خالق ارمان ءِ دستونک : مَرکب ءِ ھال ءَ بِگر ، شِھزادگ ءَ آواز دئے
دستونک ۔۔۔ خالق ارمان
مَرکب ءِ ھال ءَ بِگر ، شِھزادگ ءَ آواز دئے
بس ھمے دیوالءِ پُشتءَ ساھگ ءَ آواز دئے
چونہا اے پیژگہءِ ھاموشیءَ دیراِنت بلئے
بلکیں کسّے اِش بِکنت دروازگ ءَ آواز دئے
چِیکّ وارت ارواہ بِلّے گوں کپوتی نالگاں
لنکُکاں سازے پَتا ، تمبُورگ ءَ آواز دئے
تئ توارءَ بود کارَنت جَنگی نازینکءُ سِپت
نوبتے نوکیں بِتراش ءُ گْوانزگ ءَ آواز دئے
زندگیءِ پیچ ءُ تابیں کِشکءُدر باز اَنت بلئے
دُور سریں راھے مہ رؤت دیوانگءَ آواز دئے
پمّنءَ سارتیں پناھے سُرمگیں کوھانی رنگ
سَنگراں آسے بلین ءُ زَھرگ ءَ آواز دئے
بس وتءَ ارمان درگیج نوبت ءِ شھر ءِ دلءَ
بس وتءَ اے سِیرکگیں ویرانگ ءَ آواز دئے