کانوکیشن ءُ بلوچ ءِ رویہ۔ زاھدہ رئیس راجیءِ نبشتانک
کانوکیشن ءُ بلوچ ءِ رویہ
نبشتہ کار: زاھدہ رئیس راجی
سرجمیں دنیا ءِ دانشجاہ یا مزن شاہ دربرجاھانی ربیت انت کہ آ ھمک سال کانوکیشن ءِ نام ءَ مراگشے برجم دارانت۔ اے مراگش ءَ لس زبان ءَ سندانی بھر کنگ ءِ روچ ھم گوش انت۔ دانشجاہ ءِ سروک وتی سرجمیں سال ءِ رپورٹ ءَ ھم دیم ءَ کارانتءُ ایشی ءِ تہ ءَ بھر زوروکیں مزن نامیں ءُ مزن اُگدھانی مردماں ھم سھیگ کن انت کہ اے دانشجاہ ءَ تاں اے وھدءَ چے پیمیں سوبمندی دیستگ یا وتءَ رسینتگ۔
اے دیوان ءِ ارزشت پہ ھما نودربراں گیشتر انت کہ آھاں مزن شاھدربرجاہ ءَ ھمک کلاس پہ دل زُرتگ، دربُرتگ، چکاس داتگ ءُ گوں شریں نمبراں سوبین بوتگ انت۔ اے دیوان ءَ بی ایس ، ایم ایس ، ایم اے ، ایم فل ءُ پی ایچ ڈی ءِ نودربرءُ اسکالرز بھر زورانت۔
بی ایس ءِ چار سال سرجم کنگءَ پد سوبمندیں ھما نودربر کہ آھاں چہ درستاں گیشتر نمبر زُرتگ انت، آ اے مراگشءَ بھر زور انت ءُ دانشجاہ چہ وتی نیمگءَ آھاں سُھر ءِ تمغہ یا گولڈ میڈل گورءَ دنت۔ اے انڈرگریجویٹ گوشگ بنت۔
ایم ایس ءِ نودربر ھم دیوان ءَ ھوار بنت کہ لھتے دانشگاھاں اے دو سال ءَ کنائینگ بیت ءُ لھتے دانشگاھاں سالے نیم ءَ ءُ ایشاں کسانیں پٹپولکاری یے ھم دیگ بیت انت ءُ اے وھدے سوبین بنت ایشاں ھم گولڈ میڈل دیگ بیت انت۔ چوشکہ اے چہ بی ایس ءَ رند وانگ بیت انت پمشکااے گریجویٹ گوشگ بنت۔
پاکستان ءِ تہ ءَ پیسرءَ بی اے ، بی ایس سی ، بی کام ءُ ایم اے، ایم ایس سی ، ایم کام ماں دانشگاھاں ھم کنائینگ ءِ ربیت بیتگ ات ایشانی مُدت ھم دو دو سال ءُ ھواری ءَ چار سال بیتگ انت بلے چیزے سال بیت انت کہ ایچ ایس سی بزاں ھائرایجوکیشن کمیشن ءَ ایشانی کنگ ءِ مکن کُتگ ءُ دراھیں دانشجاہ زور کُتگ انت کہ بائد بی ایس ءُ ایم ایس کنائینگ بہ بیت۔ سوب ایش انت کہ بیدءِ بی ایس سی ءُ ایم ایس سی ( اے دوئیں سائینس ءَ گوں ھمگرنچ انت) دگہ درستیں مضمونانی وانگ پرائیوٹ ھم بوت کنت بزاں نودبراں لوگءَ ونتگ ءُ تھنا پہ چکاس دیگ ءَ شُتگ انت۔ ادءَ مزنیں تاوان ھمے بوتگ کہ ھما نودربراں کہ ھجبر دانشجاہ ءَ نہ ونتگ آھاں بازیں چیزے کہ چہ دانشجاہ ءَ زانتکاریں استادانی وسیلہ ءَ دربرگی بیتگ انت یا دانشجاہ ءِ چاگرد ءِ وسیلہ ءَ دربرگی بوتگ انت، آھاں ھچ نزانتگ انت ءُ وھدے ھمے مردم وانگجاھانی استاد جوڑ بوتگ انت ھاس دانشجاھانی، آھانی اے کمی یا نزوری دیمترءَ نودربراں ھم گون بوتگ انت۔
پدءَ بی اے ءُ ایم اے اکیڈمک رھبند ءِ یک دگہ نزوری یے ایش انت کہ نودبر سرجمیں سال ءَ رٹہ بہ جنت ءُ چکاس ءِ روچ ءَ بہ روت چکاس بہ دنت۔ بلے بی ایس ءُ ایم ایس چوشکہ سیمسٹر سسٹم انت ءُ ھمک سیمسٹر ءَ میانی وھد ءِ چکاس بزاں مڈ ٹرم ھم بنت پمشکا نودربرکم کم ءَ وانان کن انت ءُ چکاس دیان کن انت ءُ چریشی ءَ آھانی زھن ءِ سرءَ باز بار یکپاریگہ نئیت۔
پمشکا دانشجاہ بی ایس ءُ ایم ایس ءُ ایم اے ءِ گُڈی سال ءِ چکاس ءِ سوبمندی ءَ رند ھرکسی کہ نمبر گیشتر بنت آھاں سُھرءِ میڈل دنت۔
ایم فل ءِ وانگ چہ ایم اے( ماسٹر آف آرٹس )، ایم ایس سی ( ماسٹر آف سائنس )، ایم کوم (ماسٹر آف کامرس) ءِ چکاس ءَ رند وانینگ بیت۔ پوسٹ گریجویشن ءِ بھرے زانگ بیت۔
اے سرزائر ءَ دو سال ئیگ انت ءُ ایشی ءِ تہ سرجمی ءَ سندی پٹپولکاری ءِ کار رھبند سوج دیگ بنت ءُ ھرھما مضمونے کہ اے سالاں وانینگ بیت، آھانی سرءَ کار کنگ ءِ رھبند ھم سندی پٹپولکاری ھساب ءَ بیت انت۔ ادءَ کورس ورک سال ئیگ انت کہ ایشی ءِ تہ ءَ ھم دو سیمسٹر ءُ چار مڈٹرم انت ءُ ایشانی سوبمندی ءَ پد سائینوپسز بزاں تھیسز ءِ پیشبندی ءِ چکاس دیگ بیت۔ سائینوپسز ءِ منّگ نامہ دزگرگ ءَ پد پٹپولکاری بنا بیت انت۔ تھیسز ءِ کار ءَ لھتے دو سال ءَ سرجم کنت ءُ لھتے سے سال زور ایت۔ رھشون یا سُپروائز ءِ سوجانی ردءَ تھیسز ءِ مالومداریانی شوھازگ، آھانی تپاسگ، چکاسگ ءُ پریچگ ءُ وتی بُنگپ ءِ ھساب ءَ دیم ءَ برگ ءُ نبیسگ ءَ رند، ایشی ءِ پوسٹ گریجویٹ ڈیپارمنٹ ءَ جمع کنگ ءُ پدءَ ڈنی استادانی گورءَ دیم دیگ ءُ آھانی چارگ ءَ پد رپورٹ جوڑ کنگ ءُ پچترینگ ءُ پدءَ تھیسز ءِ دیم پہ دیمی یا زبانی چکاس ءَ سوبمندی ءُ سوبمندی ءَ رند ءِ چست ءُ ایر دانکہ گُڈی سند ءِ دست گرگ بیت۔
پمشکا کانوکیشن ءَ ایم فل ءِ ڈگری ءِ بستار چہ بی ایس ءُ ایم ایس ءُ ایم اے ءَ گیشتر بیت انت ءُ اے اسکالرز گوشگ بنت۔
ایم فل ءِ رنگءَ پی ایچ ڈی ھم سرجمی ءَ سندی پٹپولکاری انتءُ چہ ایم ایس ءُ ایم فل ءَ رند کنگ بیت۔ ایشی ءِ تھیسز جمع کنگ ءِ ھاترءَ المی انت کہ تاں سیمی سال ءَ ودار بہ کن ئے۔ سے سال ءَ بہ گرتاں ھشت سال ءَ اے پٹپولکاری روت۔ تاں ھما وھدءَ کہ اے دانشجو سَند ءَ نہ گرایت اے ھم اسکالرز گوشگ بنت ءُ سَند دزگرگ ءَ پد ڈاکٹر گوشگ بنت۔ ماں کانووکیشن ءَ چہ درستاں بُرزتریں جاگہ ءُ سند ھمیشان ئیگ انت۔
کانوکیشن ءِ تہ ءَ ایم فل ءُ پی ایچ ڈی ءَ آھانی شپ روچ ءِ زھمتانی مُز اے رس ایت کہ ایشانی کوٹ ءُ کُلاہ سنگین بنت ءُ ایشاں سند ھم کانوکیشن ءِ پوش ءِ تہ ءَ رس ایت کہ پہ اسکالرزاں یک مزنیں شرپے۔
اے دراھیں گپانی جنگ ءِ مول ءُ مُراد ایش انت کہ وانوک بہ زان انت کہ ھما نودربر ءُ اسکالرزاں کہ شپ روچ مھنت کُتگ ءُ زھمت کش اتگ، پہ آھاں اے مزنیں روچے کہ اے روچ آھانی مھنت ءِ ءُ زھمت ءِ سرجمی ءِ روچ گوشگ بیت۔ سرجمیں دنیا ءِ دانشجاھاں اے روچ ءَ سوبمندیں نودربر ءُ اسکالرز وشی درشان کن انت کہ آھاں وتی وانگ سرجم کنگ ءِ کوٹ ءُ کُلاہ پر کنگ بیت ءُ دستاں سند دیگ بیت ءُ اے روچ بازینے ءِ دانشجاہ ءَ گُڈی روچ ھم ھساب کنگ بیت کہ چدءُ پد آ وتی کار روزگار ءِ نیمگءَ رو انت ءُ پہ دائمی دانشجاہ ءَ یلہ کن انت۔ بلے بیا کہ ادءَ مئے بلوچانی رویہ ءَ بہ چار ات کہ ما اے کانوکیشن ءَ چے پیم ءَ چارایں۔
بازینے ءَ من جُست کُتگ ات کہ شما پرچہ وتی فارم ءَ پُرنہ کنگءَ ات پہ کانوکیشن ءَ پسہ رس اتگ ات کہ اے بے کاریں چیزے ، ھچ پائیدگ نہ دنت، ھچ درد نہ وارت۔
اپسوز من ءَ گیشتر پہ ھما براتءِ بوت کہ آئی ءَ ایم ایس ءِ تہ ءَ ٹاپ کُتگ بزاں گیشتر نمبر گپتگ۔ اگاں آئی ءَ کانوکیشنءَ بھر بہ زُرت انت، آئی ءَ سُھر ءِ میڈل ھم رس اتگ ات بلے آئی ءَ گوں دلپروشی ءَ گوشت کہ ھچ نپ نیست۔ ھمے پیمءَ ایم اے بلوچی ءَ ٹاپ کنوکیں براتے ءَ ھم وتی فارم پُر نہ کُتگ ات کہ آئی ءِ پبلک سروس کمیشن ءِ چکاس ھمے یکیں روچ ءَ ات۔ من ءَ چوشکہ آ چکاس ءِ وھد مالوم نہ ات پمشکا من آ نودربر ءَ ھچ نہ گوشت۔ بلے ھبکہ ھما وھدءَ بوتاں کہ کانوکیشن ءِ روچ ءَ مئے کش ءَ نندوکیں یک ایم فل اسکالرے ءَ وتی برات ءِ گوشت کہ آئی ءِ ھم مروچی ادار سے ءَ پی سی ایس ءِ چکاس انت بلے آئی ءِ برات سُھب ءَ دانشجاہ ءِ کانوکیشن ءَ اتکگ پہ وتی گولڈ میڈل ءِ زورگ ءَ۔
ھے پیمءَ دگہ دو سے بلوچ اسکالرزاں جُست ءِ پدءَ پسہ داتگ ات کہ آھانی بلوچ استاد ءُ سنگتاں گوشتگ کہ اے وَ شوشبہ انت، ڈگری ءَ بائد انچوش گوں بے تواری ءَ دزبہ گر۔
من ھیراناں کہ ھما روچ ءَ سرجمیں دنیا ءِ نودربرانی سوبمندی ءِ جشن ءِ روچ انت آئی ءَ بلوچ پرچہ دومی ءَ چوش دلپروش کن انت ءُ اے دلپروش بیوک پرچہ نہ چارانت کہ ھمایاں مارا دلپروش کُتگ، آھانی جندءِ کارءُ کرد چی انت؟
گُڈی گپ پہ نودربراں ایش انت کہ دنیا ءِ دیمرویءَ اگاں سربیگ لوٹ اِت گُڑا شُمارا ھم آھانی ھمراھی ءَ روگی انت، نتہ گلگ کنگ ءَ تھنا وت ءَ رد دئیت۔
منتوار
20 نومبر 2023