پُرسدانک: نبشتہ کار: صابدہ بَرکت

مئے لوگ یکّ رھشونے ءَ زِبھر بوت 😢

منی واجھیں پِت بَرکت بل والا ءِ زند ءُ اِزم بابت ءَ چیزے گُشگ لوٹ آں ۔
باز مردم ءِ ھمبراھی ءَ منی ھم واھِشت بیتگ کہ وتی پِت ءِ یکّ اِنٹریو ءِ بِگراں دانکہ من ءَ آئی ءِ زند ءُ اِزم ءِ بابت ءَ گِیشتریں سرپدی بِرسیت ۔ بلے زند ءِ بازیں دست گَٹیانی سبب ءَ من ءَ وھد ءَ موہ ندات ۔ اسلم عثمان نامیں مردکے ءَ آئی ءِ کسانیں اِنٹریو ءِ گِپتگ اَت ۔ من ءَ سکّ باز وشی بیت ۔ من آئی ءِ سکّ باز شُکرگُزار آں ۔ آ انٹریو ءِ تھا پِت وتی زند ءِ بابت ءَ بازیں گپے گِشینگ ءَ اِنت ۔
برکت بل والا بزاں منی پِت دشت بِشولیگ ءَ کھدہ نور مھمد ءِ بازار ءَ شمبے کلمی ءِ لوگ ءَ ودی بیتگ ۔ آئی ءِ ودی بوھگ ءِ رمس ءُ سال ءَ من نزان آں ۔ آ وھد ءَ مئے کھول ءَ چشیں وانندھے نہ بیتگ کہ اشاں وتی رکارڈ ءَ نبشتہ بکنت ۔ آ وھد ءَ پہ گریبیں مردمانی واست ءَ وانگ یکّ بلاھیں جیڈھے بیتگ ۔
منی پِت وھدے رُستگ بَٹیرُک بیتگ گُڈا آئی ءَ پس چارینتگ ۔ منی پیرک ءَ وت باز پس بیتگ بلے پِت ءَ بازار ءِ پس ھم چارینتگ اَنت ۔
آئی ءَ پس ءِ چارینگ ءِ وھد ءَ سوت گُشی یے ھُب ءُ واھگ ھم بیتگ ۔ جنگل ءَ آ وھدے کھیری سر ءَ درکپتگ گُڈا آئی ءَ زھیریگ الھان کُتگ ۔ منی پت وھدے جوان بیتگ آ سرپد بیتگ کہ منی تھا گُشندھی ءِ سِنچ ھست ۔ گُڈا آ سبزل سامگی کِرّ ءَ پہ گُشندھی دربَرگ ءِ ھاتر ءَ شُتگ ۔ سئے چار روچ ءَ ھمائی کِرّ ءَ بیتگ چیزے نہ چیزے دربُرتگ اِش ۔ ءُ پدا اتکگ ھما شونگی ءُ کھیرانی سر ءَ زھیریگ ءَ وت ءَ وشنود کُتگ ئِے ۔ وھدے اَبّا ءَ سوت گُشی شَرّیں وڈی ءَ دربُرتگ گُڈا سبزل سامگی کِرّ ءَ پہ دربَرگ ءَ رو آ بند کُتگ ئِے ۔ پدا سِیر سربر ءِ بیتگ وت سوت ھم گُشتگ ئِے ءُ ڈُھل ( ٹیمبُکّ )ھم جتگ ئِے ۔ آ دور ءَ اسپیکر نہ بیتگ ۔ سانوے ریڈیو ءِ زُرتگ ئِے میک ءِ پِر کُتگ ئِے میک ءَ کرزے بستگ ئِے ءُ سیرانی سر ءَ سوت گُشتگ ئِے ۔

منی پِت یک جوانیں اُژناگِرے ھم بیتگ ۔ چوکہ مئے میتگ ءَ کور ءُ ڈگاراں اگاں چُکے یا مردمے آپ ءَ بُرتگ گُڈ ءَ منی پِتءَ کَشیتگ ۔ رند ءَ منی پت پہ آژناگ ءَ باز جاہ ءَ بُرتگ اِش ۔
منی پِت ءَ شِکار ءِ سکّ شوک اَت ۔ مسترین گُش اَنت تئ پت ءَ کسانی ءَ مدام گُلیرے گُٹّ بیتگ جنگل ءَ ویل بیتگ ۔ کھیرانی ٹُلّ ءَ گوں گُلیر ءَ ءُ پدا زھیریگی پدا بیتگ ۔ یکّ وھدی ءَ پہ شکار ھاتر ءَ آئی کِرّ ءَ تپنگے بیتگ ۔ بلے بلوچستان ءِ نگیگیں جاورانی سبب ءَ پِت ءَ تپنگ ھم ببا دات ۔
ھنیگیں وھد ءَ آ ساری ئیں وڈ ءَ شکار ءَ نہ شُتگ ۔
منی پت ءَ وتی اولی سانگ پَنُکّ بنت ءِ پِنڈوک ءِ گوما بل نگور ءَ کُتگ ۔ اے وھد ءَ اَبّا یک کاملیں گُشندھے بیتگ ۔ ساز ءُ زیمل ءَ گوں وتی بارگیں گُٹ ءَ سکّ آشناگ بیتگ ۔ میتگاں ھرچ سیر ءُ سربر ءَ پِت ءَ سوت گُشتگ ۔ منی پِت ءِ بنداتی سازگِرّ واجہ پکیر ، واجہ ھدا بکش ، واجہ امیر بکش ( بینجو ماسٹر ) بیتگ اَنت ۔ ءُ پدا داں دیراں آئی ءِ وسرک اُستاد گپور (ھُدا مُرزی )بینجو والا آئی ءِ بینجو ماسٹر بیتگ ۔ ءُ پدا گڈی وھد ءَ اُستاد داد اللّہ ءُ شاھُو اَبّا ءِ بینجو والا بیتگ اَنت ۔
منی مات سعیدہ منی پِت ءِ دومی زال اِنت ۔ منی مات ءِ مات ءُ پِت ھئیر ءَ آباد ئیگ اَنت ۔
منی پِت سکّیں سسا ئیں مردمے بیتگ ۔ ساز ءُ زیمل ءِ دیوانگے بیتگ ۔ آ بینجو ءِ جنگ ءَ ھم سکّ بلد بیتگ ۔ اُستاد دادللّہ اے گپّ ءَ وت گُشیت کہ من ءَ بلوچی ساز اُستاد برکت ءَ دربارئینتگ ۔
وھدے آئی ءِ دوست ءُ عزیزے لوگ ءَ آئی ءِ چارگ ءَ اتکگ اَنت گُڈا آئی ءَ بینجو جتگ ءُ آ ملما کُتگ اَنت ۔ بلے اَبّا ءَ گِیشتر گُشندھی ءَ وتی بور تاچینتگ پمشکا بینجو ءَ گِیشتر گِستا بیتگ ۔ بلے اے گپ ءَ من پہ پھر گش آں کہ منی اَبّا جان یک شرّیں بینجو ماسٹرے ھم بیتگ ۔ ھنیگ ماھی ءَ ساری بھشتیگیں اُستاد گپور ءِ بینجو سر ءَ لاھتے ساز جت ئِے ۔ تو زانت اے ھما دستاں کہ ساری بینجو ءَ ماسٹر بیتگ اَنت ۔
منی پِت اولی سانگ ءَ پد بل نگور ءَ جاہ مہ نند بیتگ ۔ وتی مات ءُ پتانی چارگ ءَ مدام کھدہ نور مھمد ءِ بازار ءَ گوں ماتی پُنّک ءَ پیادگ رھادگ بیتگ ۔ اَبّا ءَ دربرگ ءِ سکّ باز بود اِش مان بیتگ ۔ اگاں چیزے نزانتگ ئِے دربرگ ءِ ھاتر ءَ کسان ، مزن ھرکسی گور ءَ پہ شان شتگ ۔ منی پِت یکّ شرّیں زبان دوستے بیتگ ۔ گشندھی ءَ ابید منی پِت بلوچ راج دپتر ءَ ھم شَرّیں وڈی ءَ آشنا بیتگ ۔ بلوچ راج دپتر ءِ جنگی داستان بہ بنت یا مِھری داستان دوئیں زانتگ اَنت ئِے ۔ آئی ءَ مئے کِرّ ءَ مدام شعر ونتگ ءُ شعرانی بزانت مار ءَ گُشتگ اَنت گوں ۔ اَبّا ءَ وتی زبان سکّ دوست بیتگ ۔ آئی ءِ گپانی تھا وتی زبان ءِ شیرکنی مدام زاھِر بیتگ ۔ آئی ءَ مدام جھد کتگ کہ وتی دپ ءِ درتکگیں گپ زگریں بلوچی ءَ بہ بنت ۔ من بَرے بَرے لوگ ءَ پہ پریکٹس انگریزی ءَ گپ جتگ گُڈا من ءَ ھَکّل ھوکّل کُتگ ئِے کہ منی چُکّ لوگ ءَ بلوچی ءَ گپ بجن ۔ بلے آ وتی دو گپ ءَ مدام بژنیگ بیتگ ۔ کہ اُردو ءَ گُشت اَنت ئِے ۔ یکّے میپلانی سر ءَ وھدے سوتے ھلاس بوھگی بیتگ ۔ گُشتگ ئِے رُکھ جاو ءُ دومی میپلانی سر ءَ یکے ءَ اگاں ڈیلا داتگ گُڈا گُشتگ ئِے شُکریہ ۔
منی پت ءَ وھدے ساز ءُ زیملانی بابت ءَ گپ ءُ رپ جت گُڈا مدام گُشت ئِے اول اللّہ دومی کوم ۔ اَبّا ءَ اے گپ ھم مئے کِرّ ءَ مدام گُشتگ کہ من اگاں بگش آں منی اُستاد منی راج اِنت منی کوم اِنت من رد نہ باں ۔
منی پت ءَ مدام وتی راج ءِ کِرّ ءَ اگاں چیزے یا زرّ لوٹ اِتگ گُڈا ھزاری دو پنچ سدی گُشتگ ئِے ءُ دو ھزار چار پنچ سدی گُشتگ ئِے ۔ آئی ءَ وتی کوم ءِ کِرّ ءَ چیز ءِ پچگرگ پہ اھترام وتی ھکّ سر پد بیتگ ۔ منی پت ءِ دپ مدام کندگ ءَ پُرّ بیتگ ۔ مزاک ءُ مسکرائی ساز ءُ زیمل ءَ پد آئی ءِ شوکتریں شوک بیتگ ۔
منی پت ساری ءَ نہ ڈاکٹراں شتگ نہ دوا ءُ درمان ئِے وارتگ ۔ بلے ھنیگ ءَ ڈّک ڈکّ ءَ درمان ئِے وارتگ ۔ ھنیگیں وھد ءَ کماش ءِ گیشتر وھد جنگل ءَ گوستگ ۔ سھب ءُ بیگاہ جنگل ءَ بیتگ ۔ برے چُکے بُرتگ ئِے گوں کھیری چِتگ آورتگ گوں ۔ اگاں میپلے ءَ روگی بیتگ ئِے گُڈا ھما وھد ءِ ھساب ءَ وت ءَ سر کُتگ ئِے ۔
من اے گپ ءَ گُش آں رد نہ باں کہ منی پت ساز ءُ زیمل ءِ یکّ آشکے بیتگ ۔ مدام دربرگ ءِ تھا بیتگ ۔ مدام گُشتگ ئِے اے دنیا ءَ ساز ءَ ھمینچک دربرئے گِیشتر دربرگ ءِ نیمون بیت ۔
منی پت سوتانی ترز دیگ ءَ ماھر بیتگ ۔ سوت ءِ ترز دیگ ءِ وھد ءَ لوگ ءَ الھانیگ بیتگ ۔

منی پت ءَ اے گپ مدام کتگ کہ کجام مرد ءِ چُکّ ءَ من ءَ ھجام ءُ ھسپتال ءَ دیستگ ۔ ھو پت ءَ راست گوشت ابّا بہ ھسپتال ءَ نہ شتگ ۔
منی پت ءِ بیماری اِلاج ءَ منی بَلُک ءَ پہ کُلّگ ءَ سپائیں روگن ءُ ناہ گراستگ داتگ ۔ منی پِت ءَ ھُدا ءِ گوما یکّ جِتائیں کنکشنے بیتگ ۔ آ بہ بیمار نہ بیتگ ۔ نزان آں ھُدا ءَ سکّ دوست بیتگ پمشکا بیمار نہ بیتگ ۔ یا وت تندرست بیتگ ۔ بلے اے گپ ءَ من زان آں ھُدا ءِ گوما آئی ءِ مھر مھکم اَت ۔
منی پت ءَ گاڈی سواری سکّ تُرستگ ۔ اے گپ ءَ بلکیں باز سرپد نہ اِنت کہ چی ءَ تُرستگ ئِے ۔
منی پِت کسہ کنت یکّ برے ما گاڈی ءَ سپر ءَ بیتگ ئیں گاڈی ءِ تائی راڈ درتکگ ما مَرگ ءَ رکیتگ ئیں ۔ نو ھما تُرس ءَ منی ءُ گاڈی ءِ میان ءَ مدام جنگ اِنت ۔ من اے گپ ءِ سرپدی ءَ ھم شمار ءَ دے آں ۔ کہ منی پِت ءَ ساری ءَ وت ءَ ھم گاڈی یے بیتگ ۔

منی پت ءِ مَرگ ءِ ھاتر ءَ بگندئے کسے سرپد نہ اِنت کہ اُستاد ءَ چوں مار ءَ یلدات ءُ شت ۔ من اے گپ ءَ چوش گیشین آں ۔
منی پت ءِ ناسلامتی اناگھی ھمے شپ ءَ کہ منی پت ءَ اے کوڈھیں دنیا یلدات ۔ دم پُر نہ بئیگ ءِ سبب ءَ ما ھندی ڈاکٹرے آورت ڈاکٹر ءَ منی پت ءِ بی پی چارت ۔ منی پت ءِ بی پی چیک کنگ ءِ اے اولی ءُ گُڈی رند اَت ۔ منی پت ءَ چد ءُ ساری بہ بی پی چِیک نہ کنائینتگ اَت ۔ ڈاکٹر ءَ گوشت بی پی شَرّ (نارمل ) اِنت ۔ ھمے ساہ پُرّ نہ بئیگ ءِ نیم کلاک ءِ میان ءَ منی پِت ءَ بال کُت ءُ وتی ابدی جاہ شُت ۔
شناکتی کارڈ ءَ منی پِت اُمبر شست ءُ چار سال اِنت ۔ بلے منی پت ءَ ھنیگ ءَ ھم مئے کِرّ ءَ گوشتگ کہ منی اُمبر کم سے کم ھشتاد سال بیت ۔

گُڈی من ھمے گُش آں مئے لوگ یکّ رھشونے ءَ زِبھر بوت ۔

اَبّا جان بَھِشت تئی ھنکین بات (آمین)

تو اے نابودیں چُکّاں سکّ یات کائے