من بیران بوھگ ءَ آں۔ اکرم ارس
من بیران بوھگ ءَ آں
اکرم ارس
گپے زان ئے یار!
گپ وھدے زندمان ءِ کیت گڑا مردم بازیں گڑ ءُ منجانی شکار بیت ھمے گڑ ءُ منجانی تہ ءَ مردم وتا شوھازگ لوٹ ایت وتا پھمگ لوٹ ایت بلے
گپے زان ئے!
من زندمان ءَ تُشے ھم سرپد نہ باں نا کہ وتا شوھاز ات کتگ
گپے زان ئے!
من ءَ لبزانک دوست بیت لبزانک ھما دنیا انت ھود ءَ ھچ وڑیں تما ءُ تلب نہ کنت مردم لبزانکی دنیا ءَ مردم بس لبزانی مھتاج انت لبزانک ترا ھچ وڑیں چیزاں گوں بندوک نہ کنت ھود ءَ تھنا تو ئے تو ھما مارشتاں نبشتہ کن ئے کہ تئی اندر ءَ ردوم زور انت لبزانک ترا آجو کنت چہ ھر وڑیں چست ءُ ھیراں
چوناھا گپے زان ئے
من لبزانک ءَ جوان سرپد نہ آں بلے منی نزیک ءَ لبزانک مردم ءِ دومی مات انت کہ چُک ءَ سھڑین ایت لولی دنت لبزانک ھمے وڑ انت تو اگاں لبزانک زرت ھرکجا بہ بہ ئے تھنا نہ بئے پرچا کہ لبزانک تئی تھنائی درمان انت ھمک تئی اندر ءِ ھورکیں جاھاں پُر کنت ترا ملور ءُ مونجا بوھگ نیل ایت
گپے زان ئے
مستریں رنج پہ من ایش انت چیزے وھد بیت منی کباٹ ءَ کدامگ بستگ تئی جست ءَ ابید پیسرا ترا ھال دیاں منی کباٹ ءِ تہ ءَ یک ڈائری، چندے کتاب انت ءُ یک کلمے، کلم ءِ سیاھی ھُشک بوتگ انت ڈائری ءِ ھم رنگ لگشتگ کتاباناں انچو کدامگ بستگ ھچ زانگ نہ بنت کجام نبشتہ کار ءِ کتاب انت
گپے بہ گشاں ترا!!
منی ھست ءُ نیست ھمے ڈائری ءُ چندے کتاب انت ایشاناں کہ کدامگاں برتگ نوں من ءَ گمان بیت منی اندر ءَ ھم کدامگ ءَ بستگ نوں ھمے گمان بوھگ ءَ انت من بیران بوھگ ءَ آں پرچا کہ منی اندر ءَ جیڑگ، ھیال ءُ مارشتاں کدامگ بستگ اے بیرانی ءِ نشانی انت نوں بس منی جون پش کپگ ءَ انت ساہ زوریت بلے ھچ کت نہ کنت ءُ زندگ ءَ زندگیں بیرانی ھمیشی ءَ گش انت نوں من زانگ ءَ آں من بیران بوھگ ءَ آں