دنیا ھلاسیں کسّھے
دنیا ھلاسیں کسّھے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ شریف مومؔن
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
دنیا ھلاسیں کِسّھے
گوں جیڈگاں بندات بیت
دائم منی ارواہ ءِ مارشتیں دگاں
چیھال جنت
بے ماتیں تِپلے ھر دمان
اِشکندیں وائشتاں وتیگاں رھن کنت
نیمونیں شیر ءِ لزتّاں
میچینگ ءَ پہ تلوسیت
لوگ ءِ دپ ءَ دزموش کنت
پہ مات ءِ کُٹ ءَ زنزریت
روزردگ ءِ یاتانی نوبت نوک بیت
ھمساھگے چہ تپل ءِ پریاتاں گُش ئے
بے وابیں چمّاں شانک دنت
چاگرد ءِ چیھانٹیں در ءَ
دنیا ھلاسیں کسّھے
بے گوش ءَ گوشدارگ نہ بیت
تئی آہنیں دودانی پارسنگ ءِ تہ ءَ
من چو درامد جند ءِ ہنکین ءَ وتی
سرگرد ءُ ویلاں دائم ءَ
پہ ھکّ ءِ جُنزاں آچشیں نیادانی پُرس ءِ پتر ءَ
موتکاں زمانگ گْور جتگ
دھر ءِ گناہ گاریں منی کارست مُرتہ ایوک ءَ
کُشتہ بلاہ نیشیں گماں تئی ھاتر ءَ
ھونانی کترہ رِتکگ اَنت دمکاں زھیرے ساز اِتگ
بیوانکیں میت کہ منی کپتگ پدا بے وارس اِنت
جُست ءَ مہ کن کسّے ترا ھالاں نہ دنت
مپت ءَ وتی نُکّ ءَ مہ تْراکین زندگی
بے ھاجتیں بازار ءِ کِشکاں در مَیا
سوداگری ائیب اِنت اِد ءَ نادزرسانی ساھگ ءَ
دنیا ھلاسیں کِسھے
شھر ءِ ھُدا نا سر پد اِنت گوں من مدامی کیلّ کنت
امروز ءِ لئیبانی تہ ءَ
ریپینگ ءِ مکرانی باپُشت ءَ منارا ریپ دنت
پہ بیوسی زرد ءَ گمے ماراں من ءَ رد داتگے
پیڑاتگے
جند ءِ ابیسّ اِیں باتن ءِ
چیریں ھما کردانی نام ءَ کہ ازل زاہر نہ اَنت
چمّانی اندیمیں چراگانی کش ءِ چو بالو ءَ
من سُتکگاں پیلُشتگاں
ھر شپ بَلے شیدائی ءِ درد ءِ گُباریں گیدی ءَ
راستی دپن کُرتہ ازابیں دروگے ءِ ماں رہسر ءَ
دنیا ھلاسیں کسّھے
بنگیج بیت آسر نہ بیت
ھر دؤر ءُ باریگ ءَ منی
کْوھنیں گُد ءِ داب ءَ پدا
مار ءَ رجیتّ ءُ نوک کنت
ھَو بلّوک ءِ شیریں ھبر تامیں زبان
دراھیں شپ ءَ نشتہ ءُ کاریت کِسّھاں
پیگمبر ءُ دیھ ءُ بلاھاں رنگ دنت
پہ آدم ءِ چُکّ ءُ نماسگ زادگاں
دنیا ھلاسیں کِسّھے
گوں من اے کِسّہ ہچ وڑ ءَ آرگ نہ بیت
مارگ نہ نبیت
پرچا کہ من جند ءِ وتی چہ اندر ءَ گُنگاں ازل۔