راجانی است دپتر باندات ءِ گوست دپتر جوڑ بنت۔ زاھدہ رئیس راجی
راجانی است دپتر باندات ءِ گوست دپتر جوڑ بنت
نبشتہ کار: زاھدہ رئیس راجی
مروچاں سوشل میڈیا ءَ ھمک دومے مردم اے گپ ءَ جنگ ءَ انت کہ مئے تاریخ یا گوست دپتر یا راجدپتر تچک نہ انت یا آئ ءِ تہ ءَ پرنگیاں وتی وتی ھساب ءَ کمی گیشی یاورتگ۔
من ادء یک کسہ یے گوشگ لوٹ آں بلکیں وتی گپ ءَ تچک تر کُت بہ کن آں ۔
منی اسکول ءِ فٹ پاتھ ءِ سرءَ مئے کسانی ءَ ھچ چیز نیست اَت بید ءِ چَہ چیزبہا کنوکاں کہ ما درستیں چُک اسکول ءِ موکل ءِ وھد ءَ مُچ بیتگین ءُ چیز گپتگ لوگ ءَ شُتگ ایں۔ پدءَ یک مزنیں مدتے ءَ چَہ اے راہ ءَ گوزگ ءِ موہ ھم نہ رس ات۔ بلے لہتے وھد پیسر ءَ کہ ھمے راہ ءَ گوزگ ءِ موہ رس ات گندآں اسکول ءِ ھمے فٹ پاتھ ءِ کُنڈی نیمگ ءَ یک زیارت (اردو ءِ مزارے) اڈ بیتگ ءُ زیارگ ءِ جہلی نیمگ ءَ یک کڈّے کنگ ءُ اے دگہ زیارتانی رنگ ءَ چراگ ءُ اگربتی روک کنگ بیتگ ءُ مردماں ایشی ءِ سرءَ ساھیل بیتگیں درچک ءِ سرءُ بُنءَ وتی واھگ یا مراد یا منّت ءِ پُچ ءُ بندیک بستگ اَنت ۔
یک برے وَ من درگوز کُت بلے دوبر کہ چَہ ھمے راہ ءَ گوزگ ءِ موہ رس ات گُڑا منی اوپار نہ شُت۔ چَہ یک منوکے ءَ جُست کُت اوں کہ ادءَ چی یے ءُ مردم چے کنگ ءَ اَنت ۔ پسو رس ات کہ ”اے مزنیں پیر ے مئے پت پیروکاں ھم ادءَ وتی لوٹ ءُ مراد چَہ زیارت ءِ توار پرکنگ ءُ بندیک بندگ ءَپورا بیتگ “۔ من آ بلوک ءِ اُمر دیم ءَ ایر کُت ءُ وت ءَ ھم چارات کہ بلکیں من چَہ ایشی ءِ بلوک ءُ پیروک ء ھم پیرترآں کہ منی زمانگ ءَ وَ اِے زیارت ءِ نام ءُ نشان ھم نہ بیتگ۔
اے کسّہ ءِ ادءَ جنگ ءِ مول ءُ مراد ایش انت کہ وھدے اے زیارت ءِ تاریخ یا گوست دپتر نویسوک منی رنگ ءَ چَہ ایشی ءِ مریداں جُست پُرس بہ کن اَنت آ ھرچ وت ساچیں گپّے بہ جن اَنت تاریخ نویس ایشاں نبیسان کنت ءُ باندءَ اے درست راستی ھساب بنت ءُ زیارت ءِ گوستانک یا تاریخ جوڑ بیت ءُ باند ءَ درست ھمے گپ ءَ من انت کہ اے زیارت سے چار پدریچ ءَ ھم پیسرترانت ۔
جھانی تاریخ نویسانی اگں پُشدرھم چارگ بہ بیت گُڑا زوراکانی نبشتہ بوتگین دپتر ھم چیر نہ اَنت۔
بلوچ راج کہ مدام وت ماں وتی جنگانی دیمپان بوتگ اَنت آھانی سرءَ ھم مدام زوراک گیش بوتگ اَنت ءُ آھاں وتی تب ءِ تاریخ نبشتہ کنائینتگ ۔ چوشکہ آزمانگ ءَ بلوچاں وتی راجی دپتر نبشتہ کنگ ءِ سُد سما ءَ نہ بیتگ انت پمشکا آھاں ھم کمار نہ کُتگ کہ زوراک چے نبشتہ کنگ ءَ انت ءُ چون کنگ ءَ انت۔ پمشکا دروگ راست ھرچے نبشتہ بوتگ آوھدے مئے دستاں کپتگ ما ھم ھمایانی منگ ءَ مجبور بیتگ ایں ۔
پہ منی گپ ءِ مول ءُ مرادءَ سرپد بئیگ ءَ چَہ بلوچی اکیڈمی ءِ ویب سائیٹ ءَ نسیم الفت ءِ ” تاریخی اغلاط نامے “ ءَ ایر بہ گیج ات بوان ات ۔
نوں گپ ایش انت کہ وھدے راج دپتر یا گوست دپتر ھما انت کہ مارا رس اِتگ آھانی راستی ءِ پولکاری وت یک زھمت کشّیں کارے کہ بلکیں دیمترءَ کسے بہ کنت ما پرچا اے کار ءَ دستاں گوں وت نہ کن ایں کہ ھما دور ءُ باریگ ءَ زندگ ایں ھما ئ ءِ دپتر ءَ وت وَ نبشتہ بہ کن ایں ۔
مئے دیم ءَ مئے کش گورءَ ھرچے بوھگ ء۔ اِنت کہ آباند ءَ پَہ مئے راج ءُ آیوکیں پدریچ ءَ شرّی یا بدی یاورت کن انت آھاں پرچَہ نبشتہ نہ کن ایں کہ گپتار وَ گار بنت بلے نبشتہی دروشم ھجبر گار نہ بنت ۔
ادءَ من دوسے روچ پیسرءَ اِشکُتگیں یک اسکالرے ءِ گوشتانک ءِ نیمگ ءَ ھم دلگوش دیگ لوٹ آں کہ آئ ءَ گوشت جناح ءَ پہ مسلمانانی آزاتی ءَ ھچ زھمت نہ کش اتگ درستیں پرشت پروش ءِ کار نہرو ء کُتگ ءُ اے راستی برطانیہ ءَ وتی گوست دپتر ءِ کتابانی تہ ءَ پدرکُتگ ءُ آھاں اے خطہ ءِ توک ءَ پرنگیانی دور ءُ باریگ ءِ وھد ءِ پرنگی کارمندانی رودپتر ءَ چِہ چست کُتگ ءُ گوست دپتر ءَ نبشتہ کُتگ کہ آھاں وتی یک یک دمانے کار ءُ پیسلہانی پُشدر وتی رودپتر ءَ مان کنگ بیھال نہ کُتگ “ ۔
شما منی شور ءِ باروا چے گوش ات اے باروا وتی ھیال ءُ لیکہاں ھم درشان بہ کن ات
شمئے پسّوھانی رھچارآں