* ===== ابتدائیہ =====

علم عروض سے مختص ایک برقی محفل میں کسی مصرعے کے وزن پر بات کرتے ہوئے “ذوالبحرین” کا تذکرہ نکل آیا۔ پھر اس سے متعلق احباب سے گفتگو میں یہ اندازہ ہوا کہ اس موضوع کو اچھی طرح بیان کرنے کی ضرورت ہے۔ پس یہی خیال اس مضمون کی وجہِ تخلیق قرار پایا۔

اس مضمون میں نہ صرف ذوالبحرین کی وضاحت بلکہ اس سے متعلق ایک غلط فہمی اور چند (عام) غلطیوں پر بھی بات کی گئی ہے تاکہ عروض کی بھی کچھ اہمیت واضح ہو۔ کوشش کی گئی ہے کہ موقع کی مناسبت سے اشعار کی مثالیں بھی پیش کی جائیں تاکہ لوگ قاعدے کو عملی صورت میں دیکھ کر بہتر طریقے سے بات کو سمجھ پائیں۔

قارئین کی سہولت کے لیے تحریر کو موضوع وار درج ذیل حصوں میں تقسیم کیا گیا ہے۔

– ذوالبحرین کی تعریف

– ذوالبحرین مصرعوں والی بحریں

– ایک غلط فہمی

– ایک دلچسپ قصہ

– ذوالبحرین بطور صنعت

– یکساں بحروں کا دھوکا

– اوزان اور ارکانِ قیاسی

– وزن میں غلطی کے اسباب

* ===== ذوالبحرین کی تعریف =====

عربی زبان سے مشتق یہ لفظ “ذُو”(بمعنی: والا) اور “بَحر” کے تثنیہ “بَحرَین” (بمعنی: دو بحریں) کا مرکب ہے، جس کا لغوی یا لفظی معنی “دو بحروں والا” ہے۔

شاعری میں یہ اصطلاح ان مصرعوں کے لیے استعمال ہوتی ہے، جن کو پڑھنے والا دو مختلف بحروں میں پڑھ سکتا ہے۔ یعنی ایک ہی مصرع بیک وقت دو مختلف بحروں میں تقطیع کیا جا سکے۔ ایسا مصرع عموماً شعوری کوشش کی بجائے اتفاق ہی سے وجود میں آتا ہے۔

* ===== ذوالبحرین مصرعوں والی بحریں =====

ایک ہی مصرع بیک وقت دو بحروں میں ہو، ایسا ہر بحر کے ساتھ نہیں ہوتا۔ عام مشاہدے میں آنے والے ایسے مصرعے زیادہ تر درج ذیل بحروں میں ہی دیکھے گئے ہیں۔ البتہ دیگر قریب الوزن بحروں میں بھی ایسا ہو جانا ممکن ہے۔

بحر ۱- فاعلاتن فاعلاتن فاعلاتن فاعلن / فاعلات (بحر رمل مثمن محذوف / مقصور)

بحر ۲- فاعلاتن / فعلاتن فعلاتن فعلاتن فعِلن / فعِلان (بحر رمل مثمن مخبون مقصور / محذوف)

ہوتا کچھ یوں ہے کہ شاعر مصرعے کو بحر نمبر ۱ کے مطابق کہتا ہے، جو اس مصرعے کی حقیقی (اصلی) بحر ہوتی ہے۔ لیکن الفاظ کی ترتیب اور ان کی مختلف طرز کی ادائی کے سبب مصرع بحر نمبر ۲ میں بھی پڑھا جا سکتا ہے۔ کیوں کہ مصرع اصلاً بحر ۲ میں نہیں کہا گیا اور نہ ہی شعر کا دوسرا مصرع یا غزل کے باقی اشعار اس وزن کے مطابق ہوتے ہیں، اس لیے ہم اسے مصرعے کی غیر حقیقی بحر کہ سکتے ہیں۔

ذیل میں چند مثالیں ملاحظہ فرمائیے، جن میں * سے نشان زد مصرعوں کا حقیقی وزن اوپر بتائی گئی بحر ۱ کے مطابق ہے جبکہ یہ مصرعے بحر ۲ کے مطابق بھی پڑھے جا سکتے ہیں۔

قارئین اور سیکھنے والوں کی آسانی کے لیے پہلی مثال کو دونوں بحروں کی تقطیع کے ساتھ لکھا گیا ہے تاکہ ذہن میں کوئی گرہ باقی نہ رہ جائے۔

———-

* کیوں اندھیری ہے شبِ غم، ہے بلاؤں کا نزول

آج ادھر ہی کو رہے گا دیدہِ اختر کھلا

(غالبؔ)

حقیقی وزن کی تقطیع:۔

فا ع لا تن – فا ع لا تن – فا ع لا تن – فا ع لا ت

کو اَ دے ری – ہے شَ بے غم – ہے بَ لا او – کا نَ زو ل

غیر حقیقی وزن کی تقطیع:۔

فا ع لا تن – ف ع لا تن – ف ع لا تن – ف عِ لا ن

کو اَ دے ری – ہِ شَ بے غم – ہِ بَ لا او – کَ نَ زو ل

———-

پھر چراغِ لالہ سے روشن ہوئے کوہ و دمن

* مجھ کو پھر نغموں پہ اکسانے لگا مرغِ چمن

(اقبالؔ)

———-

* گفتگو اچھی لگی ذوقِ نظر اچھا لگا

مدتوں کے بعد کوئی ہمسفر اچھا لگ

(فرازؔ)

ایک دلچسپ بات یہ ہے کہ کچھ اہل عروض مکمل مصرعے کی بجائے اس کے فقط ایک ٹکڑے کو بھی ذوالبحرین کے زمرے میں شامل کر لیتے ہیں۔ جیسے، درج ذیل مثالوں میں * نشان زد مصرعوں کا ایک حصہ دئیے گئے اوزان کے مطابق ہے اور وزن ۱ اس کا حقیقی وزن جبکہ وزن ۲ اس کا غیر حقیقی وزن ہے۔ ملاحظہ کیجیے۔

———-

سب نے صفِ محشر میں للکار دیا ہم کو

* اے بے کسوں کے آقاؐ اب تیری دہائی ہے

(اعلیحضرت احمد رضاؔ بریلوی)

؎ اے بے کسوں کے آقاؐ

وزن ۱: مفعول مفاعیلن

وزن ۲: مفعول فاعلاتن

———-

* کہ رہے ہو برا مے کو بسملؔ، کیوں گنہ مول لیتے ہو سر پر

خود پلائیں گی جنت میں حوریں، مے کو دنیا میں رسوا نہ کرنا

(بسملؔ)

؎ کیوں گنہ مول لیتے ہو سر پر

وزن ۱: فاعلن فاعلن فاعلن فع

وزن ۲: فاعلاتن مفاعلن فعلن

نوٹ: راقم جزوِ مصرع پر ذوالبحرین کا اطلاق کرنے اور اسے صنعت یا حسن شمار کرنے سے قاصر ہے۔

* ===== ایک غلط فہمی =====

ذوالبحرین کی اصطلاح سے کچھ لوگ یہ سمجھ لیتے ہیں کہ ایک ہی شعر کے دو مصرعوں کو دو مختلف بحروں کے اوزان میں ڈھالا جا سکتا ہے۔ یہ خیال درست نہیں ہے اور اس کا ذوالبحرین سے کوئی تعلق نہیں ہے۔ ذوالبحرین کا تعلق “ایک ہی مصرعے کا دو بحروں میں واقع ہونے” سے ہے جبکہ ایک شعر اسی وقت باوزن مانا جائے گا جب اس کے دونوں مصرعے ایک ہی بحر کے مطابق ہوں۔

بیشتر بحروں میں کچھ متعین زحافات کے استعمال کی اجازت ہوتی ہے۔ ان زحافات کے استعمال کی صورت میں وہ مصرعے دو بحروں میں نہیں بلکہ ایک ہی بحر میں شمار ہوتے ہیں۔ چند مثالیں ملاحظہ ہوں۔ زحافات کی تبدیلی (قوسین) میں نمایاں ہے۔

ہم ہیں مشتاق اور وہ بیزار — فاعلاتن مفاعلن (فعلان)

یا الہی، یہ ماجرا کیا ہے —– فاعلاتن مفاعلن (فعلن)

(غالبؔ)

میرے پیرو ہیں قیس و فرہاد — مفعولن فاعلن (مفاعیل)

میرا قصہ ہے نلدمن میں ——- مفعولن فاعلن (فعولن)

(میر علی اوسط رشکؔ)

اندازِ بیاں گرچہ بہت شوخ نہیں ہے ———- مفعول مفاعیل مفاعیل (فعولن)

شاید کہ اتر جائے ترے دل میں مری بات — مفعول مفاعیل مفاعیل (مفاعیل)

(اقبالؔ)

رہِ یک گام ہے ہمت کے لیے عرشِ بریں ——- (فعلاتن) فعلاتن فعلاتن (فعِلن)

کہ رہی ہے یہ مسلمان سے معراج کی رات —- (فاعلاتن) فعلاتن فعلاتن (فعِلان)

(اقبالؔ)

چند روزہ زندگی کو کچھ نہ پوچھ —- فاعلاتن فاعلاتن (فاعلات)

خواب ہے لیکن پریشاں خواب ہے —- فاعلاتن فاعلاتن (فاعلن)

(شادؔ عظیم آبادی)

* ===== ایک دلچسپ قصہ =====

حمیدؔ عظیم آبادی کی کتاب “علم العروض (میزانِ سخن)” کے تعارف (ابتدائیہ) میں شفقؔ رضوی صاحب نے ایک طرحی مشاعرے کے بارے میں لکھا ہے۔ اس مشاعرے کی طرح میں درج ذیل مصرع دے دیا گیا۔

؎ خواب غفلت کا گزر چشم نگہباں میں نہ تھا

اس مصرعے کو پڑھتے وقت اگر “چشم” کی میم کو مع کسرۂ اضافت اشباع کے ساتھ یعنی کھینچ کر پڑھیے تو بحر “رمل مثمن محذوف”، یعنی وزن “فاعلاتن فاعلاتن فاعلاتن فاعلن” بنے گا۔

اور اگر مذکورہ بالا اردو اور فارسی دونوں اضافتوں کو تخفیف کے ساتھ پڑھیے تو بحر “رمل مثمن مخبون مقصور”، یعنی وزن “فاعلاتن فعلاتن فعلاتن فعِلن” ہوگا۔

پھر غزلیں پڑھنے والوں کا کیا قصور، اگر وہ دو مختلف بحروں میں غزلیں پڑھیں۔ یعنی کسی شاعر نے ایک وزن میں غزل پڑھی تو کسی نے دوسرے وزن پر۔

ایسے موقع پر بحر کے ارکان لکھ کر معین کر دیتے ہیں تاکہ اس غلطی سے بچا جا سکے۔

ایسا ہی اتفاق چند ماہ قبل راقم الحروف کے ساتھ پیش آیا کہ ایک ادبی تنقیدی محفل میں ایک غزل برائے تنقید پیش کی گئی۔ مطلع پڑھتے ہی جھٹ سے اس کا وزن ذہن میں نقش ہو گیا۔ پھر کیا تھا، غزل کے کئی اشعار میں وزن کی غلطیاں نظر آنے لگیں۔ معلوم یہ ہوا کہ غزل کے کئی مصرعے ذوالبحرین تھے اور اس کے دھوکے میں غزل کو اس کے اصل (حقیقی) وزن کی بجائے غیر حقیقی وزن پر تولا جاتا رہا۔

تو یہ تھی کچھ “ذو بحرین” مصرعوں کی روداد۔

* ===== ذوالبحرین بطور صنعت =====

جیسا کہ ذکر ہوا، کسی مصرعے کا دو بحروں کے وزن کے مطابق ہونا عام طور پر اتفاق ہی ہوتا ہے۔ البتہ شاعری میں اسے ایک صنعت کے طور پر بھی استعمال کیا جا سکتا ہے۔ ایسے مصرعے کے لیے “ذوالبحرین” کے علاوہ “مُلوّن” یا “مُتلوّن” کی اصطلاح بھی استعمال کی گئی ہے۔

البتہ راقم نے اسے بطورِ صنعت بہت زیادہ استعمال ہوتے نہیں دیکھا۔ شاید اس کی ایک وجہ یہ ہو کہ ایک سے زیادہ بحروں کے مطابق مصارع بنانے کی دھن میں شعر کے دیگر اوصاف کی قربانی دینی پڑتی ہے، جس سے شعر کا مجموعی حسن مجروح ہونے کا اندیشہ رہتا ہے۔

* ===== یکساں بحروں کا دھوکا =====

ذو بحرین سے متعلق غلط فہمی کا تذکرہ ہم کر ہی چکے ہیں۔ اسی طرح کبھی یوں بھی ہوتا ہے کہ کسی شعر کے دو مصرعے قریب الوزن ہونے کی بنا پر دو مختلف بحروں میں کہ دیے جاتے ہیں۔ ایسا شعر بھی اصولی طور پر بے وزن ہی شمار کا جاتا ہے۔

راقم الحروف کی نگہ سے اس طرح کے اشعار اکثر گزرتے ہیں اور لطف کی بات یہ ہے کہ نہ صرف نوآموز، بلکہ کبھی تو تجربہ کار سخنور صاحبان سے بھی یہ غلطی سرزد ہو جاتی ہے۔ ایسی ہی ایک مثال کتاب “میزانِ سخن” سے پیش ہے، ملاحظہ فرمائیے۔

خوشی بھی ہے غم بھی ہے اس دہر میں

زمانہ بھی یکساں رہا ہے کسی کا

اس شعر کے مصرعے درج ذیل اوزان میں ہیں۔

فعولن فعولن فعولن (فعَل)

فعولن فعولن فعولن (فعولن)

ایسی ہی غلطی دیگر بحروں میں بھی دیکھنے میں آتی ہے جو قریب الوزن ہوں۔ جیسے۔

فاعلاتن (فعلاتن) فعلن

فاعلاتن (مفاعلن) فعلن

المختصر، ایسے اشعار جن کا ایک مصرع ایک بحرمیں اور دوسرا دوسری بحر میں ہو، تو ایسے اشعار روانی میں چاہے موزوں معلوم ہوں لیکن عروض کے مطابق بے وزن ہی قرار پائیں گے۔

* ===== اوزان اور ارکانِ قیاسی =====

عروض میں گرفت کی کمزوری کی وجہ سے بعض اوقات مصرعے یا شعر کا وزن بتانے والا کچھ ایسے ارکان استعمال کرنے لگتا ہے جو عروض کے معینہ ارکان نہیں ہوتے۔ بعید نہیں کہ دیکھنے والا دو اوزان کو ذوالبحرین سمجھنا شروع کردے جبکہ ان میں سے ایک وزن کی کوئی حقیقت ہی ہو ہو۔

کتاب “میزانِ سخن” ہی میں ایک اور قصے کا اشارہ ہے جس میں ناسخؔ کی ایک غزل کے مصرعے کا ذکر ہے۔

؎ نیام تیغ قضائے مبرم لقب ہے قاتل کی آستیں کا

اس مصرعے کا عروضی وزن “فعول فعلن فعول فعلن فعول فعلن فعول فعلن” ہے۔ اس قصے میں ایک صاحب نے مصرعے کا وزن “مفاعلاتن مفاعلاتن مفاعلاتن مفاعلاتن” بتایا اور اس پر تقطیع بھی کر کے دکھا دی۔ جبکہ ایسا کوئی وزن عروض میں موجود ہی نہیں ہے۔

فعول فعلن فعول فعلن فعول فعلن فعول فعلن — عروضی وزن: صحیح

مفاعلاتن مفاعلاتن مفاعلاتن مفاعلاتن ——— قیاسی وزن: غلط

راقم کے تجربے میں بھی ایسے مباحث گزرے ہیں جن میں خود ساختہ ارکانِ وزن کو بطور میزان استعمال کیا گیا۔

یہاں سمجھنے کی بات یہ ہے کہ اپنی مرضی کا کوئی بھی پتھر پلے پر رکھ کر وزن ناپنے کی بجائے میزان کے لیے جو باٹ مقرر کر دیے گئے ہیں، انھیں سے وزن تولا جانا چاہیے۔

* ===== وزن میں غلطی کے اسباب =====

ذوالبحرین سے متعلق بحث تمام ہوچکی البتہ اس بات کی نشاندہی کرنا ضروری معلوم ہوتا ہے کہ اوزان کی غلطی کیوں ہوتی ہے۔ اگر اس کے اسباب سمجھ میں آ جائیں تو شعر کہنے والوں کی محنت ضائع ہونے سے بچائی جا سکتی ہے۔

اشعار میں وزن کی غلطیوں کے کئی اسباب ہو سکتے ہیں۔ ان میں زیادہ دکھائی دینے والے یا عام اسباب درج ذیل ہیں۔

۱۔ عروض سے ناواقفیت

یہ اغلاط مبتدیوں کے اشعار میں ہونا ایسا تعجب کا باعث نہیں ہوتا کیوں کہ وہ یا تو عروض سے نابلد ہوتے ہیں یا ابھی سیکھنے کے مرحلے میں ہوتے ہیں۔ ایسے میں صرف درج بالا غلط اوزان ہی نہیں بلکہ دیگر بحروں میں بھی غلطیاں ہوتی ہیں۔ ایک ممکنہ صورت یہ بھی ہو سکتی ہے کہ کوئی شخص نوآموز نہ ہو بلکہ ایک عرصے سے فقط اپنے فطری ذوق کی رہنمائی میں شاعری کر رہا ہو اور اسے یہ علم ہی نہ ہو کہ عروض بھی کسی چڑیا کا نام ہے۔

۲۔ عروض سے لاپروائی

اگر وزن کا نقص کسی کہنہ مشق شاعر کے ہاں نظر آئے تو اس کا ایک سبب یہ ہوسکتا ہے کہ شعر فی البدیہ کہا گیا اور جلدی میں بغیر جانچ پرکھ کیے آگے پیش کر دیا گیا ہو۔ ایسا کرنا اچھی بات نہیں ہے۔ یہ بے پروائی آہستہ آہستہ اگر عادت بن جائے تو شعری تخلیقات میں نقائص کا امکان بھی بڑھ جاتا ہے۔ بہتر یہی ہوتا ہے کہ شعر کہ کر پہلے تسلی کر لی جائے۔ اس سے بڑھ کر احتیاط یہ ہے کہ نیا کلام فوراً آگے بڑھانے کی بجائے الگ رکھ دیا جائے اور دو چار روز بعد اس پر نظرِ ثانی کی جائے۔ اس طریقے سے اپنے ہی اشعار کو تازہ نگاہ سے دیکھ کر ان میں خامیاں تلاش کرنا آسان ہو جاتا ہے۔

۳۔ عروض سے اعراض

اشعار میں وزن کی خرابی کی ایک وجہ یہ بھی دیکھنے میں آتی ہے کہ شاعر کسی طور عروض کو اہمیت ہی نہیں دیتا بلکہ اپنے ذوقِ شعری پر اعتماد ایسا ہوتا ہے کہ عروض اور بحروں کے نظام کو یکسر مسترد کر دیتا ہے۔ ایسے افراد بھی مختلف محفلوں میں نظر آ جاتے ہیں جن کے نزدیک شعر وہی ہے کہ جو القا ہو۔ بعض کا ماننا یہ ہے کہ بحر میں شعر کہنے سے اصل خیال یا مفہوم مجروح ہو جاتا ہے اس لیے بحروں کے چکر میں نہیں پڑنا چاہیے۔ اگر اس میں واقعی حقیقت ہوتی تو سوداؔ، میرؔ، غالبؔ، اقبالؔ اور دیگر اساتذہ کے کلام بحر سے مبرا ہوتے یا پھر بحر میں ہونے کے سبب ان کا اثر زائل ہو چکا ہوتا۔ لیکن ایسا کچھ بھی نہیں ہے۔ راقم کے نزدیک یہ محض سہل انگاری کی ایک صورت ہے ورنہ آج بھی شعرا بحر میں وہ اشعار کہ رہے ہیں کہ جو “بے بحریے” لکھنے سے قاصر ہیں۔

اس کی بجائے اگر ذرا توجہ عروض پر مرکوز کی جائے اور اسے مشق کا مسلسل حصہ بنایا جائے تو بحر اور وزن کے مطابق شعر کہنا شاعر کی فطرتِ ثانیہ بن جاتی ہے۔

احقر

عامر عباس عامرؔ