَن رزا ءَ مہ دیاں تو کے ئے کہ پَہ اے کار ءَ سوبمند بہ بئے ؟
تاں مُدتے ءَھیران اتاں کہ پسہ دیگ اوں نہ زانت ءُ بے تواری ءِ جوڑگ ھم نہ کُٹ ات ۔
بلے کارے زان ئے ؟
گوست، چو ساھگ ءَ دیم ءَ نشتگ ، گوں بچکندے ءَ چاران ءُ گوشگ ءَ اَت کہ
وتی چمانی دیم ءَ تالانیں وتی برادل ءِ بچکندیں اکس ءَ دِرت کن ئے کہ آئ ءَ وتی گُڈی روچ ءَ ترا توارے پرکُتگ ءُ گوشتگ ات کہ دادا! بہ چار اے پکیر پرچا من ءَ روک روک ءَ چاران انت۔ وھدے وتی چماں تئی نیمگ ءَ سک دنت، دردیگیں نگاھاں ارسیگ کنت؟
شر اے گپ ءَ بل ۔
وتی گُھارءِ گُڈی پاسانی اکس ءَ چَہ چمانی آدینک ءَ لگوشت کن ئے؟
تئی نیم وابیں چمانی دیم ءَ آئ ءِ کُنٹیں بالاد ءِ سرءَ چست بوتگیں ارواہ ءَ روگ ءِ پُر ءَ ترا چون گوں بچکندے ءَ چارات ءُ پہ مُدامی چَہ ترا رکست بیت ۔
یک دراجیں آھے کشگ ءَ رند چماں وت ءَ بست ، آھے کشگ ءَ پد مروچ ءِ آدینک ءَ چارات ۔ زندگی وتی مانا ءِ شوھاز ءَ آکبت ءَ دزموش کنان ات ءُ وھد وتی بستار ءَ بُرز کنان ءُ تران کنان ات ۔ من ءَ ھم روچے نہ روچے کُٹگی ایں۔ پرچا من ءَ نہ پھریز ئے۔
23دسمبر 2018
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭