مکران:چاگردی گلّانی کارءُکُرت(کسانیں چمشانکے)۔ گلزار گچکی
مکران:چاگردی گلّانی کارءُکُرت(کسانیں چمشانکے)
پٹّءُپولءُنبشتہ: گُلزار گچکی
بام کلاتک؛
بام ڈیولپمنٹ آرگنائیزیشن کلاتک چہ تربت شھرءَ ڈَنّ، چہ کڈز گھنہءَ ۴ کلومیٹر گستا دومی جْوانیں گلّ اِنت کہ چہ وتی جوڑِشتءَ بگرداں روچءِ مروچءِ مروچی اَلکاپیءَ جُھدان اِنت ۔ ایشیءِبُن ھِشت من وت 2000 ءَسالءَایرکت ۔ھمے زمانگءَ آپسرءَ قمر الدین بلوچءَوتی گْوھارءِکُمکءَ مکران ایجوکیشنل ڈیولپمنٹ آرگنائیزیشن(میڈو)ءِبُن ھِشت ایر کتءُدمگءَ بازیں چاگردی دیمرئی گلّانی بُن ھِشت ایر بوھان بوت ۔ چمداں نہ ایوکءَ ڈیولپمنٹ سیکٹر یا سول سوسائٹی آرگنائیزیشن جوڑ بوھان بنت ءُ رُدوم زوراَنت بلکن چہ ساریءَ رجسٹرڈ بلے اوشت آماچیں (defunct) چاگردی گلّ دوبر پہ کارءَجھ جن اَنت۔ بام ڈیولپمنٹ آرگنائیزیشنءِبُنگیج من گوں اختر ؔحامد،رحمت اللہ توصیفؔ، پیربکش پیرلؔ، زاھد ؔعابدءُاِے دگہ سنگتاں کتءُایشیءَرا چہ سوشل ویلفیئرءَرجسٹرکت۔
ایشیءِ جوڑِشتءَ پد میتگءَ ھاسیں ھمراھداریءُ کُمک ودی نہ بوت۔ لسّ ورناھاں ھاسیں دلگوش گْور نہ کت۔لاچاریءَ یکّ روچے من کلاتُک بازارءَھوٹلءَ مجلسے لوٹااینت، ورناھانی دیمءَ چاگردی گلّانی اَرزِشتءُ بامءِ وسیلہ چاگردی دیمرئیءِواستءَ کار کنگءِ گپّ ایر کت اَنت۔ اَبید چہ فیضؔ الرحمنٰ کہ مروچاں یونیسف کیچءِ ضلعی کوآرڈینیٹراِنت،کہ مئے گپّ ئِے دوست بوت اَنتءُھمراھداری بِنا کت، اِے دگر اں ھاسیں دلگوش گْورنہ کت۔ بلے مُدتےءَ پد بامءَ جُھدکارانی مزنیں ٹولی ھَوار بوت ۔ مئے اولی کارپہ بامءَ زمینءِ گرگ اَت۔ کلاتُک ءِلَیبی پٹّءِکبلھی نیمگ ءَزمینءِ ٹُکڑما ٹریکٹر کتءُ ساپ کت۔ کساس یکّ ایکڑے زمین کہ مرے روچاں لکّاں کلدارئیگ اِنت، پہ بامءَ شرّکت۔ SAP-PKءِ کاردارمظہرلغاریؔ کہ ھمے زمانگءَ کڈزگھنہءِ ترّءَتاب ءُ پراجیکٹءِ چار ءُ تپّاسءَ اتکگ اَت،کلاتُکءَ ھم اتک۔ ماآئیءَ را پروپوزلے جم دات ، سے لکّ کلدارءِ مالی کُمک گپت۔دیمترءَ من چہ وتی ڈونر دارہ ٹی۔وی۔اوءَ، بامءَواست ھینڈ پمپءِ جنگ ءُساپیں آپءِ پُجّارینگءِ ھاترءَ۵ لکّ کلدارءِ مالی کُمک گپتءُدات ۔ بامءَ ھینڈ پمپ جت اَنت ءُ کساس لکّ کلدار پسائندگ کت۔ SAP-PKءِ مالی کُمک ءُچہ TVOءِپراجیکٹ ءَبامءِکرّءَ چار لکّ کلدار ءِ بیلنس بوت۔بامءِ کارگسءِ ھاترءَدوکوٹیءُ ھال،چار ڈیوالیءُ چاتءُچمشود بزاں سرجمیں کارگسے اَڑ بوت ۔ بام ءِ برکتءَ کلاتُکءِ لیبی پٹّ کہ کشءُگْوری لوگ میزاں میزاں نزّآران اِت اَنت ئِے، ھم مھپوز بوت۔ ما چہ ھما زمانگءِ ضلعی ناظم مولابکش دشتیؔءِ کُمکءَ، زُبیدہ ؔجلال تربت مند روڈ داں بام کارگس،یکّ کلومیٹرے پکّائیں دگءُ پہ لیپی پٹّءَ کسانیں اسٹیڈیمے ھم شرّکنااینت۔بامءِ کارگسءِ جوڑ بُوَگ ءَ ناں ایوکءَ میتگءَ مُھکمیں چاگردی گلّے رس اِت ،ایشیءِ بگلءَ ھستیں لیبی پٹّ ھم چہ کبزہءَبیمّءَ آجوبوتءُآبات بوت۔
بامءِ تلّوءَ کلاتُکءَ تھیٹر، زیمرءُچاگردی گھبودی کاراں سکّ ردوم زُرت۔ ایشیءِ چیردستی ءَ وھدپہ وھد مجلسءُ مراگش بوت اَنت۔ لَیبءُ گْوازیءُ وانگ ءُزانگی نیاد بندات بوت اَنت۔ چہ میاں اُستمانیءُ مُلکی چاگردی گلّاں ورناھانی ھیلکاریءُسوجکاری بوت اَنت۔ بامءِ کمپانءَ انّوں(2022ءَ) بام انگلش گرائمر اسکولءَ450چُکّ وانگءَ۔ءُبام انگلش لینگویج سینٹرءَ310 چُکّ انگلش دربرگءَ ۔ بام کلاتُکءَ اے وھدءَ چاگری ریسور س سینٹر ےءُدمگءِ درسرکاری دیمرئی چاگردی ادارہ اِنت۔ سرکاری ادارہءُکُمک ھرجاہ کہ دست کپ ایت، مھلوکءِ بُندری ھکّ اِنت، دیگ بہ بیت بلے چارگردی گلّانی کرد ھچّ رنگءَ شموشگ نہ بنت۔ انّوں بام یکّ ادارھےءِجھت ءَپمیشکا زندگءُ برجاہ اِنت پرچاکہ ایشیءَ را وتی جندءِ کارگسءُزمین ھست۔ پہ ادارھانی زندگ مانگءَآھانی جندءِ کارگسءِپجّیءَ بے تماھیں ءُدم نہ بروکیں چاگردی جُھدکار سکّ زروری اَنت، وگہ ناں چاگردی گلّ وھدءِ پجّیءَھلاس بنت۔
(روان اِنت)