شاعر۔۔۔۔۔۔قو یل جت
شاعر۔۔۔۔۔۔قو یل جت
۔۔۔۔۔۔۔۔۔۔۔۔۔
بوآں قو یل جَتا نہ جنت
جَتے نہ یاں جَت بیثغاں
ماثا پہ جتی آڑتغاں
آواز گوں جَتی آ شُتہ
لٹّ اوں نہ زُڑتہ تراشتغیں
چِٹ اوں نہ زُڑتہ قمبریں
گوخ اوں نہ دُشتہ ذاتغیں
بگ اوں نہ چارینت گڑدوئیں
میش وبُزی مڑدے نیاں
ڈَکّ اوں کہیراچی نہ جث
ریش ومنی شیری بروث
من پہ زواذ روذینتغاں
گوں عنطراں شہم داتغاں
واپاروں گوں بوراں کثہ
بوران و جوانیں مڑدماں
گُلی کسائیں کرگزاں
رِندی مزن چیڑیں جَناں
ساہے امیریں چاکریں
قول اکبری ئیں پرشتغنت
پَت شہ گہیں مڑداں شتہ
عہدژہ مزن ملّیں جناں
مال پہ ہڑاں بازا نہ اوں
ساہ پہ سرئے پاریزغاں
دوستی پہ زوان آ، نہ اوں
مہرپہ بہاگپتہ نہ بیث
دل کوتلی چی یے نہ ایں
مہرپہ چیار چی گپثہ کیث
یکے حیا دوہمی ادب
سہمی پرے وشّیں لساں
چیارمی پرے دست آ دیاں
چوکہ چمرمن ہُشتراں
کہ استی غلاماں شرکنت
نیستی ملُوکاں گرکنت
۔۔۔۔۔۔۔۔۔۔۔۔۔۔۔