کینگ ورداں چرتہ کینگ
کینگ ورداں چرتہ کینگ
پولکار ءُ نبشتہ کار: شعیب شاداب
………………………………..
ماں اردو ادبءَ حضرت غالبءَ ہم قافیہ پروشی کتگ ءُ دگہ استاداں ہم۔ نوں ہمے کسانیں عیب یک منّ اتگیں راستی یے زانگ بیت ءُ گوں غزل نگاریءَ ہمگرنچ اِنت۔ زَبرءُ زیرءِ تکنیکی بحث چہ شعری تنقیدیءَ دیری ولگوج کنگ بوتگ۔
جہاں تیرا نقشِ قَدم دیکھتے ہیں
خیاباں خیاباں اِرم دیکھتے ہیں
’’قَدم‘‘ ۔۔۔۔۔۔ ’’اِرم‘‘
۔۔۔۔۔۔۔۔۔۔۔حضرت غالب
کیا دل کو تاب ہو بُتِ سَرکَش کے رُوبرو
سیماب کوئی ٹھہرے ہے آتِش کے رُو برو
’’سَرکَش‘‘ ۔۔۔۔۔۔۔ ’’ آتِش‘‘
۔۔۔۔۔۔۔۔۔۔۔۔۔۔۔بہادرشاہ ظفر
بلوچی لبزانکءِ تہا قافیہ پروشیءِ روایت واجہ سید ظہورشاہ ہاشمیءَ چہ گرانءُ پیداک اِنت۔ اے تہنا لیاقت امینءُ دگرانی میار نہ اِنت۔ عطاشادءَ اوں ہمے رنگیں پابندی گوں سرمچاریءَ پادمال کتگ اَنت۔ بلئے مرے روچاں قافیہءِ بحث یک انچاہیں ایرادے شمار بیت۔ لیاقت امین ۱۹۹۰ ءَ چہ رند شعری ادبءِ تہا گون اِنت۔ کہ آئیءِ بیست سالاں چہ گیش شعری تجربت انگہ روان اِنت۔ ہمے گپّ ءَ لیاقت سرپد اِنت کہ بلوچیءِ سنئیر شاعراں چتور قافیہ کارمرز کتگ اَنت۔ لیاقت امینءُ دگہ شاعرانی شعری فکرانی درجنئگ ءُ گیشینگ علمی نقادانی کار اِنت۔ پریشیءَ بلوچی روایتی شعری لبزانی ایرادءُ فنکارءِ کردءُ ذاتءُ نامءِ تران معنایے نہ داریت۔ ادب یک ءُ دو روچی ترانے نہ اِنت۔ اے یک مستندیں علمی فیلڈے۔ پمے واستہ قبل اِز وقت جذباتی بوہگءِ ضرورتءَ من مسترد کناں۔
چہ رنگءَ اَرس ءُ ھیکاراں بداراں
دگہ کسّے ترا گوں کَندگءَ اِنت
چتور بگوشاں کہ دراہ اَنت آزگیں ٹپ
کہ دنیا یے اِشانءَ گِندگءَ اِنت
پدءَ گوانک جن اے بے گنجیں زھیرءِ
منی شُومیں دلءَ را سِندگءَ اِنت
شکرگالیں منی ھانل دوسے گال
سید پرتو پدءَ بندگءَ اِنت
’’کَندگ‘‘۔۔۔۔۔ ’’ گِندگ‘‘۔۔۔۔۔ ’’سِندگ‘‘۔۔۔۔۔۔’’بَندگ‘‘
۔۔۔۔۔۔۔۔۔۔۔۔۔۔ سیدظہورشاہ ہاشمی
پہ دراھباتاں اَمّلءَ پَسّوے داتگ گوشئے زاناں
کہ ہِنّی رِتکگیں دستاں گوں، بنداں چہ دلءَ سِندایت
من ریپاں کہ منی اُپارگانی دُوت ءُ پاھاراَنت
اگاں گُل گوں تلاھیں شکّءَ ملگوراں وتی رَندایت
’’سِندایت‘‘۔۔۔۔۔۔ ’’ کَندایت‘‘
۔۔۔۔۔۔۔۔۔۔۔۔۔۔۔۔۔۔۔۔۔۔۔۔ سید ظہورشاہ ہاشمی
چائیءَ دوری شکّلیں ساہءِ سِندگ اِنت
زندمانی ماھیں گلءِ پُلیں کَندگ اِنت
شپ چراگءِ رہچاریءِ آسر پہ منءَ
سرشپءَ دانکہ آسگءَ بامءِ، نِندگ اِنت
کے میاریگ اِنت، پرچےءَ پولنگ اِت جناں
مستریں رَدواری منی پھرءِ بَندگ اِنت
’’سِندگ‘‘۔۔۔۔۔۔ ’’ کَندگ‘‘ ۔۔۔۔’’ نِندگ‘‘ ۔۔۔۔۔ ’’بَندگ‘‘
۔۔۔۔۔۔۔۔۔۔۔۔۔۔۔ سید ظہورشاہ ہاشمی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گراں تریں بُنباراَنت منی بھرءَ کپتگیں
انگت ہم سرباتے بہ بوتیں من زُرتگ اَت
ایرجناں وہدءَ پرچےءَ ساڑایاں وتءَ
وژلیں باریگ پمّنءَ ہورءُ شَرتگ اَت
سیزدہ سال اِنت ہانلءِ ندراِنت دل ، سید
ترانگوں دروھات کہ دمانے اِنسِرتگ اَت
’’ زُرتگ‘‘۔۔۔۔۔۔ شَرتگ‘‘۔۔۔۔’’ اِسِرتگ‘‘
۔۔۔۔۔۔۔۔۔۔۔۔۔۔۔۔۔۔۔۔۔سید ظہورشاہ ہاشمی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
در بگیشاں واھگءِ ترندیں گر ءُ بَنداں چتور
اھدءُ اکرارءُ ھزاری کولءُ سوگِنداں چتور
ترانگ اِت اے سِستگیں دلبندءِ بندوکوں کتگ
تئی زھیراں چہ وتی شُومیں دلءَ سِنداں چتور
وژدلیں باریگ بُرت اَنت ھانلءَ گوں وت سید
گریتگیں چم ءُ لگّت مالیں دِلے کَنداں چتور
’’ بَنداں‘‘۔۔۔۔۔۔۔ ’’ سوگِنداں‘‘۔۔۔۔۔۔ ’’ سِنداں‘‘۔۔۔۔۔ ’’ کَنداں‘‘
۔۔۔۔۔۔۔۔۔۔۔۔۔۔۔۔۔۔۔۔۔۔ سید ظہورشاہ ہاشمی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گنگ اِنت اے زبان پرچہ لہڑیں دلءِ پاہارءَ
ارسے نہ کپیت پرچہ اے رولہیں چم ءَ را
ہرکدکہ دلءَ کش اِت گالے ترا پربنداں
چمّانی شلیں ارساں دروہ اِت منی عقلءَ را
او وہد بچر پشتءَ زیمیں دلءَ ؤزین ئے
چے زانے! کہ چے چے گون اے رفتگیں زندءَ را
اے شاد نہ بیت پدّر سوگند نہ پرشیت مہرءِ
لرزیت اگں نام ئے ہرکد منی اُفّارءَ
’’پاہارءَ‘‘۔۔۔۔۔ ’’ چمّءَ را‘‘۔۔۔۔۔۔۔۔۔۔۔ ’’عقلءَ را‘‘۔۔۔۔۔۔۔۔۔’’ اُفّارا‘‘
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ عطاشاد
منّاں کہ بہشت بے بہا اِنت
وش زید سواد و پرنما اِنت
امباز بدن، پہ زند صد ساہ
ارواہ پہ بدن مدامیءَ اِنت
اے وہد پہ آ دوار ، قربان
پوچ اَنت کہ ماں پوچیں کوڑو ءَ اِنت
’’بہا‘‘۔۔۔۔۔’’ پُرنُما‘‘۔۔۔۔۔۔۔ ’’ مدامیءَ‘‘۔۔۔۔۔۔ ’’ کوڑوءَ‘‘
۔۔۔۔۔۔۔۔۔۔۔۔۔۔۔۔۔۔۔۔ عطاشاد
اردوءُ بلوچیءِ فنِ شاعریءِ استادنی شعری مثالاں چہ پدّر اِنت کہ مزنیں شاعراں ہردورءَ راویت پروشی کتگ ءُ وتی فن یک تنکیں حصارےءِ باہوٹ نہ کتگ پہ وانوکاں اے کندگی حبرے کہ ایشاں قافیہ نہ زانتگ۔ آ دگہ زبانانی غیرعلمی ءُ انچائیں نامداریں ادیبءُ شاعراں علمی نقاد حساب نہ کن اَنت داں کہ آہانی ساچشتانی تہا سنگینیءُ علمی رہبند مہ بیت۔ (تری بلئے آ وتی چاگردءِ تہا گوں کپتگ ءُ نامدار بوتگ اَنت) پرچاکہ ہمے سنگینیں علمی ساچشت دیمترا ادبءِ میراث بنت ءُ ادبءِکورس جوڑ بنت۔ پمیشکا سنجیدہیں علمی نقادءُ استاد سجنیدہیں ادیبانی ساچشتاں دیما کاراَنت۔
لہتیں مردم وت سرا نفسیاتی رنگءَ ’’وش منی‘‘ءِ تہا اَنت ءُ وتارا نیشنلسٹ گُشنت بلئے آہانی نفسیات پدّر کنت کہ آ انارکسٹ اَنت ءُ آہانی انچیں عمل ءِ بزانت چاگردءِ تہا دزمانجنی ءُ ناشرکاری اِنت۔ ماں زندگیءِ ہر فیلڈءَ مستندیں کارءُ گُشتن ہما فیلڈانی استادانی منّگ بنت کہ آہاں علم و فن دربرُتگ۔ پہ شوقءَ نبشتہ کنگءُ کتاب وانگءُ ادبءِ سرا وتی بے دلیلیں رائے دئیگ ءُ گپ جنگ مستندیں رائے منّگ نہ بیت۔ پرچا کہ ہرکسی وانگءُ زانگءِ فیلڈجُتا اَنت ہر فیلڈءَکہ آئیءَ فن ءُ زانت ءُ ٹکینیک دربرتگ آ فیلڈءِ استاد ہما اِنت۔ انچو کہ یک ادبءِ ڈاکٹریں استادے یک میڈیکل مریضےءَ بیماری ءِ معیارءُ پیمانہءَ زانت نہ کنت ءُ وتی فیصلہءَ کت نہ کنت ۔ہمے رنگءَ یک میڈیکل ڈاکٹرے ادبءِ تکینیکانی سرا ءُ ادبی ساچشتانی معیارءُ پیمانہءَ زانت نہ کنت ءُ آئیءِ بابتءَ وتی فیصلہءَ کت نہ کنت۔۔۔۔۔۔۔۔۔۔۔۔۔۔ بایدیں وانوک اے حبر ءَشر بزان اَنت ءُ کسی نامانی پُشتءَ رند مہ کپ اَنت بلکیں علم و زانتءِ رندگیریءَ بکن اَنت وتی صلاحیتاں بہ بند اَنت ہرکس چہ وتی ذہنءُ فکرءَ یک آزادیں انسانے کس کسی غلام نہ اِنت۔ ءُ اے حبرءَ ہم شر وتی ذہنءَ بہ نادین اَنت کہ پنڈت ءَ نمازءِ رپک گون نہ اَنت ءُ پیش امامءَ پوجاءِ رپک۔
جدیدعلمی و ادبی اصطلاحانی سرا بلوچی زبانءِ نامداریں علمی نقادو استادواجہ اے آر دادءَ کتابے نبشتہ کتگ ہمے زوتاں کیت شمارا چرائیءَ فائدگ بزور اِت۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
چمّے وادءُ ۔۔۔۔چمّے بینگ
کینگ ورداں چرتہ کینگ
شعیب شاداب