Peregrine Falcon (Falco peregrinus) وَچری، وکاب، شاھین۔
Peregrine Falcon (Falco peregrinus) وَچری، وکاب، شاھین
نبشتہ کار: سلمان بلوچ
وَچری شاھین ءِ کٹمب ءِ تہا یک نسلے۫، وچری کَچۤ چہ دگہ شاھیناں مسترانت، اے دنیا ءِ تیز تَریں مُرگ گوشگ بیت، وچری گیش پہ شکار ءَ کارمرز بیت۔ چونا دگہ مُرگانی سب سپیشی (نسل ءِ تہی تہر) چیزے بنت بلے وچۤری ءِ کساس 19 نسلی تہر انت۔
دمگ: وَچری دنیا ءِ گیشتر بہراں بیت، چو کہ امریکا، یورپ، افریقہ، آسٹریلیا ءُ ایشیا۔ وَچری لہتے جاہاں کُل سال ءِ جہمنند انت، لہتے دمگاں رین کنت ءُ لہتے دمگاں زمستان ءَ کئیت۔ یورپ ءِ گیشتری جہمنند انت، ءُ یوروایشا بزاں کہ سارتیں ایشیا روس ءُ چپ چاگرد ءِ وَچری زمستان ءَ بلوچستان ءِ راہ ءَ انڈیا ءَ روت۔ ھمے وڑا افریقا، آسٹریلیا ءُ ایشیا ءِ لہتے دمگاں کُل سال ءِ جہممند انت۔
کَچّ ءُ رنگ: وَچۤری کساس کانگی ءِ کَچۤ ءَ بیت۔ وَچۤری ءِ کَچۤ کساس 74-120 سینٹی میٹر بیت، نر کسر انت ءُ مادگ مستر انت۔ اشی رنگ سیاہ انت، اگاں نزیک ءَ گندے گڑا نیل بُرزیں سیاہ پُرو انت۔ گُٹ ءُ گوشے بُن اسپیت، ءُ سینگ ٹِک ٹکاری انت انت داں لاپ، لاپ ءِ کشی نیمگ داں بازُل ءِ چیر کِشکی انت ءُ چَمۤانی کُوس زرد انت، چُمب ءِ سَرُک سیاہ ءُ چمب ءِ بُن زرد انت۔ اشی پاد زرد انت۔ اے کساس 320 کلومیٹر سہت ءِ گشادی ءَ بال کُرت کنت، پمشکہ اے دنیا ءِ تیز تریں بال کنوک مُرگ گوشگ بیت۔
رین: چو کہ اے انٹارکٹیکا ءَ ابید دنیا ءِ ھمک جاہاں بیت پمشکہ دمگانی ھساب ءَ جتا جتا ایں ماہاں رین کنت، آسٹریلیا ءَ نومبر، یورپ ءَ جولائی / اگست، دگہ لہتے جاہاں فروری / مارچ ءَ رین کنت۔ اے کساس 2-5 ھیک دنت، اے گیشتر کوہی دمگاں رین کنت، بلے یورپ ءَ مزنیں ماڑی، پہل ءِ پلر ءُ ھڑنگانی تہا ھم رین کنت۔ اے کوہانی تلمبانی تہا ھنچیں جاہاں کامرز کنت کہ کسے رست مہ کنت۔ گیشتر یکیں جاہ ءَ کدوگ کنت۔ گیش مادگ چیر کنت ءُ نَر پہ آئی ءَ ورگ کاریت۔ کساس 35 روچ ھیک چیر بنت۔ چوریک کساس 50 روچ ءَ پد وتی اولی بال ءَ کنت۔ داں چُوریک آجو نہ بنت نکیک اشاں رکۤین ایت ءُ نَر وراک کاریت۔ اے کساس 16 سال زند کنت۔ دراج تریں زند 19 سال رکارڈ کنگ بیتگ۔
وراک: اشی وراک گیشتر مُرگ انت۔ اے مُرگ ءَ بال ءَ جنت، مُرگانی تہا کپودر گیش شکار کنت۔ اشی ءِ تیزی ءِ سوب ءَ اے ھرچ وڑیں مُرگ شکار کُرت کنت۔ بَت، ملیرءُ دگہ تیابی مُرگ ھم اشی شکار بنت۔ اے کدی کدی کسانیں مُرگ ھم جنت چو کہ جنگُل ءُ چَگوگ۔
نسلی جاور: وَچۤری شکار ءَ پہ کارمز سوب ءَ گِرگ ءُ بہا کنگ بیت، اے سوب ءَ اے نسل ءَ سک تاوان وارتگ، ابید گِرگ ءُ بہا ءَ، زہر ءُ درمان پہ کشت ءُ کشار اشاں پہ مزنیں تاوان انت۔ دنیا ءَ بازیں دمگاں اشی رکۤینگ ءَ پہ جھد بیگ ءَ انت۔
