دستونک
نور درویش

پیچ ءُ تاب اَنت تئی در ءِ دیم ءَ
آسک واب اَنت تئی در ءِ دیم ءَ

اے زمانگ منا نہ با پہ وت
چُنت گیاب اَنت تئی در ءِ دیم ءَ

باگبانے مں کم کتگ دوشی
گُل، ھساب اَنت تئی در ءِ دیم ءَ

پیش دارنت ھوادگیں نیاداں
ٹھل ءُ داب اَنت تئی در ءِ دیم ءَ

پن ءُ مزواک ءُ آمڑا سِستہ
کُل ثواب اَنت تئی در ءِ دیم ءَ

چارتہ زِر مں کندی ءَ اِیوَک
سک تیاب اَنت تئی در ءِ دیم ءَ

ناز بوئیں شپے درا، چماں
دل ھراب اَنت تئی در ءِ دیم ءَ

نور بُرزیں خمار ءِ واھند اِنت
پل، گلاب اَنت تئی در ءِ دیم ءَ