دْریگتیں ! نَپسّ ءَ مہ دُروھتیں انگتہ ۔ لچہ کار: امجد بیکس
دْریگتیں ! نَپسّ ءَ مہ دُروھتیں انگتہ
امجد بیکس
دْریگتیں ! نَپسّ ءَ مہ دُروھتیں
منی کُچلّیں دُژمناں
منی راستیں گْوش ءَ چہ سِیکّے مان کَشیتیں
گوں زور ءِ پُر ءَ جِک داتیں
چہ چپیں گوش ءَ در اَتکیں
ھوناں پِژّ پِژّ کُتیں
بلے نَپسّ در مہ یتکیں انگتہ
پہ مھرستان ءِ ھاتر ءَ
دْریگتیں ! داں گُڈی ساہ ءَ من لیب کُتیں
گوں وتی وابانی دوستدار ءَ انگتہ
دْریگتیں منی سر ءِ مِھ ءَ
منی جورّیں بَداں چیڑی یے
گوں کودینگ ءَ ٹوکِتیں
چہ زنوک ءَ دَر کُتیں
ھون گِڑ گِڑ بو بوتین اَنت پہ مادر ءَ
پہ مھرستان ءِ ھاتر ءَ
بَلے منی ساہ در مہ یتکیں انگتہ
منی چَمّاں ءَ شِکّے مان کَشّتیں
ٹیلّگاں نیم راہ ءَ مہ دُروھتیں
دیدوکانی روژنائی بہ ودِّتیں
پہ مھرستان ءِ ھاتر ءَ
دْریگتیں ! ساہ در مہ یتکیں انگتہ
دْریگتیں ! منی دل ءِ دلبند ءَ
منی کلپیں دُژمناں
گوں ٹیکماں کودِّتیں
ھوناں ھار مَلّتیں
جان ءِ ھر بند ءُ رَگّاں
پیاپیں کولنجے ءَ مانپوشتیں
پہ مھرستان ءِ ھاتر ءَ
دْریگتیں ! منی نَپس ءَ مہ دُروھتیں انگتہ
منی کُچلّیں کاتِلاں
منی جان ءِ بند ءُ رَگاں ءَ
پہ کَمّیر ءَ داگ بِہ داتیں
منی سَگّ ءُ اوپار ءَ من ءَ
سَکّی ءِ ساھت ءَ مہ دُروھتیں
زُبان گُنگ بہ بوتیں
ھچ آہ ءُ پریات در مہ یتکیں
پہ مھرستان ءِ ھاتر ءَ
دْریگتیں ! منی نَپسّ در مہ یتکیں انگتہ
منی رانانی بَزگْوشت
پہ کُنٹیں کارچے ءَ ٹُکر ٹُکّر کُتیں
تِیرّوکیں دردے چِست بو بوتیں
پہ مھرستان ءِ ھاتر ءَ
دْریگتیں! منی ارواہ دَر مہ یتکیں انگتہ
منی سَرّگ ءِ سِل
پہ ھنجر ءَ جَتّیں
جان ءِ بند ءُ رَگاں
کار یل مہ داتیں
پہ مھرستان ءِ ھاتر ءَ
دْریگتیں ! منی ھاٹیگ ءَ من ءَ مہ دُرھتیں انگتہ
بلکن ءَ من گوں مردی توکل ءَ
باج بُرتیں چہ دُژمناں
راجی واب پیلّو بوت
مھرستان چہ سانکلاں آجو بوت
پہ مھرستان ءِ ھاتر ءَ
دْریگتیں ! نَپسّ ءَ مہ دُروھتیں انگتہ
دْریگتیں ! نَپسّ ءَ مہ دُروھتیں انگتہ