لسانیات ءِ گالبند ءِ گونڈیں سرپدی
لسانیات ءِ گالبند ءِ گونڈیں سرپدی
نبشتہ کار: زاھدہ رئیس راجی
لسانیات چوشکہ زبان ءِ زانش انت پمشکا بلوچی ءَ پہ ایشی ءَ زبانزانتی ءِ گال ٹھینگ بیتگ بلے وانوک ایشی ءَ گوں بلوچی زبانزانتی ءَ ھمگرنچ کن انت کہ پھک ءَ ردیں گپے ۔ زبانزانتی یا لنگوسٹکس یک انچیں علم یا زانش انت کہ چہ ایشی ءِ وسیلہ ءَ زبان ءِ بنگیج ءَ بہ گرتاں مرگ ءِ باروءَ وانگ ءُ سرپدی زورگ بیت ۔ لسانیات زبانانی بابت ءَ یک انچیں سسٹمیٹک یا منظم علم انت کہ ایشی ءِ تہ ءَ زبان ءِ اندری تک ءُ پھناتانی سرءَ باوست کنگ بیت ۔ ایشی ءِ تہ ءَ زبان ءِ توار ءَ ابید معنا ءُ بزانت، مارشت ءُ ھیال ءُ چاگردی جاور درست ھوار انت ۔
لسانیات ءِ وانشت ءَ چَہ نبشتھی گال ءُ گپاں گیش گوشتھی یا ھبری گال یا لبز گیشتر دلگوش دیگ بیت ءُ ایشی ءِ سوب ایش انت کہ دنیا ءِ تہ ءَ انسان ءَ پیسرءَ گپ جنگ بنا کُتگ۔ پدءَ زھنی دیمری کنگ ءَ رند یک بلائیں مُدتے گوازینگءَ پد نوں نبشتہ کنگ ءِ نیمگ ءَ دلگوش داتگ ۔اے گپ ءَ ما چوش ھم جت کن ایں کہ چُک پیسرءَ گپ جنگ ءَ ھیل گرایت رند ءَ آئی ءِ نبیسگ ءُ وانگ ءِ نیمگ ءَ روت۔ پدءَ اے راستی ھم سرگوز کنگ نہ بیت کہ دنیا ءِ توامیں زبانانی تہ ءَ گپ جنوک چَہ نبیسوکاں گیشتر انت ۔ ءُ بازیں گپ ھبر یا تاثرات انچین انت کہ ھبر ءِ وھد ءَ ھوار بنت بلے آ نبیسگ ءِ وھد ءَ سرگوز کنگ بنت ۔
پہ زبانزانتی ءَ چَہ لنگوسٹکس ءَ ابید فلالوجی ءِ گالبند ھم کارمرزگ بیت بلے اے دوئینانی میان ءَ مزنیں دگرے است ۔ زبانزانتی تھنا انسانی زبانانی ساخت یا دروشم ءَ چار ءُ تپاس کنت بزاں ایشی ءِ تہ ءَ جناورانی زبان یا اشارہ ءِ زبان ءِ بارو ءَ ھچ گپ جنگ نہ بیت بلے فلالوجی زبان ءِ سائنسی واشت (مطالعہ ) ءَ ابید آئی ءِ لبزانکی وانشت ءَ ھم دلگوش دنت ۔