لچّہ ۔جُست بکن
اکبر بارکزئی
تو کہ سَر زُرتہ وتی دستءِ دلا جُست بکن!۔
تو وتی سینگءِ پُر مھریں گُلا جُست بِکن!۔
تو وتءَ جُست بِکن!۔
تو منءَ جُست بِکن!۔
هر کسءَ جُست بِکن!۔
جُست بِکن!۔
جُست بِکن!۔
تو وتی کوہ ءُ گَراں جُست بِکن!۔
کوچگ ءُ مچگدگاں جُست بِکن!۔
کور ءُ گیابان ءُ ڈلاں جُست بِکن!۔
تو وتی گز ءُ چِشاں جُست بِکن!۔
گوھار ءُ براتان ءُ کساں جُست بِکن!۔
تو وتی مات ءُ پتاں جست بکن!۔
کوهنگیں دَپتراں تپاّس بکن!۔
ھَنّوگیں جاوراں چکّاس بکن!۔
راج ءِ محنت کشاں تو جُست بِکن!۔
کاری ءُ بَزگراں تو جُست بِکن!۔
همدلیں بیل ءُ یلاں جُست بِکن!۔
تو وتی راہ بَراں جُست بِکن!۔
هَرچ گپّے چہ اِشاں جُست بِکن!۔

””چون ءُ ”پرچے“چہ اِشان جُست بِکن!۔
توکہ سَر زُرتہ وتی دستءِ دل ءَ جُست بِکن!۔
تو وتی سینگءِ پُر مھریں گُلا جُست بِکن!۔
تو وتءَ جُست بکن!۔
تو من ءَ جُست بکن!۔
هر کس ءَ جُست بکن!۔
جُست بکن!۔
جُست بکن!۔
راجءِ اے اُگدہ کہ تو زُرتہ۔ بِزان!۔
رهبراں دائما چے کُرتہ۔ بِزان!۔
راجءِ غم وار و بَداں درُست بکن!۔
تو وَتی بیل و یلاں درست بکن!۔
تو پہ جوانی آ وتی راہ بَراں درُست بکن!۔
جُست بکن!۔
کواپگیں نعرہ یاں روچ و شپا رومُست بکنت
کار بَندیت دِگِراں جِندءِ ، بلے بُست مَکنت
توچُشیں رَهبر ئے نَزیکءَ مرو!۔
بے دلیں نا شَرءِ نَزّیکءَ مرو!۔
تو چُشیں نا شَراں پیشوک مکن!۔
آچِشے تو پہ اِشاں روک بِکن!۔
تو وتی فکرءِ سر ءَ، جِند ءِ سر ءَ اوست بکن!۔
کلپ ءَ رَدکاراں وتی دوست مَکن!۔
جُست بکن!۔
تو کہ سر زرتہ وتی دستءِ دلا جُست بکن!۔
تو وتی سینگءِ پُر مھریں گلا جُست بکن!۔
تو وتءَ جُست بکن!۔
تو منءَ جُست بکن!۔
هرکسءَ جُست بکن!۔
جُست بکن!۔
جُست بکن!۔
فکرءِ رُژنا وتی بَندِیگ مکن!۔
رُنگ راهاں وتءَ نَدرِیگ مکن !۔
کورکائی تو کسی رَند ءَ مرو!۔
چو مَکسک ءَ تو مَرگ ءِ تَندا مرو !۔
تو وتی جِندا چو تاوان مکن!۔
فکرءِ گنج ءَ وتی چو زیان مکن!۔
بیدِ زانت ءَ کدی آشوب نئیت
بیدِ فکرءِ سِلاہ ءَ سوب نئیت
چو مَبیت مُپت خُدا زیان بہ بئے!۔
چہ وتی جِندا پشو مان بِہ بَئے!۔
تو وئی جِندءِ سرا او ست بکن!۔
تو وتی فکرءَ وَتی دوست بکن!۔
یک دَمے هم وتءَ بے ڈاہ مکن
جُست بکن!۔
تووتی رَهبراں چو وت سر ءُ ،گمراہ مکن
جُست بکن!۔
تو کہ سر زُرتہ وتی دستءِ دلا۔جُست بکن!۔
تو وتی سینگ ءِ پُر مھریں گلا جُست بکن!۔
تو وتءَ جُست بکن!۔
تو منءَ جُست بکن!۔
هرکسءَ جُست بکن!۔
جُست بکن!۔
جُست بکن!۔
ماهنامہ سنگت کوئٹہ