رضیہ بگٹی: نوزدھمی کرنءِ بلوچی شائر
رضیہ بگٹی: نوزدھمی کرنءِ بلوچی شائر
پٹپولکار ءُ نبشتہ کار : پناہ بلوچ
بگٹی بلوچانی ناموریں ءُ گھگیریں تمن ءِلیکغ بیث۔ دہ ھزار یک صد شست چارماکُنڈ کلومیٹر سرءَ تالانیں چار تحصیل سوئی، ڈیرہ بگٹی، لوٹی ءُ پھیلاوغءُ چار سب تحصیل بیکڑ، سنگسیلہ، مالم ءُ پیرکوہ نامی دمگءَ جاھمنند انت۔ ایشانی روش دراخت ءَ بارکھان ءُ راجن پور ضلع ، روش ایرکفءَ سبی، بولانءُ نصیرآباد ضلع ، گوریچانءَ کوہلو ءُ بارکھان ءُ زربار ءُ کشمور ءُ صحبت پور ضلع انت۔ بگٹی تُمنءِ مہلوک وثی کش ءُ گوری ضلعانی اواریءَ تا سندھ ءُ پنجاب ءَ تالان انت۔ڈیرہ بگٹی ءِ کھنیں نام ڈیرہ یا دیرہ بیوَرغ اث کہ بگٹی آنی اوّل سریں سردار عاکف خانءِ بچ بیوَرغ نام ءَ ایر کنغ بیثغث۔
بگٹی تُمن ءِ باروا بازیں نبشت کار اے کپءَ تپاک انت کہ آھانی تعلق ایران ءَ بلوچانی صوبہ سیستان ءُ بلوچستان ءِ دمگ “بُگ” ءَ گوں تعلق دار اثنت پمیشکہ بگٹی نامدار بیثغنت۔ ھنچوش کہ دمگ لاشار ءَ گوں تعلق داریں “لاشاری”، مگس ءَ گوں تعلق دار یں “مگسی” ، بلیدہءَ گوں تعلق داریں “بلیدی” ، گشکؤر ءَ گوں تعلق داریں ” گشکؤری” ءَ کلمت ءَ گوں تعلق داریں ” کلمتی نامدار بیثغنت۔ رائے بَہادر ھتو رام ءُ سردار خان بلوچ ءُ ڈسٹرکٹ گزیٹیئر کے نبشت کار تپاک انت کہ بگٹی ایرانی دمگ “بُگ” گوں تعلق داری ءِ سوبءَ بگٹی نامدار بیثغنت بلے پروفیسر عزیز بگٹی آھاں گوں ھم تپاک نیست انت ءُ گوشیث کہ 1987 ءَ وختے آ انقرہ یونیورسٹی ءَ وانغث تو ھموذا آئیءِ گند ءُ نند کرد نودربراں گوں بیثغث کہ آھاں ھال داثہ کہ بگٹی ترکانی دمگءَ آبادیں کردانی یک مزنیں ءُ ارزشت داریں تمن انت کہ دجلہ ءِ کندؤ ءَ عرفہ ءِ جاگہءَ جاھمنند انت۔ کردی ءَ آھان ءَ “بغٹی” گوشغ بیث۔۔۔۔۔ اجبیں تپاک انت کہ بلوچستان ءِ کردگالی (براھوی) زبان ءَ ھم بگٹی ءرا “بغٹی” گوشغ بیث۔
بگٹی تُمن ءَ جوانسال بگٹی وڑیں نامداریں شاعر ودی بیثہ ۔جوانسال بگٹی ءِ نام آ شہ کُل بلوچ سرپد انت ءُ آ روش دراختیں بلوچستان ءَ یک نامداریں شائر لیکغ بیث۔ جوانسال ءِ اسل نام محمد ابراھیم اث ءُ جوانسال آئیءِ شئیری نام اث۔ آئیءِ باروا این الپ بلوچ باسکءَ شنگ بوتگیں وتی نبشتانک گوشیت۔
” بلوچی شائری ءِ مزن نامیں شائر ءُ جہد کار واجہ جوانسال بگٹی 1885 ءَ نور محمد بگٹی ءِ گس(لوغ) ءَ ڈیرہ بگٹی ءَ “کھٹن” ءَ ودی بوتگ۔ جوانسال بگٹی ءِ اسل نام محمد ابرآئیم بوتگ بلے آئیءِ شائری ءَ آئی ءِ نام چیر داتگ ءُ “جوانسال” سھرءَ کُتگ ءُ مرچی دراہیں دنیا آئیءَ را جوانسال ءِ نام ءَ زانت پجّہ کاریت۔ جوانسال بگٹی یک ازگاریں لوگےءَ چہ سیادی داریت ، آئی ءِ ودی ءَ لھتیں سال ءَ پد آئی ءِ مات ءُ پت ھردو بیران بنت”۔
جوانسال بگٹی ءِ ماث ءُ پث کسان سنی ءَ بیران بیثغثنت ءُ تو آئی ءَر ا ڈاڈی(بَلُّک) ءَ پالثہ ءُ رودینتہ۔ اے باروا جوانسال وث گُشیث:
” 1893ءَ بلوچ قوم ءِ خان ، خان قلات خدائیداد خان بندی کنغ بیثہ آں وختا من یہ پشک توخا ، دنتان بورینوخیں چکے ثاں۔ اے حساواں جوانسال ودی بوئگ ءِ سال 1884 -1885ایں۔ دانی جوانسال مشغاث کہ مکہیں ماث زیان بیثی۔ ڈاڈی ءَ وثی نواسغ گوں نازاں لولی آں پالثہ روذینتہ”
بلوچ جنین آدم لبزانکی مڈی کلیت دار انت۔ سپت، لولی، نازینک، ہالو، لاڑو، زہیروک، موتک ءَ ابید بتل، گوشتن، ڈیہی، دستانگ ءِ ھوریءَ بلوچی لبزانک ءِ ھزانگ ءَ را نہ ایوکا پھریزغ انت بلکن آئی ءَ را نوکیں عبادگ ءَ سر کنگ ءِ ذمہ واری آں ھم پیلہ کنگ انت۔ جوانسال بگٹی ءِ بلُّک ءِ نام رضیہ ھم نہ ایوکءَ آئیءَرا رودینت بلکن لولی ءُ ایندگہ گیدی لبزانکانی گوش دارگ ءَ گوں آئی رَھشونی ھم کُتگ ات۔ گوشنت کہ رضیہ ھم یک شائرے اث۔ آئیءَرا رضیہ ءِ ھوری رضو ھم گوشنت۔ وختے کہ جوانسال ءِ ودی بیئغ سال 1884 -1885ایں تو بانک رضیہ بگٹی ءِ ودی بیئغ سال جوانسال شہ کساس پنجاہ سال پیش بیث۔ مندوست بگٹی ءَ ھال داثہ :
” رضیہ عرف رضو ، بگٹی آنی ہیژوانی پاڑو ءَ پٹھانڑ ہیژوانی ءِجنک اث ءُ سوزل ہیژوانی ءِ لوگ بانک اث ۔ اے بانک شاعر جوانسال بگٹی ءُ منی (شائر مندوست بگٹی) ءِ ماث ءِ ڈاڈی (بلُّک) اث۔ وثی وختے ناموریں شائرہ اث۔ آئی ءِ زہگاں پہ لولی، نازینک، نیک دعائی گال ءُ ایندگہ شائری تیوغیں راجءَ تالان اثنت ءُ مَھلوک ءِ دفءَبیثغنت۔ بلے دلگوش نہ دیگ ءِ سوب ءَ اے وختہ گار ءُ بیگواہ بیثغنت۔ آئیءِ لھتیں گال دست کپتغنت ۔ آن ایش انت۔
اے گال پہ جوانسال سال گوشتگ۔
مئیں بچھا پہ سے ھور آمین بنت
یک ءِ حج ءِ نوک دومی لجّ
سیمی جوانیں ٹؤنک
بچ مئیں سے جنءِ کھولی باث
پانزدہ پُسغءِ عاریف باث
پنج بوربھڑتہ میدانا
پنج گوں شاذہ ءُ سئیلا نا
پنچ گوں پث ءِ دیوانا
دیوان جُوانہہءَ پہ نامیں
جُوانہہ جوائینا پہ جوانیں
گندیں مردماں پہ عازاویں
۔۔۔۔۔۔۔
پشک دوشانءَ پشک سرا شئر
۔۔۔
پشک تھہ مناں ایکھا دیثؤ دراژدراژ بیثغے
تھہ مناں ایکھادیثہ کہ مئیں آئی پیر سریں
تھہ مناں ایکھا دیثہ مئیں گڑدو کستریں
تھہ مناں دیثہ مئیں ادی(گُہار) دیر سریں
دانکُھرے ایر بی وھاوَ کھن پوشاکی تھلا
دانکھرے ایر بی پہ منی ادی (گُہار) روشنا
دانکھرے ایر بی بیئے ادی شہ پیکوا
دانکھرے ایر بی بیئے منی ادی مئیں گندغا
بئیث او دوشی ثے گوں وثی رازی ایں دلا
گوں وثی دستاں دوشی ثو داثوں گڑدنا
۔۔۔۔۔۔۔۔
بچھک جہانا شہ مئیں مہثریں
ڈومب ڈُوالاں پہ داناگریں
بچھانی ماثاں پہ براثی گلیں
جنکانی ماثاں پہ زانوث گریں
شُوا، بورا بیاریث او نوکراں
میری سلہاں گوں سنج بیث بہاں
زین سرا نرم کھنے ڈوھبراں
سیری رژین ءِ بہاں گہاں
شُوا بورا لغام ءَ لوندی کھنے
تھرفانا بیئے شینھڑی دھ سدی
منی بچھکا من رکیغا سہی
۔۔۔۔۔۔۔۔۔
ریشاں چُکانی ریشءِ پہ رشیفء رُذنت
ریش پہ رشیف ایر کھنت بندانی بُنا
ریش پہ رشیف ءَ رُذنت ڈال شاہیں بروت
دستاں چُکانی کہ تھیراں شہ گوراں رذ مخنت
تھیراں شہ گوراں رذ مخنت عرشی کرگزاں
بچھک کیسغاں بنداث پہ شکاری سیلہاں
کیسغاں بندی ثو ماہلیں گوراں کھنت شکار
کیسغاں بندیثو لُڑی سیمانی سرا
پُشتئے چُکانی کہ پُشت شہ حونی آں مخنت
پھاذاں چُکانی گِندی حونی آں گُڑ مخنت
گندی حونی آں گُڑ مخنت ھلکا بچھ مئے
پُھرگ ئے چُکانی پُھر گوایں ورنا ئے در ئے
زحم چکٗھا چھو شیھنڑی شیموشاں بیئے
میڑوا نامداریں سرے بیث من لیکھوا
سیذ ءُ سڑدار اں نندی گوں میری مہذوا
—————–
دروغ ءَ بندے شُوا رانڈھی آں
مئیں بچھ پھئے درءُ بنداں نئیں
دُرگوشیں جنے مھمانیں
سیاہ مار چوٹویں نیاذانیں
لعل مئیں انگلاں شنگیتہ
شینگتہ جنانی مِھراں
شینگتہ نہہ ولیں بانہی آں
شینگتہ جن مندری آں
بچھک دیر شُثو دیر آختہ
میر ئے گوں مقیمی شھر ءَ
واذ گڑدے کُھذئی نیم وھا واں
دوشی بھونکغ اث بینگانی
زونگ زنگلیں آواز ءَ
دانکھو حیمہءَ وش وھاویں
حوالہ جات:
1۔این الپ بلوچ ، 17 اکتوبر 2022۔ جوانسال بگٹی۔ باسک
2۔ڈاکٹر غلام نبی ساجد بزدار۔ 2017۔ سالینی پٹّءُ پولی تاکبند “ھنکین” تاک -9، بلوچستان یونیورسٹی کوئٹہ ص۔ 145
3۔مولوی نورمحمد دہقانی۔ 1979۔ جوانسال۔ بلوچی اکیڈمی کوئٹہ۔ تاک۔8
4۔واجہ مندوست بگٹی ءِ مچ کثغیں شئیر ءُ حال تران